اقتوبە، baq.kz ٴتىلشىسى. اقتوبە قالاسىنداعى №10 ورتا مەكتەپتىڭ وقۋشىسىنان اشىق فورماداعى تۋبەركۋلەز انىقتالدى. ٴبىلىم مەكەمەسىندە كارانتين جاريالانعان. وقۋشىلاردىڭ بارلىعى مەديسينالىق تەكسەرۋدەن ٴوتىپ جاتىر.
استانا: 
2340 
0
اقتوبە، baq.kz ٴتىلشىسى. اقتوبە قالاسىنداعى №10 ورتا مەكتەپتىڭ وقۋشىسىنان اشىق فورماداعى تۋبەركۋلەز انىقتالدى. ٴبىلىم مەكەمەسىندە كارانتين جاريالانعان. وقۋشىلاردىڭ بارلىعى مەديسينالىق تەكسەرۋدەن ٴوتىپ جاتىر.
اقتوبەدەگى وڭتۇستىك-باتىس اۋدانىنداعى №10 ورتا مەكتەپتىڭ باستاۋىش سىنىپ وقۋشىسىنان اشىق فورماداعى تۋبەركۋلەز انىقتالدى. وقۋشى 27 قىركۇيەك كۇنى اۋىرىپ، ۇستازدارى اتا-اناسىن شاقىرتقان. 28 قىركۇيەكتە بالا اۋرۋحاناعا جاتقىزىلدى. 4-سىنىپ وقۋشىسىنا تۋبەركۋلەز دياگنوزىنىڭ قويىلعاندىعىن پەداگوگتارعا 3 قازاندا ايتىلعان. مەكتەپ ديرەكتورىنىڭ ورىنباسارى گۇلايىم يمانوۆانىڭ سوزىنشە، ٴقازىر مەكتەپ وقۋشىلارىنىڭ بارلىعى مەديسينالىق تەكسەرۋدەن ٴوتىپ جاتىر.
«ٴقازىر مەكتەپتەگى وقۋشىلاردىڭ 25 پايىزىنا سىناما جاسالدى. 1-9 سىنىپ وقۋشىلارىنا عانا مانتۋ ەگىلەدى. ال، 10-11 سىنىپ وقۋشىلارى فليۋروگرافيادان ٴوتىپ جاتىر. مانتۋ قورىتىندىسى ٴالى بەلگىسىز. ونى دارىگەرلەردەن سۇرايسىزدار. مەكتەپكە دەزينفەكسيا جاسالدى»،-دەدى №10 مەكتەپ ديرەكتورىنىڭ ورىنباسارى گۇلايىم يمانوۆا.
وقيعاعا قاتىستى بۇگىن وڭىردەگى دەنساۋلىق سالاسىنا جاۋاپتى ماماندار بريفينگ وتكىزدى. اقتوبە قالاسىنىڭ قوعامدىق دەنساۋلىق ساقتاۋ باسقارماسىنا شۇعىل حابارلاما 5 قازان كۇنى تۇسكەن. ماماندار بىردەن تەكسەرىس جۇرگىزىپتى.
"5 قازان كۇنى قالالىق قوعامدىق دەنساۋلىق ساقتاۋ باسقارماسىنا حابارلاما ٴتۇستى. حابارلاما بويىنشا، جەدەل تۇردە تەرريتوريالىق تەكسەرىس جۇرگىزىلدى. ٴقازىر مەكتەپتە سانيتارلىق- گيگيەنالىق جاعداي تۇراقتى. وقۋ ورنىنداعى بارلىق سىنىپتا دەزينفەكسيا جۇرگىزىلدى. وتباسىنداعى 5 ادامنىڭ دا جاعدايلارى جاقسى. ەپيدەميولوگيالىق تەكسەرىستەن كەيىن وقۋشىنىڭ جازعى دەمالىستا اتىراۋ وبلىسى قۇلسارى اۋدانىندا دەمالعانى دالەلدەندى. اتىراۋ وبلىستىق قوعامدىق دەنساۋلىق ساقتاۋ دەپارتامەنتىنە حابارلانىپ، ٴقازىر جەدەل تۇردە تەكسەرۋ جۇرگىزىپ جاتىر"،- دەدى اقتوبە وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى نۇرسۇلۋ بەركىمبايەۆا.
№10 مەكتەپتە گۇلايىم يمانوۆانىڭ سوزىنشە، 3 قازاننان باستاپ كارانتين جاريالانعان. اتا-انالار ىشكە كىرگىزىلمەي جاتىر. ٴبىراق، دارىگەرلەر كارانتيننىڭ جاريالانۋى زاڭسىز دەيدى. ارنايى مامانداردىڭ رۇقساتىنسىز مەكتەپ ۇجىمى كارانتين جاريالاي المايدى.
«كەۋدە قۋىسىنداعى ليمفا تۇيىندەرىنىڭ تۋبەركۋلەزى دياگنوزى قويىلدى. بالا ٴقازىر اۋرۋحانادا. ناۋقاستىڭ جاعدايى قاناعاتتانارالىق. 15 جاسقا دەيىنگى بالالاردان تۋبەركۋلەزدى انىقتاۋ ٴۇشىن مانتۋ سىناماسى جاسالادى. ول ٴۇشىن مەكتەپ اۋلاسىنا ارنايى فليۋروگرافيا كولىگىن اپارۋدىڭ قاجەتى جوق. ۋچاسكەلىك دارىگەرلەرىنە قارالىپ، ەمحانادا تەكسەرىلە الادى. ال، تۋبەركۋلەزدى انىقتاۋدا 6-7 سىنامانىڭ ىشىنەن بىرەۋى وڭ ناتيجە كورسەتسە ٴبىز ادامدى ەمدەۋگە الامىز. سوڭعى وقيعادا كارانتين جاريالاۋعا نەگىز جوق. باستىسى ناۋقاسقا ساپالى ەم كورسەتىپ، ٴبىلىم الۋىنا جاعداي جاساۋ»،-دەدى وبلىستىڭ باس فتيزياترى ەرلان ٴتاتىموۆ.
№10 ورتا مەكتەپتە 986 وقۋشى ٴبىلىم الادى. 25 پايىزدان كوبى مەديسينالىق تەكسەرىستەن وتكەن. ال، اقتوبە وبلىستىق قوعامدىق دەنساۋلىق ساقتاۋ دەپارتامەنتىنىڭ باسشىسى نۇرسۇلۋ بەركىمبايەۆانىڭ سوزىنشە، وڭىردە جاعداي تۇراقتى. تۋبەركۋلەز جۇقتىرعاندار سانى ازايىپ كەلەدى.
فوتولار: اۆتور
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
6545
0