BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اقمولادا وندىرىستە زارداپ شەگۋشىلەر قاتارى ازايماي تۇر

اقمولا، baq.kz ٴتىلشىسى. اقمولادا وندىرىستىك جاراقات الۋ جاعدايلارى ازايماي وتىر. جىل باسىنان بەرى 45 ادام زارداپ شەكسە، ونىڭ ٴ34-ى اۋىر جاراقات الىپ، ٴ11-ى قازا بولعان.

ايماقتاعى ەڭبەك قاتىناستارى جونىندە وبلىستىق ەڭبەك ينسپەكسياسى باسقارماسىنىڭ باسشىسى بەرىك ٴمۇستافيننىڭ ايتۋىنشا، وقىس وقيعالاردىڭ دەنى تاۋ-كەن-مەتاللۋرگيا وندىرىسىندە ورىن العان. جازاتايىم جاعداي سالدارىنان وندىرىستە 14 ادام زارداپ شەگىپ، 3 ادام كوز جۇمعان.

«تاجىريبە كورسەتىپ وتىرعانداي، كوپتەگەن جۇمىس بەرۋشىلەر قاۋىپسىزدىك پەن ەڭبەكتى قورعاۋ ماسەلەلەرىنە نازار اۋدارمايدى. ال قاۋىپسىزدىك شارالاردىڭ ساقتالماۋى تۇبىندە ادام ولىمىنە الىپ كەلەدى. كوبىنەسە وندىرىستەگى جازاتايىم وقيعالار كەزدەيسوق اپات رەتىندە قابىلدانادى. مۇنىڭ ٴوزى سول كاسىپورىن باسشىلىعىنىڭ سالعىرتىعى مەن ٴتارتىپتى بەتىمەن جىبەرۋىنىڭ كورىنىسى. جىل باسىنان بەرى وڭىردەگى كاسىپورىنداردا 450-دەن اسا تەكسەرۋ جۇرگىزدىك. ەڭبەك قاۋىپسىزدىگىن ساقتاۋ، وندىرىستىك جاراقاتتاردىڭ الدىن الۋ ماقساتىندا 79 سەمينار وتكىزدىك. بۇل جۇمىستار ٴالى دە جالعاسادى»، - دەيدى بەرىك مۇستافين.

وڭىردەگى «التىنتاۋ-كوكشەتاۋ» كومپانياسى اتقارۋشى ديرەكتورىنىڭ ورىنباسارى نۇركەن قاسىموۆتىڭ ايتۋىنشا، كاسىپورىندا ەڭبەك قاۋىپسىزدىگىن كۇشەيتۋ بويىنشا كەشەندى جوسپار ازىرلەنگەن. وسى ماقساتقا 700 ملن تەڭگە ٴبولىنىپ، 500 ملن تەڭگەگە ارنايى قۇتقارۋ قۇرال-جابدىقتارى ساتىپ الىنعان.

«بىزدە وندىرىستىك قاۋىپسىزدىك باسقارماسى جۇمىس ىستەيدى، ونىڭ قۇرامىندا ىشكى تەكسەرىس قىزمەتى ينسپەكتورلارى بار. مەديسينالىق ورتالىق قاجەتتى اپپاراتۋرامەن، العاشقى مەديسينالىق كومەك كورسەتۋ ٴۇشىن مەديكامەنتتەرمەن تولىق قامتاماسىز ەتىلگەن»، – دەيدى نۇركەن قاسىموۆ.

ەڭبەك سالاسىنداعى قاقتىعىستارعا، نارازىلىقتارعا اسەر ەتەتىن ماڭىزدى فاكتورلاردىڭ ٴبىرى – جالاقىنىڭ ۋاقىتىلى تولەنبەۋى. وبلىستاعى 62 كاسىپورىن مەن ۇيىم 2107 جۇمىسشىعا 154،6 ملن تەڭگە بەرەشەك ەكەنى انىقتالعان. مەملەكەتتىك ينسپەكتورلاردىڭ قاتىسۋىمەن بۇگىنگە دەيىن 153،5 ملن تەڭگەسى قايتارىلعان. ەكى كومپانيا جۇمىسشىلارىنا 1،1 ملن تەڭگە بەرەشەگىن وتەمەگەن. ەڭبەك قاۋىپسىزدىگىن بۇزعان 226 لاۋازىمدى تۇلعاعا اكىمشىلىك شارا قولدانىلعان.

«جۇمىسشىلار تاراپىنان وندىرىستىك ورىنداردا قاۋىپسىزدىك ساقتالا بەرمەيتىنىنە قاتىستى شاعىم ايتىلعانىمەن، ٴتيىستى قاداعالاۋشى ورىندار بۇعان كوز جۇما قارايدى. كەي جاعدايدا جۇمىسشىنىڭ ٴوزى دە ٴوز قاۋىپسىزدىگىنە سالعىرت قارايدى. وسى ورايدا وندىرىستە جۇمىس ىستەۋگە ٴقاۋىپسىز جاعداي تۋعىزۋ ارنايى زاڭمەن بەكىتىلۋى ٴتيىس»، - دەيدى وبلىستىق كاسىپوداقتار بىرلەستىگىنىڭ ٴتوراعاسى كەڭەس بەكىشەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي