جۋرناليست كۇلان بەرىكبولوۆا دۇنيەدەن ٴوتتى

الماتى، baq.kz. تانىمال جۋرناليست، اۋدارماشى، ۇزاق جىلدار وسى سالادا قىزمەت ىستەگەن كۇلان بەرىكبولوۆا اۋىر ناۋقاستان قايتىس بولدى.

كۇلان بەرىكبولوۆا 1956 جىلى 4 قىركۇيەكتە شىعىس قازاقستان وبلىسى، اياگوز قالاسىندا دۇنيەگە كەلگەن.

1973 جىلى جارما ستانسياسىنداعى ورتا مەكتەپتى، 1978 جىلى ٴال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

ەڭبەك جولىن سول كەزدەگى سەمەي وبلىسى، جارما اۋدانىنىڭ «مولشىلىق ٴۇشىن» گازەتىندە باستاعان (1978-81). بۇدان كەيىن ٴار جىلدارى «سوسياليستىك قازاقستان» (1981-85)، «جۇلدىز» (1986-94)، «بىرلىك»، «اق بوساعا»، ت.ب. رەسپۋبليكالىق مەرزىمدى باسىلىمداردا قىزمەت اتقارعان.

2000-2004 جىلدارى «قورعاۋ» زەينەتاقى جيناۋ قورىندا اۋدارماشى، كەيىن «ەكونوميكا»، «قازاقپارات» باسپالارىندا رەداكتور بولدى.

مۇستافا وزتۇرىك جايلى «مۇزبالاق مۇستافا» (1997) ەستەلىكتەر جيناعىن، توقتارحان ٴشارىپجانوۆتىڭ «قالدىردىم مۇرا حالقىما» (2003) جيناعىن قۇراستىرىپ، جارىققا شىعاردى.

ۆ.ل.نازاروۆانىڭ «شارۋاشىلىق جۇرگىزۋشى سۋبەكتىلەردەگى بۋحاگالتەرلىك ەسەپ»، ۆ.ل.نازاروۆا، د.ا.فۋرسوۆ، س.د.فۋرسوۆا، م.س.جاپپارحانوۆانىڭ «باسقارۋ ەسەبى»، ك.بەرداليەۆتىڭ «مەنەدجمەنت»، گ.ا.جاپپاروۆانىڭ «ينفورماتيكا نەگىزدەرى»، د.و.ابلەنوۆتىڭ «اۋديت نەگىزدەرى» اتتى وقۋلىقتارىن ا.جالعابايەۆپەن بىرلەسىپ، ورىسشادان قازاقشاعا اۋداردى.

«ٴۇش قيان» باسپاسىنان «ۇنىمەن ۇزدىرگەن ۇكىلىم-اي» اتتى كىتابى جارىق كوردى.

تەگي
• الماتى

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!