جاقىپ اسانوۆ ۋكراينانىڭ ادىلەت مينيسترىمەن كەزدەستى

فوتو: sud.gov.kz

استانا، baq.kz. بۇگىن جوعارعى سوت ٴتوراعاسى جاقىپ اسانوۆ ۋكراينانىڭ ادىلەت ٴمينيسترى پاۆەل پەترەنكومەن كەزدەستى.

ٴىس-شاراعا ۋكراينانىڭ قازاقستانداعى ەلشىسى يۆان كۋلەبا، ۋكراينا ادىلەت ٴمينيسترىنىڭ ورىنباسارى دەنيس چەرنيشوۆ پەن مينيسترلىكتىڭ باسقا دا جاۋاپتى قىزمەتكەرلەرى قاتىستى، دەپ جازادى جوعارعى سوتتىڭ ٴباسپاسوز قىزمەتى.

اسانوۆ ٴوزارا تۇسىنىستىك پەن سەنىم داستۇرىندە دامىپ كەلە جاتقان ەكى ەل اراسىنداعى دوستىق قاتىناستاردى اتاپ ٴوتتى.

كەزدەسۋ بارىسىندا قوناقتارعا ەلدىڭ سوت جۇيەسىندە بولىپ جاتقان وزگەرىستەر تۋرالى اقپارات بەرىلدى.

«وزەكتى پروبلەمالارعا تالداۋ جاساۋ نەگىزىندە ٴبىز ودان ٴارى دامۋدىڭ جەتى باسىم باعىتى – «سوت تورەلىگىنىڭ جەتى ٴتۇيىنىن» انىقتادىق. ولار سوتتارعا سەنىمدى ارتتىرا تۇسۋگە جانە سوت تورەلىگىنىڭ ادىلەتتىلىگىن، ونىڭ جاۋاپكەرشىلىگى مەن تاۋەلسىزدىگىن، سوت شەشىمدەرىنىڭ جوعارى ساپاسى مەن سۋديالاردىڭ بىلىكتىلىگىن ارتتىرۋ ارقىلى قۇقىق ۇستەمدىگىن قامتاماسىز ەتۋگە باعىتتالعان»، - دەدى اسانوۆ.

ٴوز كەزەگىندە، پ.پەترەنكو قازاقستاننىڭ سوت جۇيەسىندەگى وڭ وزگەرىستەردى اتاپ ٴوتتى. كەزدەسۋ بارىسىندا سوتتاردى سيفرلاندىرۋ ٴۇردىسى، مەدياسيانى دامىتۋ، ازاماتتىق سوت تورەلىگىن جەتىلدىرۋ مەن سوت شەشىمدەرىنىڭ قۇقىقتىق ايقىندىلىق دەڭگەيىن جەتىلدىرۋ تىلگە تيەك بولدى. سونداي-اق جوعارى مارتەبەلى قوناقتى «تۇنگى سوت»، «وتباسىلىق سوت»، «ۆيرتۋالدى سوت» پيلوتتىق جوبالارىن ەنگىزۋ تاجىريبەلەرى جانە باسقالارى قىزىقتىرا ٴتۇستى.

كەزدەسۋ قورىتىندىلارى بويىنشا تاراپتار ىنتىماقتاستىقتى ودان ٴارى كەڭەيتە تۇسۋگە نيەتتى ەكەندەرىن ٴبىلدىردى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!