استانا: 
استانا، baq.kz. بۇگىن استانادا كوشى-قون سالاسىن وڭتايلاندىرۋ جانە سيفرلاندىرۋ بويىنشا ارنايى بريفينگ ٴوتتى. ٴباسپاسوز ٴماسليحاتى بارىسندا قر ٴىىم كوشى-قون قىزمەتى كوميتەتى ٴتوراعاسىنىڭ ورىنباسارى گالينا سارسەنبايەۆا ەلىمىزگە كەلەتىن شەتەل ازاماتتارى مەن قانداستارىمىز ٴبىر ساعاتتا جسن الا الاتىنىن ايتتى.
«كەلەسى جىلدان باستاپ كورسەتىلەتىن جاڭا قىزمەتتەرگە توقتالعىم كەلەدى. كەلەسى جىلدان باستاپ ٴبىز ۋاقىتشا كەلەتىن شەتەلدىكتەرگە جەكە سايكەستەندىرۋ ٴنومىرىن (جسن) رەسىمدەيتىن بولامىز. جسن ولارعا ەلىمىزدە بيزنەس جۇرگىزۋ، كەلىسىمدەر مەن سالىق تولەۋ ٴۇشىن قاجەت»، - دەيدى گالينا سارسەنوۆا.
ونىڭ ايتۋىنا قاراعاندا، بۇرىن شەتتەن كەلگەن قانداستارىمىز قازاقستاندا جسن الۋ ٴۇشىن سالىق ورگاندارىنا جۇگىنەتىن جانە ول جەردەن اتالعان قۇجاتتى الۋ ٴۇشىن كەمىندە 5 جۇمىس كۇنى وتكەنشە كۇتەتىن. ەندى ولاي بولمايدى.
«ٴبىز اتالعان قىزمەت ٴبىر ساعاتتىڭ ىشىندە ىسكە اسىرىلادى دەپ جوسپارلاپ وتىرمىز. قازىرگى كەزدە ىشكى ىستەر مينيسترلىگى مەن حالىققا قىزمەت كورسەتۋ ورتالىقتارىنىڭ اقپاراتتىق جۇيەسى جەتىلدىرىلىپ جاتىر. جاڭا جىلدان باستاپ بۇل جۇمىسقا تولىقتاي كىرىسەمىز»، - دەيدى ول.
سونىمەن قاتار گالينا سارسەنوۆا حقكو-دا جالپى كوشى-قون پوليسياسى جەلىسى بويىنشا 11 قىزمەت كورسەتىلەتىنىن، الداعى ۋاقىتتا بۇلاردىڭ قاتارىن كوبەيتەتىنىن ايتتى.
«سوڭعى 2 جىل ىشىندە ٴبىز حقكو ارقىلى 4 مەملەكەتتىك قىزمەتتى قوسىمشا كورسەتە باستادىق. ولاردىڭ قاتارىندا: شەتەلگە تۇرعىلىقتى تۇرۋ ٴۇشىن شىعۋ قۇجاتتارىن رەسىمدەۋ; شەتەلگە اتا-اناسىمەن بىرگە شىعۋ ٴۇشىن بالالاردىڭ فوتوسۋرەتتەرىن اتا-اناسىنىڭ پاسپورتىنا جابىستىرۋ; ەڭبەك ميگرانتتارىنا رۇقسات بەرۋ جانە ونى ۇزارتۋ; قازاقستاندا تۇرعىلىقتى تۇراتىن شەتەلدىكتىڭ ىقتيارحاتىن جانە ازاماتتىعى جوق ادامنىڭ كۋالىگىن بەرۋ قامتىلعان. الداعى ۋاقىتتا بۇل قىزمەتتەردىڭ قاتارىنا تاعى دا بىرنەشە قىزمەت قوسىلاتىن بولادى»، - دەدى گالينا سارسەنوۆا.
كوشى-قون قىزمەتى كوميتەتى ٴتوراعاسىنىڭ ورىنباسارىنىڭ ايتۋىنا قاراعاندا بۇنىڭ بارلىعى ەلگە كەلگەن شەتەلدىكتەردىڭ ۋاقىتىن ۇنەمدەۋ، تەزىرەك قۇجاتتاندارۋ ٴۇشىن جاسالىپ جاتقان شارۋا.
"بۇل تۇرعىدا قازاقستاندا تۇراقتى تۇراتىن شەتەلدىكتەر قازاقستانداعى تۇرعىلىقتى جەرىن اۋىستىرعان جاعدايدا حقكو-عا بارىپ، قىزمەت الاتىنىن ٴبىلۋ ماڭىزدى. بۇعان دەيىن شەتەلدىك باسقا وڭىرگە كوشكەن كەزدە كوشى-قون قىزمەتىنەن ارنايى رۇقسات الۋى قاجەت بولاتىن. ودان كەيىن كوشىپ كەتكەن سوڭ باسقا وڭىردە تىركەلۋى كەرەك. بۇنىڭ بارلىعى بىرنەشە كۇندى قاجەت ەتەتىن. ەندى بۇرىنعى مەكەنجايدان شىعۋ اۆتوماتتى تۇردە جۇرگىزىلەدى، ياعني جاڭا تۇرعىلىقتى جەرى بويىنشا حالىققا قىزمەت كورسەتۋ ورتالىعىنا بارۋ جەتكىلىكتى" - دەيدى ول.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3409 
0
17087
0