پرەزيدەنتپەن كەزدەسۋى ٴومىرىن وزگەرتكەن جاندار - قوعام|01 جەلتوقسان 2018، 09:45
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پرەزيدەنتپەن كەزدەسۋى ٴومىرىن وزگەرتكەن جاندار

فوتو: ашық дереккөзден

قىزىلوردا، baq.kz ٴتىلشىسى. قازاق حالقى ىرىمشىل حالىق. ومىرىمىزدە بولعان وقيعالاردى نەمەسە كەزدەسۋلەردى جاقسىلىققا جورىپ، ىرىمداپ جاتامىز. وسىنداي جانداردىڭ قاتارىنا قر تۇڭعىش پرەزيدەنتىمەن بىرنەشە رەت كەزدەسۋ بۇيىرعان قىزىلوردالىقتاردى جاتقىزۋعا بولادى.

جىرشى رۋسلان احمەتوۆ ەلباسىمەن العاش رەت 1998 جىلى كەزدەسكەن.

«مەن ول كەزدە 22 جاستا ەدىم. وبلىسقا ارنايى ىسساپارمەن كەلگەن مەملەكەت باسشىسىنىڭ الدىنان ارناۋ ايتىپ شىقتىم. جانىندا سول كەزەڭدە كەڭەسشى قىزمەتىن اتقارىپ جۇرگەن زاڭعار جازۋشى ٴابىش كەكىلبايەۆ بار ەكەن. سول كۇن مەن ٴۇشىن قيىندىعىمەن، ٴارى تولقىنىسىمەن ەستە قالدى. ونەر جولىندا ٴالى كەمەرىنە تولماعان، پىسىپ-جەتىلمەگەن جىگىتتىڭ تاۋ تۇلعا الدىندا ارناۋ ايتۋى – ۇلكەن جاۋاپكەرشىلىك. قيىن دەۋىمنىڭ سەبەبى – سول. ٴبىر جاعىنان، ەلباسىنىڭ الدىندا ونەر كورسەتۋ باقىتىنىڭ ماعان بۇيىرعانىنا قاتتى قۋاندىم. سول كۇن مەن ٴۇشىن ۇمىتىلماستاي بولدى. سەبەبى، ٴبىر ساتتە قوبالجۋ، تولقۋ، قۋانىش، قورقىنىش سەزىمدەرىن جۇرەگىمنەن وتكىزدىم»، – دەيدى ول.

رۋسلان احمەتوۆ تاۋەلسىزدىكتىڭ 10 جىلدىعىندا ەكىنشى مارتە ارناۋ ايتقان. سوسىن 10 جىلدان كەيىن ەلباسى قىزىلوردا وبلىسىنا ساپارمەن كەلگەندە تاعى دا دومبىرامەن ٴان شىرقاعان.

«ۇيىمداستىرۋشىلاردىڭ تاپسىرماسى بويىنشا 30 مينۋت جىر ايتۋىم كەرەك. جىرىمدى ايتتىم. مەجەلى ۋاقىت بىتكەندە ەلباسى تاعى دا ماعان جارتى ساعات جىر ايتۋىمدى سۇرادى. وسى ساتتە ول كىسىنىڭ ونەرگە دەگەن قۇشتارلىعىنا شەكسىز ريزا بولدىم. ونەر كورسەتىپ بولعان سوڭ، نۇرسۇلتان ٴابىش ۇلى ماعان بۇرىلىپ، ارقامنان قاعىپ، تىلەۋلەستىگىن ٴبىلدىردى. توبەم كوككە جەتكەندەي بولدى. بىلتىر عانا ەكسپو حالىقارالىق كورمەسى اياسىندا وتكەن اۋقىمدى شارادا ەلباسىمەن تاعى دا جۇزدەستىم. ارناۋ ايتتىم. سىر جۇرتشىلىعىنىڭ ىستىق ىقىلاسىن جىرعا قوستىم. مىنە، مەن وسىلايشا ەلباسىمەن ٴبىر ەمەس، بىرنەشە مارتە، ناقتىراق ايتسام سەگىز رەت كەزدەسۋ باقىتىنا يە بولدىم»، – دەيدى رۋسلان احمەتوۆ.

ال قىزىلوردا وبلىستىق قازاقستان حالقى اسسامبلەياسىنىڭ ٴباسپاسوز حاتشىسى سۆەتلانا كريۋگەر ەلباسىمەن 2005 جىلى ٴساۋىر ايىندا كەزدەسىپتى.

«مەنىڭ ٴومىر تاريحىمدا التىن ارىپتەرمەن جازىلىپ قالاتىن كۇن. سول جىلى وبلىسقا ساپارمەن كەلگەن ەلباسى نۇرسۇلتان نازاربايەۆتىڭ قابىلداۋىنا وبلىستىڭ بارلىق ستۋدەنت جاستارىنىڭ اتىنان قاتىستىم. ەسىمدە، كەزدەسۋدە ەلباسىنا «بولاشاق» باعدارلاماسىنىڭ جاستارعا بەرەر مۇمكىندىگى جونىندە سۇراق قويدىم. سوندا مەملەكەت باسشىسى ساۋالىما تولىق ٴارى ناقتى جاۋابىن بەردى. ەلباسىنىڭ جاستارعا دەگەن ىقىلاسى ەرەكشە. ودان كەيىن دە ەلباسىنىڭ قاتىسۋىمەن وتكەن بىرنەشە شارالاردا بولدىم. پىكىرىن، تۇششىمدى ويىن تىڭداۋعا مۇمكىندىك الدىم»، – دەيدى سۆەتلانا.

"قازاقستاننىڭ ٴجۇز جاڭا ەسىمى" جوباسىنىڭ جەڭىمپازى سىمبات ٴابدىراحمانوۆا دا تۇڭعىش پرەزيدەنتپەن جۇزدەسۋدى ارمانداعانداردىڭ ٴبىرى.

"ەلباسىمەن كەزدەسەسىڭ" دەگەن جاڭالىق مەنىڭ ٴومىرىمدى كەنەتتەن جاڭا ارناعا بۇرىپ جىبەرگەندەي بولدى. قۋانىشتان سەنەر-سەنبەسىمدى بىلمەدىم. كەيىن تاعى دا سول كۇندى ويلاپ، ٴبىراز قوبالجىپ، ۋايىمداعانىم بار. بالا كۇنىمدە ەلباسىمەن كەزدەسسەم ەكەن دەپ كوپ ارمانداۋشى ەدىم. ادام الدىنا ماقسات قويسا، ارمانداي بىلسە، ٴبارى دە ٴىس جۇزىندە جۇزەگە اساتىنىنا كوزىم جەتتى. ال، مەنىڭ بالا ارمانىم 2017 جىلى تۇڭعىش پرەزيدەنت كۇنى قارساڭىندا ورىندالدى. ەلباسىنىڭ ىستىق ىقىلاسىن، قولداۋىن سەزىندىم. اتالمىش جوبانىڭ قورىتىندى كەشىندە مەملەكەت باسشىسىمەن سۋرەتكە تۇسەردە ول كىسىنىڭ جانىندا تۇردىم. سۋرەتكە ٴتۇسىپ بولعان سوڭ، بىزبەن پىكىرلەستى. بۇل كەزدەسۋ ەرەكشە وقيعا رەتىندە مەنىڭ ەسىمدە ماڭگىلىككە ساقتالىپ قالارى انىق»، – دەيدى سىمبات ٴابدراحمانوۆا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي