پوليسەيلەر ينتەرنەت الاياقتىڭ جولىن كەستى

استانا، baq.kz. 15-17 قازان كۇندەرى پوليسەيلەر «anti-fraud» رەسپۋبليكالىق پروفيلاكتيكالىق ٴىس-شاراسىن وتكىزدى. ول اقپاراتتىق تەحنولوگيالار سالاسىنداعى قىلمىستىڭ جولىن كەسۋ، ەسكەرتۋ جانە اشۋعا باعىتتالعان.

ٴىىد مالىمەتى بويىنشا، شارا بارىسىندا 20 قىلمىستىق قۇقىق بۇزۋشىلىق انىقتالىپ جانە اشىلعان.

«ٴىس-شارا بارىسىندا پوليسەيلەر 25 جاستاعى ەش جەردە جۇمىس ىستەمەيتىن قاراعاندىلىق كەلىنشەكتى ۇستاعان. ايەل الاياقتىقتى ينتەرنەتتە جۇزەگە اسىرعان. نەگىزىنەن ول instagram الەۋمەتتىك جەلىسىندە قىمبات توندار مەن اشەكەي بۇيىمدارىن ارزان باعادا ۇسىنىپ كەلگەن. ال كليەنتتەرىمەن تەك whatsapp جەلىسى ارقىلى عانا تىلدەسكەن، سەبەبى داۋىسىنان تانىپ قويماسىن دەپ ساقتانعان. ول وزگەلەردىڭ بانكتەگى شوتتارىن قولدانىپ كەلگەن، كليەنت اقشاسىن اۋدارىسىمەن نومەردى بۇعاتتاپ، اكاۋنتتى جانە ۇيالى تەلەفون نومەرىن دە ٴوشىرىپ تاستاپ وتىرعان. نەگىزىنەن ول كليەنتتەرىنەن اقشانى ٴqiwi-اميان ارقىلى العان. وسىلايشا ول قالامىزدىڭ سەگىز تۇرعىنىن سان سوقتىرىپ 1 ملن تەڭگە كولەمىندە قارجى العان. قازىرگى ۋاقىتتا ۇستالعان ازاماتشا قاماۋعا الىنىپ، قر قك 190-بابىنىڭ 2 ٴبولىمى بويىنشا سوتقا دەيىنگى تەرگەۋ جۇرگىزىلۋدە (الاياقتىق)»، دەلىنگەن حابارلامادا.

استانا قالاسى ٴىىد قىزمەتكەرلەرى ينتەرنەت ساتىپ الۋشىلارعا تاۋاردى تەك سەنىمدى ساتۋشىلاردان الۋدى جانە تاۋار قولىڭىزعا تيگەن سوڭ عانا تولەم جاساۋعا كەڭەس بەرەدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!