استانا: 
4978 
0
وسكەمەن، baq.kz. بۇل – ٴبىزدىڭ جەرلەسىمىز، اياگوز اۋدانىنىڭ تۋماسى، اقش-تاعى قازاق دياسپوراسىنىڭ جەتەكشىسى دارحان نۇرماعامبەت. ول وسىدان 16 جىل بۇرىن جۇمىس بابىمەن امەريكاعا قونىس اۋدارعان. سودان بەرى جەرلەسىمىز امەريكالىق عارىش اگەنتتىگىندە ابىرويمەن ەڭبەك ەتىپ ٴجۇر، دەپ جازادى "ديدار" گازەتى.
– «شاتتل» عارىش كەمەسىنىڭ تالاي مارتە اسپان الەمىنە اتتانعانىن كوردىم. شىنىن ايتسام، مۇنى سوزبەن جەتكىزۋ مۇمكىن ەمەس. جالپى، ناسا-دا ەڭبەك ەتكەن 13 جىلدىڭ ىشىندە «سويۋز»، «كەيپ كاناۆەرال» اتتى پيلوتتىق جوبالارعا قاتىستىم. بۇدان بولەك، ەۋروپالىق عارىش اگەنتتىگىمەن ىنتىماقتاستىق ورناتۋ جۇمىستارىنا دا بەلسەنە اتسالىستىم. وسىلايشا، شەتەلدىك ارىپتەستەرىممەن ٴوزارا تاجىريبە الماسىپ، كوپ دۇنيە ۇيرەندىم، - دەيدى جەرلەسىمىز.
دارحان نۇرماعامبەت اقش-تىڭ ۆيردجينيا شتاتىنا كوشىپ كەلگەننەن كەيىن قازاق-امەريكا قاۋىمداستىعىن قۇرىپتى. باستى ماقسات – مۇنداعى قازاقتاردىڭ باسىن قوسىپ، ۇلتتىق ٴسالت-داستۇرىمىزدى ناسيحاتتاپ، كەيىنگى بۋىننىڭ بويىنا پاتريوتتىق سەزىمدى ۇيالاتۋ.
– اياگوز اۋدانىنداعى بيدايىق اۋىلىندا دۇنيەگە كەلدىم. مەن قازاقى قايماعى بۇزىلماعان شىعىس وڭىرىندە تۋىپ وسكەنىمدى ماقتان تۇتامىن. سول سەبەپتەن امەريكاعا كەلە سالىسىمەن قازاقتارعا ارنالعان قاۋىمداستىق قۇرىپ، قانداستارىما قولدان كەلگەنشە كومەك كورسەتىپ كەلەمىن، - دەپ اعىنان جارىلدى دارحان نۇرماعامبەت.
ايتا كەتەيىك، جەرلەسىمىز امەريكاعا كوشىپ كەلگەن جىلى شۆەيساريالىق كومپانيادا ەڭبەك ەتىپتى. كەيىننەن اقش-تىڭ اەروناۆتيكا مەن عارىش كەڭىستىگىن زەرتتەۋ ۇلتتىق باسقارماسىنا جۇمىسقا ورنالاسىپ، قاناتقاقتى جوبالاردى ازىرلەۋمەن اينالىسقان. ال جۇبايى اياۋلىم بولسا، «وراكل» كومپانياسىنىڭ ديرەكتورى قىزمەتىن اتقارىپتى. الايدا، ۋاقىت وتە كەلە دارحاننىڭ جۇبايى بۇل جۇمىسىن تاستاپ، ونەر سالاسىنا بەت بۇرعان. وسىلايشا، «بالاۋسا» حورىن قۇرىپ، اقش-تاعى تانىمال مۋزىكالىق ۇجىمنىڭ بىرىنە اينالعان.
– امەريكادا جۇمىسقا ورنالاسۋ ەش قيىندىق تۋدىرعان جوق. ويتكەنى، ٴبىزدىڭ ەلىمىزدە بەرىلەتىن ٴبىلىم بۇل جاقتا جوعارى باعالانادى. ەندى ەكى بالام دا وسى عارىش سالاسىنا بەت بۇرسا دەگەن ويىم بار، - دەيدى دارحان نۇرماعامبەت.
بۇگىندە جەرلەسىمىز عارىش ستانسالارىنداعى اۆتوماتتاندىرۋ تەحنولوگيالارىن جەتىلدىرۋ جۇمىستارىمەن اينالىسۋدا. بۇدان بولەك ول شەتەل اسىپ كەتكەن قازاق بالالارىنىڭ باسىن ٴجيى قوسىپ، ولارعا قازاق حالقىنىڭ ۇلتتىق قۇندىلىقتارىن ۇيرەتەدى.
– شەتتە جۇرگەن قازاق بالالارى تۋعان جەرى تۋرالى بارلىق اقپاراتتى ٴبىلۋى ٴتيىس. بۇل – ٴبىزدىڭ، ياعني، اعا بۋىننىڭ باستى پارىزى، - دەيدى دارحان نۇرماعامبەت.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
17084
0