ٴقازاقتىلدى سايتتاردىڭ كونتەنت ماسەلەسى تالقىلاندى

فوتو: Нұржас Жақсыбай

استانا، baq.kz. استانادا جۋرناليستەر مەن بلوگەرلەردىڭ قاتىسۋىمەن "قازاق تىلىندە ٴتۇرلى اۋديتورياعا لايىقتالعان ساپالى كونتەنتتىڭ جاسالۋى جانە ماسەلەلەرى" اتتى دوڭگەلەك ۇستەل ٴوتتى.

وندا قازىرگى قازاق ٴتىلدى سايتتاردىڭ ماسەلەلسى، كونتەنت جاساۋ، قازاق ٴتىلىن قولدانۋ، وقىرمانعا تانىمدىق ماقالالاردى قالاي ٴوتىمدى ەتىپ بەرۋ تۋرالى ٴسوز بولدى.

«باق سالاسىن «ٴداستۇرلى» دەپ، «جاڭا مەديا» دەپ ٴبولىپ جۇرگەنىمىزگە 10 جىلدان استام ۋاقىت بولعان شىعار. سونىڭ اراسىندا ينتەرنەتتىڭ ٴوزى ٴداستۇرلى بولىپ ۇلگەردى. ەندى سول ينتەرنەتتەگى ٴقازاقتىلدى كونتەنتتىڭ ساپاسى قانداي؟ جالپى، «ساپا» ۇعىمى كوپتەگەن قۇرامداس بولىكتەردەن تۇراتىن تۇسىنىك قوي. ەندەشە ٴبىز بۇگىنگى دوڭگەلەك ۇستەل تاقىرىبىنىڭ اياسىندا ٴقازاقتىلدى كونتەنتتىڭ ەملە ساپاسىنا توقتالساق. سونىمەن، كونتەنت جاساۋشىلار تاكتيكالىق الاڭدا قانداي پروبلەمالارعا ۇشىراسىپ ٴجۇر؟ بۇگىن وسى ساۋالدارعا جاۋاپ ىزدەدىك» - دەيدى «ساۋات بيۋللەتەنى» تاقىرىبىندا بايانداما جاساعان baq.kz اا باس رەداكتورى ەرلان وسپان.

ونىڭ سوزىنە قاراعاندا قازىرگى ٴقازاقتىلدى رەداكسيالاردا سوزدىكتەر جوق نەمەسە ماردىمسىز.

«كوبىنە ەنتۋزياستاردان نەمەسە جوبا ٴۇشىن جينالعان توپتان تۇراتىن رەداكسيالاردا كونتەنتتەگى ەڭ بولماسا ورفوگرافيالىق ساۋاتتى جۇيەلەۋ تۋرالى ماسەلە قويىلمايدى دا. كەزىندە توپتاپ، ۇستى-ۇستىنە اۋدارىلعان تەرميندەردى وقىرماننىڭ دا، تىڭدارمان مەن كورەرمەننىڭ دە كوڭىلىنەن شىقتى دەپ ايتا المايمىز. تەرميندەردىڭ كەيبىرەۋلەرى انايى قالجىڭعا اينالىپ تا ۇلگەردى. سوزدىكتەردەگى ەكىۇدايلىق، قازاقشا بالامانىڭ ٴتۇپنۇسقاداعىداي - ارەكەت پەن زاتتىڭ فيزيكالىق مازمۇنىن اشا الماۋى كۇندەلىكتى كورىنىس» - دەيدى ول.

جيىن بارىسىندا امانگەلدى قۇرمەت، بەللا ورىنبەت، ارشات وراز، الماس توقابايەۆ، جاناسىل بولاتبەك قاتارلى جۋرناليست-بلوگەرلەر ٴوز ويىن ورتاعا سالدى.

«استانا قالاسىنىڭ تىلدەردى دامىتۋ جانە مۇراعات ٴىسى باسقارماسى» ٴمم-نىڭ ۇيىمداستىرۋىمەن وتكەن جيىندا باسقارما باسشىسى تىلەۋعالي قىشقاشبايەۆ الداعى ۋاقىتتا دا جۋرناليستەرمەن بىرلەسە جۇمىس ىستەگىسى كەلەتىندىگىن ايتتى.

«ٴبىز ٴارقاشان وزدەرىڭىز سەكىلدى جۋرناليستەرمەن ەتەنە جۇمىس ىستەۋگە دايىنبىز. قانداي دا ٴبىر ۇسىنىستار، تالاپ-تىلەكتەر، جوبالار بولسا الىپ كەلىڭىزدەر، قولداۋعا ٴازىرمىز» - دەدى ول.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!