استانا: 
بقو، baq.kz. 2018 جىلعى 12 قاراشادا اقجايىق وڭىرىندە باستاۋ العان «قازىرگى زامان قاھارمانى» اتتى iv رەسپۋبليكالىق اكسيا اياسىندا بىرنەشە تاعىلىمى مەن تاربيەلىك ٴمانى زور ٴىس-شارالار ۇيىمداستىرىلىپ، جوعارى دەڭگەيدە ٴوتتى.
رەسپۋبليكامىزدىڭ وزگە وڭىرلەرىنەن كەلگەن پوليسيا قىزمەتكەرلەرى باتىس قازاقستان وبلىسىنا قاراستى زەلەنوۆ، تەرەكتى مەن اقجايىق، ٴبورلى جانە سىرىم اۋداندارىن ارالاپ، ٴدۇيىم جۇرتشىلىقپەن كەزدەستى. اۋدانداردىڭ تاريحي ورىندارىن ارالاپ، مۋزەي تولى جادىگەرلەردى تاماشالاۋعا كەلەلى مۇمكىندىك تۋدى. پاتريوتتىق تاقىرىپتاردا جالپى ٴبىلىم بەرەتىن مەكتەپ وقۋشىلارىمەن كەزدەسۋلەر وتكىزىلىپ، جاس جەتكىنشەكتەر باتىر اعالارىمەن ەستەلىككە سۋرەتكە ٴتۇستى.
وسىناۋ رەسپۋبليكا دەڭگەيىندەگى اكسيانىڭ بەسىنشى كۇنىندە، ياعني 16 قاراشادا ٴداستۇر بويىنشا اكسيا قاتىسۋشىلارى جەڭىس الاڭىنداعى «ماڭگى الاۋعا» بارىپ، تاعزىم ەتىپ، ەسكەرتكىش تاقتاعا گۇل شوقتارىن قويدى.
ودان كەيىن ورال قالاسىنداعى حاديشا بوكەەۆا اتىنداعى وبلىستىق قازاق دراما تەاترىندا الماتى قالاسى پوليسيا دەپارتامەنتىنىڭ ٴانسامبلى شىعارماشىلىق ۇجىمى ٴوز ونەرلەرىن پاش ەتىپ، اقجايىق جۇرتشىلىعىنىڭ كوڭىلىن دومبىرا شاناعىنان توگىلگەن كۇيمەن اسىرەلەپ، تامىلجىتا اۋەلەگەن اندەرىن سىيلادى. پوليسيا قىزمەتكەرلەرىنەن جاساقتالعان الماتىلىق ٴانسامبلدىڭ كونسەرتىن تاماشالاۋعا وبلىستىق جانە قالالىق اكىمدىكتىڭ باسشىلارى، وبلىستىق، قالالىق پوليسيا دەپارتامەنتىنىڭ باسشى قۇرامى، ەرلىك جاساۋدا قازا تاپقان ٴتارتىپ ساقشىلارىنىڭ وتباسى مۇشەلەرى، پوليسيا ارداگەرلەرى، جەرگىلىكتى ٴتارتىپ ساقشىلارىنىڭ ونەر سۇيەر ۇل-قىزدارى جانە ستۋدەنتتەر قاۋىمى كوپتەپ جينالدى. بەيبىت زاماندا ەرلىك جاساعان پوليسيا قىزمەتكەرلەرىن قۇرمەتتەۋ ماقساتىندا ۇيىمداستىرىلعان ادەمى جيىننىڭ بارىسىندا ەل قامى ٴۇشىن ايانباي وتقا تۇسكەن جاڭا عاسىر باتىرلارى – 15 ٴتارتىپ ساقشىسى ساحنا تورىنە سالتاناتتى تۇردە شاقىرىلدى. ٴارقايسىسىنىڭ وجەتتىلىككە تولى ەرلىكتەرى باياندالعان شاعىن بەينەروليك زال تولى كورەرمەندەر نازارىنا ۇسىنىلدى.
اتالعان پوليسيا قىزمەتكەرلەرى ازاماتتاردى قىلمىستىق قاۋىپ-قاتەردەن قورعاۋدا وزدەرىنىڭ قىزمەتتەرىن اتقارىپ ٴجۇرىپ، ەرلىك تانىتا بىلگەن، سونداي-اق ٴتۇرلى اۋا رايىنىڭ قولايسىزدىعىنان، ورتتەن، سۋدان، قىلمىسكەردىڭ قولىنان، ت.ب. جاعدايلاردا زارداپ شەككەن ادامداردى قۇتقارعان.
سالتاناتتى ٴىس-شارا بارىسىندا قازاقستان رەسپۋبليكاسى ىشكى ىستەر مينيسترلىگى كادر جۇمىسى دەپارتامەنتىنىڭ باسقارما باستىعى پوليسيا پولكوۆنيگى جاكۋپبەكوۆ مۇرات قوڭىرجان ۇلى قۇتتىقتاۋ ٴسوز سويلەپ، ولارعا قازاقستان رەسپۋبليكاسى ىشكى ىستەر ٴمينيسترى پوليسيا گەنەرال-پولكوۆنيگى قاسىموۆ قالمۇحانبەت نۇرمۇحانبەت ۇلىنىڭ العىس حاتىن جانە «قازىرگى زامان قاھارمانى» حرۋستال ٴمۇسىنىن تابىستادى.
سونىمەن قاتار ٴىس-شارانى اقجايىق وڭىرىندە ۇيىمداستىرۋعا اتسالىسقانى ٴارى ىشكى ىستەر ورگاندارى قىزمەتىنىڭ تيىمدىلىگىن ارتتىرۋعا باعىتتالعان ٴىس-شارالار كەشەنىن ىسكە اسىرۋ بويىنشا مىندەتتەردى شەشۋدە زور
ۇلەس قوسقانى ٴۇشىن باتىس قازاقستان وبلىسىنىڭ اكىمى كولگىنوۆ التاي سەيدىر ۇلى ىشكى ىستەر ٴمينيسترىنىڭ قۇرمەت گراموتاسىمەن ماراپاتتالدى.
ىشكى ىستەر ورگاندارىنىڭ قىزمەتىن تۇرعىن حالىققا جەتكىزۋ بويىنشا ٴوزارا ىنتىماقتاستىقتا قىزمەت ەتىپ، اقپاراتتىق قولداۋ بىلدىرگەنى ٴۇشىن «جايىق پرەسس» جشس باس ديرەكتورىنىڭ ورىنباسارى ٴارى «قازاقپارات» اقپاراتتىق اگەنتتىگىنىڭ ٴتىلشىسى سەيتاق عايساعالي ساميعوللا ۇلىنا ىشكى ىستەر ٴمينيسترىنىڭ العىس حاتى تابىس ەتىلدى.
سونداي-اق وبلىستىق پوليسيا دەپارتامەنتىنىڭ باستىعى پوليسيا گەنەرال-مايورى ابلازيموۆ ماحسۋدحان نۇعمان ۇلىنىڭ اتىنان اكسياعا قاتىسۋشىلاردىڭ ٴارقايسىسىنا العىس حات بەرىلىپ، «قازىرگى زامان قاھارمانى» اتتى ارنايى ٴتوس بەلگىسى تاعىلدى. بۇل رەتتە وسى ٴتوس بەلگىنىڭ «قازىرگى زامان قاھارمانى» اكسياسىنىڭ 6 جىلدىق تاريحىنداعى ەڭ العاش قولدانىسقا ەنگىزىلگەن تۋىندى ەكەنىن اتاپ وتكەن ٴجون. اتالعان ٴتوس بەلگى وبلىستىق پوليسيا دەپارتامەنتى باسشىلىعىنىڭ باستاماسىمەن ارنايى ازىرلەندى.
ەرلىك ەتىپ، ەلى ٴۇشىن قىزمەت كورسەتىپ، قازا تاپقان قىزمەتكەرلەردىڭ وتباسى پوليسيانىڭ نازارىنان ەش ۋاقىتتا تىس قالعان ەمەس. وسى اكسيا بارىسىندا ورال وڭىرىندەگى ەرلىگىمەن جادىمىزدا ماڭگى ساقتالعان ارىپتەستەرىمىزدىڭ وتباسى مۇشەلەرى، ٴبىرىنىڭ اناسى، ەندى ٴبىرىنىڭ جۇبايى شاقىرىلىپ، قۇرمەت ٴبىلدىرىلدى.
بۇدان ٴارى رۋحاني قۇندىلىقتاردى قادىرلەي بىلەتىن زيالى كورەرمەندەر نازارىنا الماتى قالاسىنىڭ پوليسيا دەپارتامەنتى ٴانسامبلىنىڭ كونسەرتتىك باعدارلاماسى ۇسىنىلىپ، ۇرمەلى اسپاپتار ٴۇنى مەن جاندى داۋىستاعى انشىلەردىڭ اۋەلەگەن ٴانىن كورەرمەندەر اسا ۇيىپ تىڭدادى. وركەستر ورىنداعان «سايراش» كومپوزيسياسى مەن ٴانسامبلدىڭ ٴانشىسى، حالىقارالىق كونكۋرستاردىڭ لاۋرەاتى گۇلنيزا جۇماجانوۆا ورىنداعان «ەركەم-اي»، ٴانسامبلدىڭ ٴانشىسى حالىقارالىق «شابىت» فەستيۆالىنىڭ لاۋرەاتى جانگەلدى جومارتوۆ ورىنداعان ساكەن سەيفۋلليننىڭ «تاۋ ىشىندە» انىنە كورەرمەن دۋىلداتا قول سوقتى. كۇمىس كومەي، جەز تاڭداي ايگىلى ٴانشى، كومپوزيتور ەسكەندىر حاسانعاليۆتىڭ «اينالدىم ەلىم» ٴانىن ورىنداعان حالىقارالىق كونكۋرستاردىڭ لاۋرەاتى جۇلدىز وسكەمبايەۆانىڭ داۋىسى تەاتر ساحناسىندا قالىقتادى. انسامبل مۇشەلەرى الديار ەرعاليدىڭ ورىنداۋىنداعى «سينيايا ۆەچنوست»، گۇلناز جۇماجانوۆانىڭ ورىنداعان «ارداگەرلەرىم» اندەرىنە دە ونەر سۇيەر اقجايىقتىق كورەرمەندەر قول سوعىپ، الماتىلىق ونەرپازداردىڭ قۇشاقتارى گۇلگە تولدى.
شارانىڭ سوڭىندا دەپارتامەنت باسشىلىعى اكسيا قوناقتارىنا العىسىن ٴبىلدىرىپ، 5 كۇن بويى وتكەن اكسيا بارىسىندا ونەرىمەن جايىق جۇرتىن ٴتانتى ەتكەن الماتى قالالىق پوليسيا دەپارتامەنتىنىڭ انسامبلىنە كونسەرت سوڭىندا پوليسيا دەپارتامەنتىنىڭ باستىعى پوليسيا گەنەرال-مايورى ابلازيموۆ ماحسۋدحان نۇعمان ۇلىنىڭ اتىنان العىسحات پەن ىقىلاس گۇلىن تابىس ەتتى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1875 
0
17087
0