اتىراۋدا 1st grand ball atyrau قايىرىمدىلىق بالى ٴوتتى

استانا، baq.kz. قايىرىمدىلىق كەشىنەن تۇسكەن 2 ميلليون تەڭگەگە جۋىق قاراجات «اتىراۋ. مالەنكايا سترانا» قوعامدىق بىرلەستىگىنە تابىستالدى. بۇل تۋرالى اتىراۋ وبلىسىنىڭ وڭىرلىك كوممۋنيكاسيالار قىزمەتى حابارلادى.

تۇڭعىش رەت اتىراۋ قالاسىندا جاستار ساياساتى ماسەلەلەرى باسقارماسىنىڭ قولداۋىمەن، «جاستار تاڭداۋى – اتىراۋ» قب ۇيىمداستىرۋىمەن قايىرىمدىلىق بالى جوعارعى دەڭگەيدە ٴوتتى.

"ەلباسىمىزدىڭ رۋحاني جاڭعىرۋ باعدارلاماسى اياسىندا ۇيىمداستىرىلعان وسىناۋ شارانىڭ نەگىزگى ماقساتى - اتىراۋ جاستارىنىڭ مادەنيەتكە دەگەن، ونەرگە دەگەن قۇلشىنىسىن ارتتىرۋ بولسا، ەكىنشى ماقساتى - جاقسىلىق جاساۋ ارقىلى جاقسىلىق جاساعان ادام مەن مۇقتاج ادامداردىڭ جۇرەكتەرىنە جاقسىلىق جىلۋىن ۇيالاتۋ. بارلىقتارىڭىزدىڭ ٴبىراۋىزدان قولداپ كەلگەندەرىڭىز ٴۇشىن العىس بىلدىرەمىز"، - دەدى وبلىستىق جاستار ماسەلەلەرى باسقارماسىنىڭ باسشىسى روللان قۇسپان.

1st grand ball atyrau قايىرىمدىلىق بالىنا قاتىسقان 18-29 ارالىعىنداعى 150 جاس دەبيۋتانت ٴبىر اي كولەمىندە پولونەز، كادريل، پولكا، كازاق ٴۆالسى بيلەرىن ۇيرەنىپ، بالدا ٴوز ونەرلەرىن كورسەتتى.

سونداي–اق، بالل دەبيۋتانتتارى جانە ەسترادا جۇلدىزدارى ٴبىرقاتار قايىرىمدىلىق شارانى جۇزەگە اسىردى. اتاپ ايتساق، «شاڭىراق» بالالار ٴۇيى جانە قارتتار ۇيىندە كونسەرتتىك باعدارلامالارىن ۇسىنىپ، «جۇرەكتەن جۇرەككە» قايىرىمدىلىق اكسياسى اياسىندا 100 وتباسىعا كومەك كورسەتتى.

ۇيىمداستىرۋشىلار قايىرىمدىلىق گراند بالىنان جينالعان 2 ميلليونعا جۋىق قاراجاتتى تولىقتاي ەرلان كۇمىسقاليەۆتىڭ «اتىراۋ. مالەنكايا سترانا» قوعامدىق بىرلەستىگىنە تابىستادى.

"ٴبىزدىڭ ماقساتىمىز - شاعىن مەملەكەتىمىزدەگى بالالارىمىزدى ۇلكەن مەملەكەتكە جەتكىزۋ. بالدان تۇسكەن قاراجاتتى الەمدەگى ٴۇشىنشى ەرەكشە بالالارعا ارنالعان قالاشىق اشۋعا جۇمساماقپىن. مۇنداي قالاشىق ۇلىبريتانيا جانە رەسەي مەملەكەتتەرىندە بار. ٴۇشىنشىسىن، قازاقستانىمىزدا، اتىراۋ قالاسىندا كەلەر جىلى كوكتەمدە اشۋ جوسپارلانۋدا. شارانى ۇيىمداستىرعان الپامىس شاريموۆ باستاعان ۇجىمعا، سونداي-اق وسى شاراعا ات سالىسىپ، ونەرلەرىن كورسەتىپ، قايىرىمدىلىق جاساعان بارشا جانعا العىسىم شەكسىز"، - دەيدى قوعامدىق قور جەتەكشىسى ەرلان كۇمىسقاليەۆ.

ايتا كەتەيىك، دەبيۋتانتار اراسىندا كەشتىڭ حانزاداسى مەن حانشايىمى انىقتالىپ، ولار استانادا وتەتىن رەسپۋبليكالىق viii گراند بالعا جولداما الدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!