استانانى گازداندىرۋ: كوگىلدىر وتىن قاي مەرزىمدە پايدا بولادى

فوتو: Аstana.gov.kz

استانا، baq.kz. استانا اكىمدىگىندە 2018-2020 جىلدارعا ارنالعان استانا قالاسىنىڭ قورشاعان ورتاسىن ساۋىقتىرۋ، گازداندىرۋ جانە قالا حالقىن كومىرمەن قامتاماسىز ەتۋ بويىنشا كەشەندى شارالار جوسپارىن ىسكە اسىرۋ ماسەلەسى بويىنشا بريفينگ ٴوتتى. بۇل تۋرالى استانا قالالىق اكىمدىگىنىڭ رەسمي سايتى جازدى.

وسى جىلى قالالىق اكىمدىك 8 نەگىزگى كومپانيا-ىسكە اسىرۋشىلارمەن كومىردىڭ ٴار تۇرىنە باعانى بەكىتۋ شەڭبەرىندە مەموراندۋمعا قول قويدى. ايتالىق، «شۇباركول» كومىر ماركاسىنىڭ باعاسى – 13 600 تەڭگە، «قاراجىرا» كومىر ماركاسى – 14 000 تەڭگە، «مايكوبە» - 12 500 تەڭگە، «بوگاتىر كومىر» - 9500 تەڭگە، «كۋزنەسكيي» - 12500 تەڭگەنى قۇرايدى. قالادا كومىردىڭ جالپى قورى 10 255 توننانى قۇرايدى.

«بيىل كومىر جەتكىزۋ وتكەن جىلمەن سالىستىرعاندا ەكى ەسەگە كوبەيگەن. كومىر جەتكىزۋ ماسەلەسى تۇراقتى، وتكەن جىلمەن سالىستىرعاندا ايقاي-شۋ جوق. قاتتى وتىننىڭ بارى جانە قانداي ورىنداردا قانشا مولشەردە ساتىلىپ جاتقانى جونىندە قوڭىراۋ شالىپ بىلۋگە بولاتىن 109 سەنىم تەلەفونى بار»، - دەدى وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ وتىن-ەنەرگەتيكا رەسۋرستارى ٴبولىمىنىڭ جەتەكشىسى ماقسات ەسماعۇلوۆ.

ونىڭ ايتۋىنشا تامىزدان بۇگىنگە دەيىن استاناعا 180 مىڭ توننا كومىر جەتكىزىلدى. جالپى، ەنەرگيا كوزدەرىن قوسپاعاندا بارلىق جىلۋ ماۋسىمى كەزەڭىنە 400 مىڭ توننا كومىر قاجەت.

سونداي-اق ول مەملەكەت باسشىسىنىڭ 5 الەۋمەتتىك باستاماسىن ىسكە اسىرۋ بويىنشا استانادا مەملەكەتتىك تاجىريبە جۇرگىزۋگە ارنالعان «استانا قالاسىن گازداندىرۋ» تەحنيكالىق-ەكونوميكالىق نەگىزدەمەسى (تەن) دايىندالعانىن ايتتى. ول ازىرلەنىپ، «مەمساراپتاما» رەسپۋبليكالىق مەملەكەتتىك كاسىپورنىنا جىبەرىلدى. تەن بولجالدى مەرزىمى – 2018 جىلدىڭ قاراشاسى. سونىمەن قاتار ٴبىر مەزەتتە تاراتۋ جەلى قۇرىلىسىن دا جوبالاۋ باستالدى.

«تەن-گە سايكەس استانا قالاسىنداعى گازتاراتۋ جەلىسىنىڭ قۇرىلىسى ٴۇش كەزەككە ٴبولىندى. ٴبىرىنشى كەزەكتەگى جوبالاۋ اياقتالدى. تەن-نىڭ قورىتىندىسىن الساق الدىمەن ساراپتاماعا كىرىسەمىز. ىسكە قوسۋ كەشەنىن ٴبىز جەو-مەن بىرگە جۇرگىزۋدى جوسپارلاپ وتىرمىز. ەڭ ٴبىرىنشى كەزەكتە كوكتال 1 جانە كوكتال 2 اۋداندارىن گازداندىرامىز»، - دەدى سپيكەر.

2021 جىلدان كەيىن قۇرىلىستىڭ ەكىنشى كەزەگىن ىسكە اسىرۋ باستالادى جانە ميچۋرين، ينتەرناسيونالنىي، تەلمان، garden village جانە family village كەنتتەرىنە گاز كىرگىزۋ جوسپارلانىپ وتىر. ال ٴۇشىنشى كەزەكتىڭ شەڭبەرىندە يلينكا، شۇبار مولتەكاۋدانى مەن ٴوندىرىس تۇرعىن الابىن گازداندىرۋ جوسپارلانۋدا.

استانا قورشاعان ورتانى قورعاۋ جانە تابيعاتتى پايدالانۋ باسقارماسى باسشىسىنىڭ ورىنباسارى مىندەتىن ۋاقىتشا اتقارۋشى ٴابدىماناپ جۇمادىلدايەۆ گاز ەنگىزۋ قالا ەكولوگياسىن ايتارلىقتاي جاقسارتىپ، كوك تۇتىننەن ساقتايتىنىن ايتا كەتتى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!