استانا اۋەجايىندا ەسىرتكى الىپ وتپەك بولعان رەسەي ازاماتى ۇستالدى

استانا، baq.kz. كولىك پوليسەيلەرى استانا حالىقارالىق اۋەجايىندا ەسىرتكى زاتىنىڭ كونترابانداسى ٴۇشىن رەسەي فەدەراسياسىنىڭ ازاماتىن ۇستادى.

«كولىكتەگى ٴىىد-نىڭ قىزمەتكەرلەرىمەن جەدەل-پروفيلاكتيكالىق ٴىس-شارالارىن جۇرگىزۋ بارىسىندا استانا قالاسىنىڭ حالىقارالىق اۋەجايىندا «استانا-ماسكەۋ» باعىتىنداعى اۋە رەيسىمەن ۇشپاق بولعان 52 جاستاعى رەسەي فەدەراسياسىنىڭ ازاماتى ۇستالىنىپ، ودان جالپى سالماعى 17،308 گرامم «كەپتىرىلگەن ماريحۋانا» ەسىرتكى زاتى تاركىلەنىپ الىندى جانە بۇل ەسىرتكى زاتىن قازاقستان رەسپۋبليكاسىنىڭ مەملەكەتتىك شەكاراسىنان زاڭسىز الىپ وتپەك بولعان»، - دەلىنگەن كولىكتەگى ٴىىد-نىڭ ٴباسپاسوز قىزمەتى تاراتقان حابارلامادا.

اتالعان فاكتى قك-تىڭ 286-بابى 1-تارماعىمەن (اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى) سوتقا دەيىنگى تەرگەپ-تەكسەرۋ ٴبىرىڭعاي تىزىلىمىنە تىركەلىندى.

تەرگەۋ امالدارى جۇرگىزىلۋدە.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!