ادىلەت مينيسترلىگى مەن جوعارعى سوت جاڭا جوبا جاساپ جاتىر

استانا، baq.kz ٴتىلشىسى. بۇگىن گەرمانيا حالىقارالىق ىنتىماقتاستىق جونىندەگى قوعامى (giz) قازاقستان رەسپۋبليكاسىنىڭ ادىلەت مينيسترلىگى جانە قازاقستان رەسپۋبليكاسىنىڭ زاڭناما ينستيتۋتىمەن بىرلەسە وتىرىپ، قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ قولاۋىمەن «نازاربايەۆ ورتالىعىندا» «اكىمشىلىك قۇقىقتا اتقارۋشىلىق ٴىس جۇرگىزۋ» ٴىح حالىقارالىق عىلىمي-پراكتيكالىق كونفەرەنسياسىن وتكىزدى.

كونفەرەنسيانى سالتاناتتى تۇردە اقشان ٴgiz-دىڭ قازاقستانداعى، وزبەكستانداعى جانە تۇرىكمەنستانداعى وكىلدىگىنىڭ باسشىسى، بەرلين قالاسى اكىمشىلىك سوتىنىڭ سۋدياسى يورگ پۋدەلكا ٴىس-شارانىڭ باستى ماقساتى – قازاقستان رەسپۋبليكاسى مەن شەت ەلدەردە اكىمشىلىك قۇقىقتا اتقارۋشىلىق ٴىس جۇرگىزۋدىڭ وزەكتى ماسەلەلەرىن جان-جاقتى تالقىلاۋ ەكەنىن ايتتى.

«بۇگىنگى كونفەرەنسيا بارىسىندا كوتەرىلەتىن ماسەلە وتە وزەكتى. كونفەرەنسيا جۇمىسىنا وتاندىق وكىلدەردەن باسقا گەرمانيا، ليۋكسەمبۋرگ، شۆەيساريا، ەستونيا، لاتۆيا، گرەكيا، ازەربايجان، ارمەنيا، ۋكراينا، قىرعىزستان، وزبەكستان، تاجىكستان، تۇرىكمەنستان جانە رەسەي سياقتى الىس-جاقىن شەت ەلدەردەن 150-دەن استام ادام قاتىسادى. بۇل كونفەرەنسياعا العاش قاتىسىپ وتىرعان وكىلدەر دە بار. اكىمشىلىك قۇقىقتا اتقارۋشىلىق ٴىس جۇرگىزۋ بويىنشا جاقسى تاجىريبە الماسامىز دەپ ويلايمىن»، - دەدى ول.

كونفەرەنسيادا قر ادىلەت ٴمينيسترى مارات بەكەتايەۆ قۇتتىقتاۋ ٴسوزىن سويلەدى.

«بۇل كونفەرەنسياعا شەتەلدىك ساراپشىلار، قر پارلامەنت دەپۋتاتتارى، مەمەلكەتتىك ورگاندار مەن مەملەكەتتىك ەمەس ۇيىمداردىڭ وكىلدەرى قاتىسىپ وتىر. بۇگىن جانە ەرتەڭ ۇلتتىق قۇقىقتىڭ ماڭىزدى سالالارىنىڭ ٴبىرى – اتقارۋشىلىق ٴىس جۇرگىزۋدى اكىمشىلىك قۇقىققا ەنگىزۋ ماسەلەسىن تالقىلايتىن بولامىز. كوپتەگەن ەۋروپا مەملەكەتتەرىندە اكىمشىلىك ادىلەت قالىپتاسىپ قويعان ينستيتۋت بولىپ سانالادى. قازاقستان بىرنەشە جىل بويى اكىمشىلىك ادىلەتتىڭ وڭتايلى ۇلگىسىن ىزدەۋ بويىنشا جۇمىس جۇرگىزىپ كەلەدى. قازىرگى ۋاقىتتا ادىلەت مينيسترلىگى جوعارعى سوتپەن بىرلەسىپ، اكىمشىلىك راسىمدىك-پروسەستىك كودەكس جوباسىن جاساپ جاتىر. بۇل قازاقستانداعى قۇقىق قورعاۋ جۇيەسىندەگى جاڭا قۇجات. ونىڭ ماقساتى – مەملەكەتتىك ورگاندارمەن داۋ-داماي تۋعان جاعدايدا قازاقستان ازاماتتارىنىڭ قۇقىعىن قورعاۋ، ەكى تاراپتىڭ دا مۇددەسىندە بالانس ساقتاۋ»، - دەيدى ادىلەت ٴمينيسترى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!