BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اۋەزوۆ مۋزەيىنە الاش زيالىلارىنىڭ ٴمۇسىنى قويىلدى

سەمەيدە «الاش» پارتياسى، الاشوردا ۇكىمەتى قۇرىلعانىنىڭ 100 جىلدىق مەرەيتويىنا وراي «الاش ارىستارى – م.اۋەزوۆ» مۇراجايىنىڭ جاڭا ەكسپوزيسياسى اشىلدى. ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىنىڭ ٴبولىمى رەتىندە 1997 جىلى تاريحي عيماراتتا اشىلعان بۇل مۇراجايدىڭ ۇلتىمىز ٴۇشىن وزىندىك ۇلكەن تاريحي ماڭىزى بار، دەپ حابارلايدى baq.kz اقپارات اگەنتتىگى مۋزەيدىڭ ٴباسپاسوز قىزمەتىنە سىلتەمە جاساپ.

بىلتىرعى جىلدىڭ باسىندا عيماراتقا اعىمداعى جوندەۋ جۇمىستارى جۇرگىزىلگەننەن كەيىن مۋزەي زالدارىندا رەەكسپوزيسيا جۇمىستارى جاسالدى. جاڭا ەكسپوزيسيانىڭ تۇجىرىمداماسىن دايىنداۋعا بەلگىلى الاشتانۋشى عالىمدار ۇعا اكادەميگى ديحان قامزابەك ۇلى جانە سۇلتانحان اققۇل ۇلى كومەكتەسكەن. وسى تۇجىرىمدامانىڭ نەگىزىندە تاقىرىپتىق-ەكپوزيسيسيالىق جوسپار دايىندالدى. جاڭا ەكسپوزيسيادا الاش قوزعالىسى تاريحىنىڭ 6 كەزەڭى تىڭ قۇجاتتار مەن دەرەكتەر نەگىزىندە وزگەشە قىرىنان كورسەتىلدى. مۋزەي ەكسپوزيسياسى كەڭەيىپ، عيماراتتىڭ بۇرىن بوس تۇرعان ٴبىرىنشى قاباتىندا xx عاسىردىڭ باسىنداعى ٴۇي ينتەرەرى جاسالدى.

ەكىنشى قاباتتاعى ەكسپوزيسيا ارنايى تاپسىرىسپەن جاسالعان ٴاليحان بوكەيحان، احمەت بايتۇرسىن ۇلى، ٴمىرجاقىپ دۋلاتوۆ، شاكارىم قۇدايبەردى ۇلى، مۇحتار اۋەزوۆتىڭ مۇسىندەرىمەن تولىقتىرىلدى. ايگىلى بالاۋىز فيگۋرالار سياقتى بۇل مۇسىندەردى جاساۋدا سۋرەتشىلەر زاماناۋي ماتەريالدار – كەراموپلاست جانە شىنى تالشىق قولداندى.

ايتا كەتەيىك، حاكىم اباي كەزىندە بۇل ٴۇيدى جەرلەسى ٴارى شاكىرتى، الاش قوزعالىسىنا بەلسەنە قاتىسۋشىلاردىڭ ٴبىرى ٴانيار مولدابايەۆقا ساتىپ الۋعا كومەك بەرگەن جانە ٴوزى سەمەيگە كەلگەن ساپارلارىندا وسى ۇيگە تۇسەتىن بولعان. ٴانيار مولدابايەۆتىڭ ۇيىندە ۇلى اقىننىڭ بالالارى مەن تۋىستارى، كوكباي جاناتاي ۇلى مەن شاكارىم قۇدايبەردى ۇلى، الاش قايراتكەرلەرىنىڭ دە ٴجيى بولعانى بەلگىلى. بۇل ۇيدە احمەت بايتۇرسىن ۇلى ايەلى بادريسافامەن تۇرعان. سونىمەن قاتار عۇلاما جازۋشى مۇحتار اۋەزوۆ ٴوزىنىڭ مەكەن-جايى رەتىندە وسى ٴۇيدى قۇجاتتا كورسەتكەن.

1944-1967 جىلدارى بۇل عيماراتتا اباي مۋزەيى ورنالاستى. كەيىن بالالار كىتاپحاناسى جۇمىس ىستەدى.

ۇلى اباي ومىرىنە تىكەلەي قاتىستى تاريحي ورىن رەتىندە 1990 جىلى عيمارات ۇلى اقىن مۋزەيىنىڭ تەڭگەرىمىنە بەرىلىپ، ابايدىڭ 150 جىلدىق مەرەيتويى قارساڭىندا 1992-1995 جىلدارى ارالىعىندا مۋزەيدىڭ ۋاقىتشا ەكسپوزيسياسى قونىس تەپتى. 1997 جىلى بۇل عيماراتتا تاۋەلسىز قازاقستاننىڭ تاريحىنداعى الاش تاريحىنا ارنالعان تۇڭعىش مۋزەي «الاش ارىستارى – مۇحتار اۋەزوۆ» مۇراجايى اشىلىپ، حالىققا قىزمەت كورسەتىپ كەلەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي