BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

اكە كورگەن وق جونار

«سانالى دا ەرىكتى ەڭبەك قانا ادامدى باقىتقا كەنەلتەدى...»

ك.د.ۋشينسكيي

بۇگىندە نۇرلان سەرىكحان ۇلى بازاربايەۆتىڭ تەمىرجول سالاسىندا قىزمەت ەتىپ جۇرگەنىنە 40 جىلدان اسقان. ەرەن ازاماتتىڭ ٴومىر جولىن – تاڭداعان جولعا ادالدىقتىڭ، تۋعان جەرگە قىزمەت ەتۋدىڭ ۇلگىسى دەۋگە بولادى. ونەگەلى وتباسىنىڭ وركەنيەتتى مەملەكەت، ەڭسەلى ەل بولۋ جولىندا اتقارعان كوپ جىلعى ەڭبەكتەرى باعالانىپ، كەشە عانا بازاربايەۆتار اۋلەتى «ەڭبەك ادامى» رەسپۋبليكالىق بايقاۋىنىڭ «ۇزدىك ەڭبەك ديناستياسى» اتالىمى بويىنشا جەڭىمپاز اتانعان ەدى.

اكە جولىن قۋعان تەمىرجولشىلار اۋلەتىنىڭ ەڭبەك ٴوتىلى سوناۋ 1933 جىلدان باستاۋ الادى. تۇركىستان-سىبىر تەمىرجولىنىڭ قۇرىلىسى اياقتالعان سوڭ، اعايىندى تولەۋحان، سەرىكحان مەن كەمەلحان بازاربايەۆتار تەمىرجولعا جۇمىسقا ورنالاسادى. شىعىس قازاقستان وبلىسىنىڭ جارما ستانسياسىندا دۇنيەگە كەلگەن نۇرلان اعامىز اكەسىنىڭ باۋىرلارىمەن بىرگە سول ستانسيادا ەڭبەك جولىن باستاعانىن، جۇمىسىنا ۇلكەن جاۋاپكەرشىلىكپەن، ەرەكشە ىنتامەن قارايتىنىن كۇنى بۇگىنگە دەيىن ايتىپ وتىرادى.

ونىڭ تەمىرجول سالاسىنا دەگەن ادالدىعى، قىزمەت بارىسىندا بولعان قىزىققا تولى ەستەلىكتەرى بالالارىنىڭ بويىنداعى وسى سالاعا دەگەن ماحابباتتى وياتىپ، حالقىنىڭ قالاۋلىسى بولعان ارداقتى اكەنىڭ ٴىزىن جالعاۋعا ٴاردايىم جول اشىپ وتىردى.

جۇمىستان كەيىنگى بىرنەشە ساعاتقا سوزىلا سايتىلاتىن اكەلىك اقىل مەن اسەرلى اڭگىمەلەردەن كەيىن اۋلەتتە تەمىرجول سالاسىن تاڭداعاندار سانى جىلدان جىلعا كوبەيىپ كەلە جاتقانىن دا كوزىمىز كورىپ وتىر.

ٴوز سالاسىن دامىتۋدا ولشەۋسىز ۇلەس قوسىپ جۇرگەن، بويىنا قايسارلىق، ازاماتتىق سياقتى تۇلعالىق قاسيەتتەردى سىڭىرە بىلگەن نۇرلان اعامىز كەزىندەگى تەمىرجولشى بولامىن دەگەن بالالىق ارمانىن ارقالاپ، ٴبىلىم الۋ ٴۇشىن تاشكەنت قالاسىنا وقۋعا اتتانعان. تەلەمەحانيكا جانە بايلانىس اۆتوماتيكاسىنداعى ەلەكترشى ينجەنەر ماماندىعى بويىنشا ەڭ الدىمەن تاشكەنت تەحنيكۋمىن، كەيىن سونىڭ ينستيتۋتىن تامامدايدى. سۇيىكتى ماماندىعى بويىنشا العاشقى قادامدارى دا وسى قالادان باستاپ، كەيىن اشحابادتا جالعاسىن تاپقان.

اعانىڭ مونتەردان باستالعان ەڭبەك جولىندا قۇرىلىس، بايلانىس، مەحانيكا، اۆتوماتيكاداعى ٴتۇرلى قىزمەتتەر بولعان ەكەن. ٴومىرىنىڭ 43 جىلىن وسى سالاعا ارناعان ازامات بۇگىندە ەلىمىزدىڭ «قۇرمەتتى تەمىرجولشىسى» توسبەلگىسىنىڭ يەگەرى.

ىسكەرلىك الەۋەتىن تەمىرجول سالاسىنىڭ دامۋىنا ارناعان ٴقادىرلى ازامات ومىردە اداسپاۋعا ٴتيىس ەكى تاڭداۋدان دا سۇرىنبەگەنىن، ومىرلىك سەرىگىن دە وسى سالادا ٴجۇرىپ كەزدەستىرگەنىن بۇگىنگى كۇنى ەرەكشە تولقىنىسپەن، زور ماقتانىشپەن ايتادى.

ارۋ الماتىعا باعىت العان جۇردەك پويىز تابىستىرعان ماحاببات يەلەرى نۇرلان اعامىز بەن گۇلجامال اپايىمىزدىڭ بۇگىندە سەرىك، اسەم، ايدانا ەسىمدى ۇل-قىزدارى بار.

بۇل اۋلەتتەگى تاربيە دە تەمىرجولداعىداي ٴتارتىپ پەن ۇقىپتىلىققا، ادالدىق پەن جاۋاپكەرشىلىككە نەگىزدەلگەن. سودان دا بولار، اكەنىڭ ىزگى جولىن قۇرمەتتەگەن نۇرلان بازاربايەۆتىڭ بالالارى دا وسى سالانى تاڭداپ وتىر.

ۇلى سەرىك اكەلىك ٴداستۇردى بۇزباي تەلەمەحانيكا جانە بايلانىس اۆتوماتيكاسىنىڭ ەلەكترشى ينجەنەر ماماندىعى بويىنشا ٴبىلىم الىپ، ٴقازىر كوكشەتاۋ قالاسىندا باس ينجەنەر بولىپ قىزمەت اتقارادى. قىزى اسەم الماتى قالاسىنداعى تەمىرجول بولىمىندە جەتەكشى ەسەپشى بولىپ جۇمىس ىستەيدى. كەنجە قىزى ايدانانىڭ عانا تاڭداۋى باسقا سالاعا تۇسكەن. ول قر پرەزيدەنتى اكىمشىلىگىندە ديزاينەر رەتىندە جۇمىس جاساۋدا. ال، نۇرلان اعامىز مەن گۇلجامال اپايىمىز كەلەلى عۇمىرلارىن نەمەرەلەرىنىڭ قىزىعىنا ارناعان باقىتتى كۇندەرمەن جالعاۋدا.

ەرتەڭ ٴدال وسى وتباسىلىق ٴداستۇر مەن ابىرويلى ەڭبەك جولىن جالعايتىن كىشكەنتاي تەمىرجولشىلار بۇگىنگى كۇنى ارداقتى اتانىڭ قىزىق پەن شىجىققا تولى اڭگىمەلەرىن اسىعا كۇتەدى ەكەن...


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي