سولتۇستىك قازاقستان وبلىسىنىڭ اكىمى قۇمار اقساقالوۆ ٴ71-شى كانن فەستيۆالىندە «ەڭ ۇزدىك ايەل ٴرولى» نوميناسياسىندا باس جۇلدەنى جەڭىپ العان سامال ەسلياموۆاعا 3 بولمەلى پاتەردىڭ كىلتىن تابىس ەتتى، دەپ حابارلايدى baq.kz ايماقتاعى ٴتىلشىسى.
استانا: 
4240 
0
سولتۇستىك قازاقستان وبلىسىنىڭ اكىمى قۇمار اقساقالوۆ ٴ71-شى كانن فەستيۆالىندە «ەڭ ۇزدىك ايەل ٴرولى» نوميناسياسىندا باس جۇلدەنى جەڭىپ العان سامال ەسلياموۆاعا 3 بولمەلى پاتەردىڭ كىلتىن تابىس ەتتى، دەپ حابارلايدى baq.kz ايماقتاعى ٴتىلشىسى.
فرانسيادا كۇللى الەمدى وزىنە قاراتىپ، شىنايى تالانتىن مويىنداتقان اسىل قىزىن تۋعان ەلى قۇشاق جايا قارسى الدى. جەرلەستەرىمەن كەزدەسۋگە كەلگەن سامال ەسلياموۆانى كوپشىلىك تىك تۇرىپ قارسى الىپ، قول سوعىپ قۇرمەت كورسەتتى. نازىك قىزدىڭ قۇشاعى القىزىل راۋشانعا تولدى.
«قازاق ەلىنىڭ قۋانىشىندا شەك جوق. سامال ەسلياموۆا – كانن فەستيۆالىندە «ەڭ ۇزدىك ايەل ٴرولى» نوميناسياسىندا باس جۇلدەنى جەڭىپ العان تمد كولەمىندەگى العاشقى اكتريسا. الەمدەگى ەڭ تانىمال كينوفەستيۆالعا قاتىسىپ، توپ جارۋ – ۇلكەن جەڭىس. قازاقتىڭ اتىن، مارتەبەسىن، رۋحىن كوتەرگەنى ٴۇشىن سامالعا العىسىم شەكسىز»، - دەدى سولتۇستىك قازاقستان وبلىسىنىڭ اكىمى قۇمار اقساقالوۆ.
قازاق ەلىنىڭ مەرەيىن اسقاقتاتقان سامالدىڭ ەڭبەگى شىنايى باعاسىن الدى. اكتريسانى جەڭىسىمەن قۇتتىقتاعان وبلىس اكىمى قۇمار اقساقالوۆ 3 بولمەلى پاتەردىڭ كىلتىن تابىس ەتتى. وبلىستىق اكىمدىكتە وتكەن كەزدەسۋگە اكتريسانىڭ اتا-اناسى، ۇستازدارى، ونىڭ ٴبىلىم العان پەتروپاۆل ونەر كوللەدجىندەگى وقىتۋشىلارى مەن ستۋدەنتتەر، اۋىلداستارى، قىزىلجار ٴوڭىرىنىڭ مادەنيەت سالاسىنىڭ مايتالماندارى كەلدى.
اكتريسا سولتۇستىك قازاقستان وبلىسىنداعى ارالاعاش اتتى قاراپايىم قازاق اۋىلىنان شىققان. وقۋشى سامالعا العاش قالام ۇستاتىپ، الىپپەنى جاتتاتقان العاشقى ۇستازى زۋحرا ساپاروۆا شاكىرتىنىڭ ٴدال وسىنداي تولاعاي تابىسقا جەتەتىنىن كۇتپەگەنىن ايتادى.
«مەن سامالعا ٴبىرىنشى سىنىپتان باستاپ، 4 جىل ساباق بەردىم. 4 پەن 5-كە وقىدى. ٴوزى قاراپايىم بولاتىن. ولەڭ وقىعاندى جانى سۇيەتىن. ۇنەمى جۋرناليست بولعىسى كەلەتىنىن ايتاتىنى ەسىمدە. سامال ٴوز ارمانىنا جەتتى دەپ ويلايمىن. وقۋشىم جەڭىسكە جەتكەندە قۋانىشىمدا شەك بولمادى»، - دەيدى ارالاعاش ورتا مەكتەبىنىڭ ٴمۇعالىمى زۋحرا ساپاروۆا.
سامالدىڭ ٴوزى ەلگە كەلىپ، تۋعان جەردىڭ توپىراعىن باسىپ، ساف اۋاسىمەن تىنىستاعانعا جەتەر باقىتتىڭ جوقتىعىن ايتادى.
«مەنى قولداپ جاتقان ەلىمە العىسىم شەكسىز. وعان باعا جەتپەيدى. قۋانىشتىمىن. اتا-انام، ۇستازدارىمدى ەرەكشە اتاپ وتكىم كەلەدى. ەلگە جازدا كەلىپ تۇرامىن. تۋعان جەر مەن ٴۇشىن اسا قىمبات»، - دەدى سامال ەسلاموۆا جۋرناليستەرگە بەرگەن سۇحباتىندا.
كەزدەسۋگە كەلگەندەر سامالدىڭ قولىن الىپ، قۇتتىقتاپ، سۋرەتكە تۇسۋگە اسىقتى. ول وزىمەن بىرگە قۋانىپ جاتقان جاندارعا قايتا-قايتا العىس ٴبىلدىردى. اكتريسا «ايكا» ٴفيلمى قىركۇيەك ايىندا كورسەتىلىمگە شىعاتىنىن ايتتى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5283
0