استانا: 
«الماس قىلىش» اتتى قازاق حاندىعىنىڭ قۇرىلۋىنان سىر شەرتەتىن تاريحي فيلم كورەرمەنگە جول تارتقان بولاتىن. وسى فيلمگە بايلانىستى كورەرمەندەردىڭ پىكىرى ٴار قيلى بولىپ جاتىر. سىناعانى دا، قولدانعانى دا بار. وسى رەتتە مارعۇلان احان ەسىمدى الەۋمەتتىك جەلى قولدانۋشىسىنىڭ پىكىرىن ۇسىنباقشىمىز.
«الماس قىلىش» كورەرمەندەرگە جول تارتقالى جاقسى ٴبىر پىكىر وقىمادىم. ٴبىرى دەتال جوق، ٴبىرى جۇيە جوق دەپ جازىپ جاتتى. سودان «قوي وندا» دەپ بارماي ٴجۇر ەم، بۇگىن باردىم. نە دە بولسا وتاندىق ٴونىمدى قولدايىن دەگەن نيەتپەن باردىم. ٴبىراق جامانداپ جۇرگەندەردىڭ اۋىزىنا قۇم سالايىن دەپ شەشتىم. كينو ٴوز دەڭگەيىندە تۇسىرىلگەن. رۋحىم تاسىپ قايتتى! دەرەكتى فيلم سەكىلدى باستالعانىمەن كينو كوڭىلدەن شىقتى. كەرەي مەن جانىبەكتىڭ وبرازىن جاقسى بەرگەن. اسىرەسە جانىبەككە سۇيسىنە قاراپ وتىردىم. ناعىز قازاقى بولمىس پەن ەرگە ٴتان مىنەزدەر توعىسقان، سالماقتى ازاماتتىڭ بەينەسىن كورسەتە العان. وتاندىق، سونىڭ ىشىندە تاريحي كينولاردى تۇسىرگەن كەزدە ٴبىزدىڭ رەجيسسەرلەر جاۋدىڭ وبرازدارىن وتە شەبەر بەرەدى. ويراتتاردىڭ ٴوزىن قالاي بەرگەن. سۇستى ٴارى مىنەزدەرى قورعاسىنداي اۋىر. قازاق قاي كەزدە بولماسىن جاۋىن وزىمەن تەڭ كورگەن. مەيلى جەڭسىن، جەڭىلسىن ولارعا قۇرمەتپەن قاراعان. كينودان وسى دۇنيەنى انىق كورە الدىم»، – دەيدى ول.
الەۋمەتتىك جەلى قولدانۋشىسى اكتەرلەردىڭ ٴساتتى تاڭدالعانىن، رەجيسسەردىڭ جۇمىسىن جوعارى باعالاپتى.
«شايباني ٴوزىنىڭ ٴرولىن جاقسى الىپ شىققان. ٴتىپتى بەينەسى، ٴسوزى، حاندىق كەلبەتى وزىنە جاراسىپ-اق تۇر. جەك كورىپ تە جاقسى كورىپ تە كەتپەيسىڭ. ٴبىر قالىپتى ويدا بولاسىڭ. دەشتى قىپشاق دالاسىنا ٴامىرىن جۇرگىزىپ وتىرىپ ٴسوز اراسىندا قازاقتان ساقتانۋ كەرەك ەكەندىگىن ەسكەرىپ وتىرادى. بۇل رەجيسسەردىڭ كورەرمەنگە قازاق حالقىنىڭ قانداي جاۋىنگەر حالىق، نامىسشىل ەل ەكەندىگىن جەتكىزۋگە باعىتتالعان نۇسقاسى. ايتپەسە اشسا الاقانىندا، جۇمسا جۇدىرىعىندا ۇستاپ وتىرعان شايباني ٴۇشىن ٴبىر ۋىس قازاقتىڭ تاعدىرى نە ٴتايىر ەدى. قورىقتى. ولاردىڭ سەسىنەن، نامىسىنان. كوتەرىلسە ەشكىمدى ايامايتىنىن اڭعاردى. اقىرى اڭعارىپ جۇرگەن دۇنيەسى الدىنا كەلدى»، – دەيدى م. اقان.
موعولستانعا جەر سۇراپ ەمەس، كوشىپ بارىپ وتىرۋعا ۇسىنىس تاستاعان بولاشاق قاسىمنىڭ قاسقا جولىن سالاتىن قاسىم حاننىڭ جاس بولسا دا اقىلىن كورسەتكەنى دە ٴساتتى بەينەلەنگەن. بۇل جەلى قولدانۋشىسىنىڭ پىكىرى.
«سوڭعى دەمىم قالعانشا، قاسىق قانىم قالعانشا قازاق ەلى ٴۇشىن قىزمەت ەتۋگە انت ەتەمىن» دەگەن كەرەيدىڭ ٴسوزى قانداي، ٴا! ەل سىرتىندا قورعان بولىپ جۇرگەن ەكى كەيىپكەر: اسان قايعى مەن قوبىلاندى باتىر تۋرالى ايتايىن. اسان قايعىنىڭ ايتارى بار قارت، داناگوي ەكەندىگى كورىنىپ-اق تۇر. تەك ٴبىرلى-جارىم سوزدەردى قايتالاي بەرگەنى بولماسا، ٴبارى ٴوز رەتىمەن كەلگەن. قوبىلاندىنىڭ سوڭىندا بەتىنە بەتپەردە سىندى مىرش كيىپ جاۋ ورتاسىنا شوقپارىمەن سۇڭگىپ كەتۋى تۇسىنىكتى ەدى. اعاسىنا قارسى شاۋىپ ولتىرگەننەن كەيىن، شايبانيدىڭ قۇرىعىنا تۇسكەنىن كەيىن تۇسىنگەن سوڭ اقىرى ەل الدىندا قارابەت بولدىم دەپ تۇمشالانعانى بولسا كەرەك. ٴبىراق قازاقپەن جانى ٴبىر عوي، جارىقتىق باتىردىڭ. بۇگىن تاعى دا قازاق بولىپ تۋعانىم ٴۇشىن قۋاندىم، ماقتاندىم! «سەن كىمسىڭ ەي، شىڭعىس ۇرپاعىنىڭ الدىن بوگەيتىن» دەگەن كەرەيدىڭ ٴسوزى، ويراتتىڭ كەۋدەسىنە تىرەلگەن قامشىنىڭ سۇستى بەينەسى... ٴبارى ەسىمدە. وسىنداي تاريحىمنىڭ بارىن كورە تۇرىپ، بىلە تۇرىپ ۇساقتالۋعا قاقىم جوق!»، – دەيدى ول.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2069 
0
5284
0