استانا: 
2021 
0
رەجيسسەر رۇستەم ٴابدىراش «الماس قىلىش» ٴفيلمى dvd ديسكىسىنىڭ تۇساۋكەسەرى كەزىندە «قازاق حاندىعى» سەريالىنىڭ ەكىنشى ماۋسىمىنىڭ ٴتۇسىرىلىم جۇمىستارى وسى جىلدىڭ قىركۇيەگىندە باستالاتىنىن ايتتى، دەپ حابارلايدى baq.kz اقپارات اگەنتتىگى.
– جاقىندا قر پرەزيدەنتى نۇرسۇلتان نازاربايەۆ ٴوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا الەۋمەتتىڭ دامۋى مەن رۋحاني جاڭعىرۋى توڭىرەگىندە وزەكتى ماسەلەلەرگە توقتالىپ كەتتى. ٴبىز – كينوگەرلەر مەملەكەتىمىز بەن ۇلتىمىزدىڭ رۋحاني جاڭعىرۋى جولىندا ەڭبەك ەتەمىز. ماقالادا ايتىلعان اسپەكتىلەردىڭ ٴبىرى – تاريحقا باي وتكەنىمىزگە ٴۇڭىلۋ. ٴتول تاريحىمىزدى تاريحشىلار زەرتتەپ قانا قويماي، قالىڭ جۇرتشىلىق اراسىندا كەڭ ناسيحاتتالۋى ٴتيىس. تاريحي سەريالدى جارىققا شىعارۋ - تاريحىمىزدى تانۋداعى ماڭىزدى قادامداردىڭ ٴبىرى. «قازاق حاندىعى» سەريالى حالقىمىزدىڭ تاريحقا دەگەن قىزىعۋشىلىعىن وياتتى. شىعارماشىلىق توپتىڭ اتىنا كوپتەگەن العىس حاتتار كەلىپ ٴتۇستى، عالامتور جانە الەۋمەتتىك جەلىلەر ارقىلى جىلى لەبىزدەر الدىق. كوپتەگەن پىكىرتالاستار بولدى جانە سىن دا ايتىلدى، - دەدى رەجيسسەر.
سەريالدىڭ جالعاسى «قازاق حاندىعى. التىن تاق» دەگەن اتاۋمەن شىقپاق.
– وسى جوبانىڭ جالعاسى تۇسىرىلگەنىن ٴبىز دە قاراپايىم كورەرمەندەر دە قالاپ وتىر. مەن ٴۇشىن بۇنداي جوبانى ٴتۇسىرۋ ۇلكەن جاۋاپكەرشىلىك پەن ماقتانىش. سوندىقتان دا، «قازاق حاندىعى. التىن تاق» دەگەن شارتتى اتاۋمەن سەريالدىڭ ەكىنشى ماۋسىمىن قولعا العانىمىز تۋرالى قۋانا حابارلايمىز، - دەدى رەجيسسەر.
ونىڭ ايتۋىنشا، ەكىنشى ماۋسىمدا وقيعا جانىبەك حاننىڭ قايتىس بولۋىنا دەيىنگى ارالىقتى قامتيدى. سسەناريي اۆتورلارى جاڭا ماۋسىمدا دا وزگەرمەيدى. ياعني، تاريحي تۋىندىنىڭ جالعاسىن سماعۇل ەلۋباي، تيمۋر جاقسىلىقوۆ جانە رۇستەم ٴابدىراش جازاتىن بولادى جانە نەگىزگى اكتەرلاردان باسقا تاعى 5-6 كەيىپكەر قوسىلادى.
- ٴبىز دايىندىق كەزەڭگە وتتىك. ادەبي سسەناريدىڭ جۇمىستارى اياقتالۋعا جاقىن، بۇگىندە رەجيسسەرلىق سسەناريدى جازۋدى قولعا الدىق، - دەدى رۇستەم ٴابدىراش.
ەستەرىڭىزدە بولسا، «الماس قىلىش» ٴفيلمىنىڭ تۇساۋكەسەرى قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنايى استانا جانە الماتى قالالارىندا وتكەن بولاتىن. 2017 جىلدىڭ 5 قاڭتارىندا جالپىۇلتتىق پروكاتقا شىققان تولىقمەتراجدى كوركەم فيلم، قازاقستاندىق پروكاتتا 72 ملن. استام قارجى جيناپ، كوشباسشىلار قاتارىنان كورىندى. جالپى العاندا 2،5 مىڭنان استام سەانس، ونىڭ 60% قازاق تىلىندە، ال 40% ورىس تىلىندە كورسەتىلدى. ال ون سەريالى كينوتۋىندى ناۋرىز ايىندا «31 ارنادان» كورسەتىلگەن بولاتىن.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5283
0