رەسەي «بۇل شۇعىلادا بولعان ەدى» ٴفيلمىنىڭ جالعىز كوشىرمەسىن قازاقستانعا قايتاردى

بۇگىن قازاق ۇلتتىق ونەر ۋنيۆەرسيتەتىنىڭ «كينو جانە تۆ» كافەدراسىندا ٴماجيت بەگاليننىڭ «بۇل شۇعىلادا بولعان ەدى» اتتى ٴفيلمىنىڭ قازاقستانداعى العاشقى كورسەتىلىمى ٴوتتى. كارتينا 1955 جىلى تۇسىرىلگەن، الايدا كسرو-دا شەكتەۋلى پروكاتتا جۇرگەن. بۇگىنگى تاڭدا ونىڭ جالعىز كوشىرمەسى رەسەي فەدەراسياسىنىڭ «بەلىە ستولبى» اتاۋلى مەملەكەتتىك فيلم قورىندا ساقتاۋلى.

2017 جىلى ٴماجيت بەگاليننىڭ شىعارماشىلىعىن زەرتتەۋشى – رەجيسسەر-دوكۋمەنتاليست ەۆگەنيي لۋمپوۆ «ٴفيلمنىڭ ۇيگە ورالۋى» اتتى شارا ۇيىمداستىرىپ، شارا اياسىندا جينالعان قارجىعا ٴفيلمدى ساندىق فورماتقا كوشىرىپ، dvd-كوشىرمەسىن جاساعان. كارتينا ەلگە ورالىپ، كوممەرسيالىق ەمەس ماقساتتا كورەرمەندەرگە كورسەتىلەتىن بولادى.

«ٴماجيت بەگاليننىڭ فيلمدەرى رەسەيدىڭ مەملەكەتتىك فيلم قورىندا ساقتاۋلى بولۋى مۇمكىندىگى تۋرالى ونىڭ تۋعان ٴىنىسى – قاسىم ساپارعالي ۇلى بەگاليننەن ٴبىلدىم. مەن رەسمي ٴوتىنىش جاساپ، «بۇل شۇعىلادا بولعان ەدى» ٴفيلمىنىڭ سول جاقتا ەكەنىن انىقتادىم. سوندا شارا ۇيىمداستىرىپ، ٴوز ولەڭدەرىم شىققان كىتاپتى ساتىپ، سودان تۇسكەن قارجىعا ٴفيلمدى ساندىق فورماتقا كوشىردىم. بۇل شاراعا كوپتەگەن ادامدار اتسالىستى. وتانداستارىمىز مادەني قۇندىلىعىمىزدىڭ ەلگە ورالۋىنا قىزىعۋشىلىق تانىتتى. بۇل شاراعا قاتىسقان بارلىق جاناشىر جۇرتقا العىسىم شەكسىز»، - دەدى ەۆگەنيي لۋمپوۆ.

كورسەتىلىمگە ستۋدەنتتەر، ۋنيۆەرسيتەت وقىتۋشىلارى، كينوتانۋشى نازيرا مۇقىشەۆا، ونەرتانۋ عىلىمىنىڭ كانديداتى، دوسەنت ارداق يۋسيپوۆا، سۋرەتشى اسحات احمەدياروۆ جانە وپەراتور تالعات تايشانوۆ قاتىستى.

«بۇل قازاقستان كينەماتوگرافيستەرى ٴۇشىن ايتۋلى وقيعا. ەلىمىزدىڭ ٴبىرتۋار رەجيسسەرى ٴماجيت بەگاليننىڭ ٴفيلمىنىڭ العاشقى كورسەتىلىمى شاكەن ايمانوۆ اتىنداعى كينوزالدا ٴوتىپ جاتقانى قۋانتادى. جانە اتالمىش كورسەتىلىم قازاق ۇلتتىق ونەر ۋنيۆەرسيتەتىنىڭ 20-جىلدىق مەرەيتويىنا وراي ٴوتىپ جاتقانىن ايتقىم كەلەدى. ٴبىزدىڭ ۋنيۆەرسيتەت ستۋدەنتتەرگە قازاق كينوسىنىڭ كەشەگى جانە بۇگىنگى تۋىندىلارىمەن تانىستىرۋدى جالعاستىرا بەرەدى»، - دەدى «كينو جانە تۆ» كافەدراسىنىڭ مەڭگەرۋشىسى تالعات تايشانوۆ.

ەۆگەنيي لۋمپوۆتىڭ ايتۋىنشا، بۇل كارتينا، ٴماجيت بەگاليننىڭ بەلدى كارتينالارى («ونىڭ كۇنى تۋادى»، «مانشۇك تۋرالى ٴان»، «ارتىمىزدا ماسكەۋ») سياقتى كوركەمدىك جاعىنان اسا مىقتى بولماسا دا، ونىڭ رەجيسسەرلىك قولتاڭباسىنىڭ تۋۋىنا ۇلەس قوسقان. فيلمنەن رەجيسسەردىڭ ەندى عانا تۋىپ جاتقان وزىندىك پوەتيكالىق جانە كوركەمدىك شەشىمدەرىن كورۋگە بولادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!