استانا: 
1606 
0
قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق تۇسىرگەن «پاسانى زوۆۋت ەگو باتيا» دەرەكتى ٴفيلمى سەۆاستوپول قالاسىندا وتەتىن xiv حالىقارالىق دەرەكتى فيلمدەرگە ارنالعان «پوبەديلي ۆمەستە» كينوفەستيۆالىندە قازىلار القاسى تاعايىنداعان «جاڭا تۇلعانىڭ وبرازىن اشقانى ٴۇشىن» جۇلدەسىنە يە بولدى، دەپ حابارلايدى baq.kz اقپارات اگەنتتىگى kazakhfilmstudios.kz سايتىنا سىلتەمە جاساپ.
كينوتۋىندى زاپاستاعى پولكوۆنيك، اۋعان سوعىسى ارداگەرى، چەرنوبل اەس اپاتى زاردابىن جويۋ جۇمىستارىنا بەلسەنە قاتىسقان، «لەگيون» اسكەري-پاتريوتتىق كلۋبىنىڭ نەگىزىن قالاۋشى ٴارى جەتەكشىسى باتۋر ابدۋسالاموۆتىڭ ٴومىرى مەن قىزمەتى تۋرالى باياندايدى. رەجيسسەرى – اينۇر احمەتجانوۆا.
بيىل فەستيۆالعا 30 ەلدەن 100-دەن استام دەرەكتى فيلمدەر مەن سەريالدار ۇسىنىلدى. فەستيۆال بارىسىندا نەگىزگى بايقاۋمەن قاتار، شىعارماشىلىق كەشتەر، فيلمدەردىڭ كورسەتىلىمى جانە باسقا دا ٴىس-شارالاردان قۇرالعان كونكۋرستان تىس باعدارلامالار جۇرگىزىلدى.
اتالعان فەستيۆال ەكىنشى دۇنيەجۇزى سوعىسىنا قاتىسقان قالالاردىڭ قۇرمەتىنە قىرىمدا تۇراتىن كەڭەس وداعى باتىرلارىنىڭ ۇسىنىستارى بويىنشا اشىلعان. فەستيۆالدىڭ باستى ماقساتى – ەۋرازيا كەڭىستىگىندە، سونىمەن قاتار باسقا دا ەلدەردىڭ كينوكومپانيالارى مەن تەلەارنالارى جارىققا شىعارعان وزەكتى ماسەلەلەرگە ارنالعان دەرەكتى فيلمدەردى ٴبىر شاڭىراق استىنا جيناپ، ولاردى تانىستىرۋ. فەستيۆالدىڭ پرەزيدەنتى – رەسەيدىڭ حالىق ٴارتيسى ۆلاديمير مەنشوۆ.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5284
0