BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«مۇزبالاق». ادام مەن بۇركىتتىڭ اراسىنداعى دوستىقتى بەينەلەيتىن كارتينا جارىق كوردى

استانا، baq.kz. استانا قالاسىندا «مۇزبالاق» انيماسيالىق ٴفيلمىنىڭ العاشقى كورسەتىلىمى ٴوتتى. فيلم قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن.

فيلمگە ادام بالاسىنىڭ بۇركىتتى قولعا ۇيرەتۋى ارقاۋ بولعان. وقيعا جەلىسى بويىنشا ادام مەن قۇس بىر-بىرىنە سەنىم بىلدىرە وتىرىپ، باۋىر باسادى. سونىمەن قاتار، فيلمدە قازاقتىڭ ساياتشىلىق ٴداستۇرى دە سۋرەتتەلەدى.

كارتينانىڭ اۆتورلارى رەجيسسەر-انيماتور – تۇردىبەك مايدان مەن تىلەك تولەۋعازى. ال وپەراتورى – ايدىن ماقسات.

تولىقمەتراجدى انيماسيالىق ٴفيلمنىڭ ۇزىندىعى – 65 مينۋت. مۋلتفيلم 2d جانە 3d فورماتىندا جاسالعان جانە ٴار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى، جانات تىنىبايەۆ، سامات قورداباي، ەرعالي تولەبايەۆ، الما ٴادىلقىزى ەسىمدى تەاتر جانە كينو اكتەرلەرى قاتىسقان.

«مۇزبالاقتى» جاساۋدىڭ الدىندا قىسقامەتراجدى فيلم دايىندادىق. بۇركىت وسى تاقىرىپتى كوتەرۋگە سەبەپ بولدى. ٴوزىمىزدى قىران تەكتەس ەلمىز دەپ، قىرانعا تەڭەيمىز. سول سەبەپتى بۇل تاقىرىپ ٴبىزدىڭ جانىمىزعا جاقىن بولدى. بۇركىتكە بۇكىل قازاقتىڭ جان دۇنيەسىن بەردىك دەپ ويلايمىن. بۇركىت ٴوزىنىڭ قايسارلىعىمەن، ەرلىگىمەن، توزىمدىلىگىمەن، دوسقا دەگەن ادالدىعىمەن سوڭىندا بار قيىندىقتى جەڭىپ شىقتى. قازاق حالقى دا بۇركىت سياقتى قايسار ەل. سوندىقتان بۇركىتتى تاڭدادىق. سسەناريىن جازعاندا ادام مەن بۇركىت اراسىنداعى دوستىقتى كورسەتسەك دەپ ويلادىق. سيۋجەت وسى تاقىرىپ توڭىرەگىندە ٴوربيدى»، - دەدى تۇردىبەك مايدان.

كارتينا اۆتورلارىنىڭ ٴبىرى تىلەك تولەۋعازىنىڭ ايتۋىنشا، تۋىندىنى تۇسىرۋگە تەك ٴوز ەلىمىزدىڭ ماماندارى اتسالىسقان.

«تىكەلەي مينيسترلىكتىڭ قولداۋىمەن وسى ٴفيلمدى باستادىق. ەكى جارىم جىل كولەمىندە جاسالعان فيلمدە 40 جۋىق وتاندىق مامان جۇمىس ىستەدى. شەتەلمەن سالىستىرعاندا ماماندار دا، بەرىلگەن ۋاقىتى دا از بولدى. سوندىقتان قولدان كەلگەن ونەرىمىزدى سالىپ، وسى ٴفيلمدى الىپ شىقتىق»، - دەدى تىلەك تولەۋعازى.

تولىقمەتراجدى انيماسيالىق «مۇزبالاق» ٴفيلمىنىڭ ساۋندترەگىنىڭ ٴانى مەن ٴسوزىن جاس تالانتتى ٴانشى - ۇشقىن جامالبەك جازعان.

- مەن ٴمۋلتفيلمدى كورىپ، كەرەمەت اسەر الدىم. فيلم ٴبىزدىڭ سالتىمىز جانە قىران قۇسىن قولعا قالاي ۇيرەتكەنىمىز تۋرالى باياندايدى. فيلمگە ارناپ ٴتورت ٴان جازدىم. سونىڭ بىرەۋىنە كليپ تۇسىرەمىز دەگەندە قاتتى قۋاندىم، - دەدى ۇشقىن جامالبەك.

«ٴفيلمنىڭ جاستارعا، بالالارعا بەرەتىن دۇنيەسى وتە كوپ. تۋىمىزدا نەگە بۇركىتتىڭ بەينەلەنگەنى وسى ٴفيلمدى تاماشالاعاننان كەيىن تەرەڭىرەك تۇسىنەدى. قىران مەن قازاق ەگىز ۇعىم. «مۇزبالاق» قازاقتىڭ ەركىندىگىن بىلدىرەتىن فيلم دەپ ويلايمىن. فيلمگە ۇلەس قوسقان بارلىق مامانعا العىس ايتامىن»، - دەپ فيلمنەن العان اسەرىمەن دراماتۋرگ ۇلاربەك نۇرعالىم ۇلى ٴبولىستى.

ەرتە زاماندا ادامدار كەسىرىنەن جەر استىنداعى ايداھارعا اينالاپ كەلە جاتقان ابجىلان ويانىپ، جەر بەتىنە شىعىپ، ماڭايىن جالماپ، قازاق اۋىلىنا ۇلكەن اپات اكەلىپ، ۇرەي تۋعىزادى. ول اۋىلدى وتقا وراپ، قارسى كەلگەندى جالماپ كەلە جاتقاندا، ٴبىر قىران بۇركىت بالاپانىن قورعاپ، ونىمەن ايقاسادى. اقىرى ابجىلان قايتا جەر استىنا قاشىپ جوق بولادى. ال قىران وتقا ورانعان ۇيادان بالاپانىن الىپ، الىسقا ۇشىپ كەتەدى. ادام جۇتىپ دانىككەن ابجىلان كۇن تۇتىلىپ، ٴوزىنىڭ ايداھارعا اينالار ٴساتىن اسىعا كۇتەدى...

ەستەرىڭىزگە سالا كەتەيىك، «مۇزبالاق» ٴمۋلتفيلمى وتاندىق پروكاتقا 2018 جىلدىڭ 18 قازانىنان باستاپ شىعادى. بۇگىن الماتى قالاسىندا تۇساۋكەسەرى وتەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي