استانا: 
جاقىندا استانا قالاسىندا وتكەن xiii حالىقارالىق «ەۋرازيا» كينوفەستيۆالىندە «يت» اتتى قازاق ٴمۋلتفيلمى «ەڭ ۇزدىك قىسقا مەترلى فيلم» نوميناسياسى بويىنشا گران-پري يەلەندى. وسى ورايدا ٴبىز انيماسيالىق تۋىندىنىڭ اۆتورى، قازاق ۇلتتىق ونەر ۋنيۆەرسيتەتى انيماسيالىق كينو رەجيسسۋراسى ماماندىعىنىڭ العاشقى تۇلەكتەرىنىڭ ٴبىرى مەيىرجان ساندىبايمەن تىلدەسكەن بولاتىنبىز.
بالا كەزىنەن مۋلتفيلم كورىپ، ونىڭ كەيىپكەرلەرىنە ەلىكتەپ وسپەيتىن بالا كەمدە-كەم شىعار. سول بالا قيالدىڭ مۋلتيپليكاسيا سالاسىنا جەتەلەيتىنى دە جوق ەمەس. انيماسيا ونەرىنە بىرەۋ سۋرەتشىلىك قابىلەتىمەن كەلسە، كەيى مۋلتيپليكاسيالىق ونىمگە دەگەن اسا قىزىعۋشىلىعىمەن كەلەتىن سىڭايلى. ٴبىزدىڭ كەيىپكەرىمىز سوڭعىلاردىڭ قاتارىندا بولىپ شىقتى. ونىڭ ايتۋىنشا، ٴوزىن وسى سالاعا جەتەلەگەن بالا كەزدە كورگەن ٴبىر عانا ٴمۋلتفيلمى ەكەن.
«بالا كەزىمىزدە اتا-انامىز بازاردان سارقىتسىز ورالمايتىن ەدى عوي. ٴبىر كۇنى انام ماعان «كورول لەۆ» دەگەن تاسپا الىپ كەلدى. فيلمنەن بۇرىن مەنى تاسپانىڭ سىرتىنداعى سۋرەتتەر قىزىقتىرعان بولاتىن. سول ٴبىر عانا مۋلتفيلم مەنىڭ بالا قيالىمدى وسى ارناعا بۇرىپ، بۇگىنگى كۇنى مۋلتيپليكاسيا مامانى بولۋعا دەيىن جەتكىزدى»، - دەگەن جاس انيماتور ٴمۋلتفيلمنىڭ بالالاردى تاربيەلەۋدىڭ ماڭىزدى قۇرالى ەكەنىن ايتادى.
ونىڭ ايتۋىنشا، مۋلتفيلم – ۇتىمدى يدەولوگيالىق قۇرال. انيماسيالىق ونىمدەر ارقىلى تۇتاس ٴبىر بۋىندى تاربيەلەۋگە بولادى.
«مەن سول «كورول لەۆتى» كورۋ ارقىلى بالا كۇنىمنەن مەيىرىمدىلىك پەن قايسارلىقتى ۇيرەندىم، جاقسىلىققا تالپىندىم. مۋلتفيلم – ۇلتتىق يدەولوگيانى دارىپتەۋدىڭ تاماشا قۇرالى. ونىمەن قوعامنىڭ قاي تۇسىن دا كورسەتۋگە مۇمكىندىگىمىز بار. سوندىقتان ٴبىز جاس ماماندار وسى تۇرعىدا جۇمىس جاساۋىمىز كەرەك. مىسالى، مەنىڭ وسى جولى جۇلدەلى بولعان «يت» اتتى فيلمىمدە سوڭعى كەزدەرى كوبەيگەن كوكەك انالار مەن تاعدىرلارى تاس-تالقان بولعان جاس سابيلەردى كورسەتكىم كەلدى»،-دەيدى ول.
قازاقستاندا انيماتورلار ٴۇش وقۋ ورنىندا دايىندالادى. ولاردىڭ ٴبىرى ونەردىڭ قارا شاڭىراعى بولعان ت.جۇرگەنوۆ اتىنداعى قازاق ۇلتتىق ونەر اكادەمياسى بولسا، ەكىنشىسى استاناداعى قازاق ۇلتتىق ونەر ۋنيۆەرسيتەتى. ٴۇشىنشىسى – شىمكەنتتەگى ٴا.قاستەەۆ اتىنداعى وڭتۇستىك قازاقستان ونەر جانە ديزاين كوللەدجى. 2012 جىلى ەلورداداعى انيماسيا رەجيسسۋراسى ماماندىعىنىڭ اشىلۋىنا مۇرىندىق بولعان جانە سوندا قازىرگە دەيىن ۇستازدىق ەتىپ كەلە جاتقان جانىبەك نۇربەك ۇلى شاكىرتىنىڭ جەڭىسى تۇڭعىش تۇلەكتەرىن بيىل عانا ۇياسىنان ۇشىرىپ وتىرعان وسى وقۋ ورنىنىڭ دا جەڭىسى ەكەنىن قۋانا جەتكىزدى.
«ستۋدەنتتەرىمىز وتە تالانتتى. وزىندىك قولتاڭبالارى بار. «يت» – مەيىرجان ساندىبايدىڭ ديپلومدىق جۇمىسى. بەس جىلدىق وقۋىن اياقتاپ، ەندى عانا تۇلەپ ۇشقان جاس ماماندارىمىز ٴۇشىن بۇل ۇلكەن جەتىستىك. بۇل – قازاق انيماسياسىنىڭ 50 جىلدىعى كەزىندە قازاق ۇلتتىق ونەر ۋنيۆەرسيتەتى انيماسيا رەجيسسۋراسى ماماندىعىنىڭ ۇستازدارى مەن ستۋدەنتتەرىنە بەرىلگەن ۇلكەن ماراپات دەپ ەسەپتەيمىن»،-دەيدى جانىبەك نۇربەك ۇلى.
مەيىرجان ساندىباي بولسا قازاق مۋلتيپليكاسياسىنىڭ بولاشاعىنا ۇلكەن ۇمىتپەن قارايدى. جارتى عاسىرلىق تاريحى بار قازاق ٴمۋلتفيلمىنىڭ بۇگىنگى كۇنى سانى مەن ساپاسى دا ارتىپ كەلە جاتقانىن ايتقان ول ٴوز زامانداستارىنىڭ وسى سالادا قۇلشىنا ەڭبەك ەتىپ جاتقانىن جەتكىزدى.
«قازاق مۋلتيپليكاسياسىنىڭ بۇگىنگى تاڭداعى اياق الىسى جامان ەمەس. ەلىمىزدەگى ستۋديالاردىڭ سانى ساۋساقپەن سانارلىقتاي بولسا دا، شىعارىپ جاتقان كينو ونىمدەرى كوڭىل كونشىتەدى. بۇرىنعىعا قاراعاندا مامانداردىڭ سانى دا، ساپاسى دا ارتىپ كەلەدى دەپ ويلايمىن. قازىرگى كەزدە قازاق مۋلتيپليكاسياسىن دامىتۋدى مەملەكەت ٴوزى قولعا الىپ جاتىر. بۇل دەگەن ٴسوز ٴبىز جاستاردىڭ وسى سالانى دامىتۋىمىزعا ۇلكەن مۇمكىندىك تۋىپ تۇرعانىن كورسەتەدى»،-دەگەن جاس انيماتور الداعى ۋاقىتتا ٴوز ستۋدياسىن قۇرىپ، وسى سالادا ەڭبەك ەتكىسى كەلەتىنىن ايتتى.
ايتا كەتەيىك، بۇعان دەيىن مەيىرجاننىڭ «كوكسەرەك» اتتى 15 مينۋتتىق تۋىندىسى الماتىدا تۇڭعىش رەت وتكەن «قارلىعاش» رەسپۋبليكالىق انيماسيالىق كينو فەستيۆالىندە «ۇزدىك ستۋدەنتتىك انيماسيالىق فيلم» اتالىمىن جەڭىپ العان بولاتىن.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2745 
0
5280
0