استانا: 
قازاقستاندىق كينولاردى ەكراننان ٴجيى كورسەتۋ ٴۇشىن كينوتەاترلارعا قولداۋ كورسەتۋ قاجەت. بۇل تۋرالى «فرانسۋز كينو ساراپشىلارىنىڭ قازاقستاندىق كينەماتوگرافيانىڭ وزەكتى ماسەلەلەرىنە قاتىستى كوزقاراسى» اتتى دوڭگەلەك ۇستەلدە تانىمال كينوتانۋشى، كينوتاريحشى جوەل شاپرون ايتتى، دەپ حابارلايدى baq.kz ٴتىلشىسى.
«مەن قازاقستانداعى كينويندۋستريا جۇيەسى تۋرالى بىلمەيمىن. فرانسيادا ٴوز وتاندىق ٴونىمىن قورعايدى. ٴبىراق، جاناما تۇردە. ال، ەگەر سىزدەر قازاقستاندىق كينوكارتينالار ەكراننان ٴجيى كورسەتىلسىن دەسەڭىزدەر، كينوتەاترلارعا قولداۋ كورسەتۋ كەرەك. بۇل مەنىڭ جەكە پىكىرىم. ماسەلەن، ولارعا «سىيلىقتار»، سالىق تۇرىندەگى جەڭىلدىكتەر نەمەسە سۋبسيديا بەرۋ كەرەك. وسى ماسەلەنى ناقتى شەشۋ قاجەت»، - دەدى مامان.
جوەل شاپروننىڭ ايتۋىنشا، ەۋروپادا بۇل ماسەلە جاقسى جولعا قويىلعان. وسى ورايدا، كينوتانۋشى قازاقستاندا وسىعان ۇقساس جۇيە ەنگىزۋ قاجەت دەگەن ۇستانىمدا.
«ەۋروپالىق فيلمدەرگە «ەۋروپاسينەما» جۇيەسى قولداۋ كورسەتەدى. ولار كينوتەاترلارعا قارجى بولەدى. اتالعان ۇيىم كينوتەاترلارعا ۇلتتىق ەمەس، ەۋروپالىق فيلمدەردى كورسەتكەنى ٴۇشىن قولداۋ كورسەتەدى. وسىلايشا، كينو بۇكىل ەۋروپاعا تارايدى. ال جوبا اۆتورى –ەۋروپا كەڭەسى. ەۋروپالىق فيلمدەر نارىقتا اينالىمدا بولۋ ٴۇشىن كينوتەاتر ونى بەلگىلەنگەن سەانستان كوپ مولشەردە كورسەتۋى كەرەك. سول ٴۇشىن كينوتەاترلارعا اقشا بولىنەدى. كينوتەاترلاردى ەشكىم قينامايدى. ەگەر كينوتەاتر يەسى قويىلعان تالاپتى ورىنداپ، سەانستى كورسەتكەنىن دالەلدەسە، وعان اقشا بەرىلەدى. سوندىقتان، قازاقستاندىق فيلمدەردى ەكراننان ٴجيى كورسەتكىلەرىڭىز كەلسە، وسىعان ۇقساس جۇيە ەنگىزۋ كەرەك. وسىلايشا، قازاقستاندىق كينوتەاترلار وتاندىق ونىمدەردى ارتىق كورسەتۋ ارقىلى اقشا الادى. ارينە، كينوتەاترلاردىڭ قوجايىندارى مۇنى دالەلدەۋى ٴتيىس. باسىمدىقتى قاي جاققا بەرۋ قاجەتتىگىن انىقتاپ الۋلارىڭ كەرەك»، - دەيدى ج.شاپرون.
سونىمەن قاتار، فرانسۋز كينوسىنشىسى وتاندىق نارىقتان امەريكالىق فيلمدەردى الىپ تاستاۋ ماسەلەنى شەشپەيتىنىن اتاپ ٴوتتى.
«فرانسيانىڭ ازاماتى رەتىندە امەريكالىق فيلمدەردىڭ سانىن ازايتۋ قاجەت دەپ ايتا المايمىن. مەنىڭ ويىمشا، بۇل دۇرىس ەمەس. امەريكالىق كينو سانى جاعىنان كوپ تارالماعان. جالپى، فرانسيادا جىلىنا 650 جاڭا كارتينا ەكراننان كورسەتىلەدى. ونىڭ ٴ170-سى عانا – امەريكالىق ٴونىم. ٴبىراق، بارلىعى امەريكانىڭ كينوسى تۋرالى ايتادى. سەبەبى، ولاردىڭ كوشىرمەسى كوپ. ال جالپى، امەريكالىق كينوونىم سانى اسا كوپ ەمەس. قازاقستان مەن رەسەيدە دە ولار ايتارلىقتاي كوپ ەمەس. رەسەيدە جىل سايىن 450-دەن استام جاڭا كينوكارتينا تۇسىرىلەدى. ال كورسەتىلەتىن امەريكالىق فيلمدەردىڭ سانى – 178»، - دەپ تۇيىندەدى ٴسوزىن جوەل شاپرون.
ايتا كەتەيىك، بۇگىن قازاق ۇلتتىق ونەر ۋنيۆەرسيتەتىندە «فرانسۋز كينو ساراپشىلارىنىڭ قازاقستاندىق كينەماتوگرافيانىڭ وزەكتى ماسەلەلەرىنە قاتىستى كوزقاراسى» اتتى دوڭگەلەك ۇستەل ۇيىمداستىرىلدى. جيىنعا فرانسيالىق ساراپشى، ورتالىق جانە شىعىس ەۋروپا ەلدەرىنىڭ كينەماتوگرافياسى بويىنشا يۋنيفرانستىڭ جەتەكشى مامانى جوەل كاپرون جانە مادەنيەت پەن ونەر سالاسىنداعى كينەماتوگرافيستەر، عالىمدار مەن زيالى قاۋىم وكىلدەرى قاتىستى.
دوڭگەلەك ۇستەل بارىسىندا جوەل كاپرون مەن پريسسيللا جەسساتيدىڭ «فرانسۋز كينوسىنىڭ مەحانيزمدەرى جانە قاعيدالارى» جانە «فرانسيالىق كينوتەاتر – عاسىر ۇزاقتىعىنداعى انشلاگ» كىتاپتارىنىڭ تۇساۋى كەسىلدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
1287 
0
5283
0