قازاقستاندىق فيلم «ورتالىق ازيانىڭ ۇزدىك ٴفيلمى» جۇلدەسىنە يە بولدى

«ورالمان» كوركەم ٴفيلمى بىشكەكتە وتكەن «اق ٴىلبىرىس» ۇلتتىق كينوجۇلدەسىنىڭ ەكى ماراپاتىنا قول جەتكىزدى. فيلم «ورتالىق ازيانىڭ ۇزدىك ٴفيلمى» جۇلدەسىمەن، ال كارتينادا باستى ٴرولدى سومداعان اكتەر دۋلىعا اقمولدا «ورتالىق ازيانىڭ ۇزدىك اكتەرى» جۇلدەسىمەن ماراپاتتالدى، دەپ حابارلايدى baq.kz اقپارات اگەنتتىگى.

قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن اتالعان فيلم تۋعان جەرىنەن كەتۋگە ٴماجبۇر بولعان، الايدا ونداعان جىل وتكەن سوڭ اۋعانستاننان ەلىنە قايتا ورالعان قانداستارىمىز جايلى باياندايدى. رەجيسسەرى – ٴسابيت قۇرمانبەكوۆ.

ەستەرىڭىزگە سالا كەتسەك، «ورالمان» كوركەم ٴفيلمى يراننىڭ استاناسى تەگەراندا وتكەن ٴ35-شى حالىقارالىق فادجر كينوفەستيۆالى مەن xiii حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن.

فيلمدە باستى ٴرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن xiii حالىقارالىق مۇسىلماندار كينوسى فەستيۆالىندە «ۇزدىك ەر ادام ٴرولى» جۇلدەسىمەن ماراپاتتالدى.

سونداي-اق، كارتينا يتاليادا وتكەن حح حالىقارالىق «religion today» كينوفەستيۆالىندە «ۇزدىك فيلم» نوميناسياسىندا جەڭىسكە جەتىپ، تاۋەلسىز signis قازىلار القاسىنىڭ ارنايى جۇلدەسىن يەمدەندى. ودان بولەك، گەرمانيادا وتكەن 66-شى حالىقارالىق مانگەيم-حايدەلبەرگ كينوفەستيۆالىندە «ورالمان» ٴفيلمى ۇزدىك جەتىستىكتەرى ٴۇشىن ارنايى جۇلدەمەن ماراپاتتالدى. اقپان ايىندا اتالعان كينوتۋىندى نەپالدا وتكەن ٴ22-شى حالىقارالىق كينوفەستيۆالدە «شەتەلدىڭ ۇزدىك ٴفيلمى» جۇلدەسىن يەمدەنگەن بولاتىن.

مامىر ايىنىڭ سوڭىندا «ورالمان» ٴفيلمى اۆستريادا وتەتىن حالىقارالىق كينوفەستيۆالدە كورسەتىلەتىن بولادى.

سونىمەن قاتار «اق ٴىلبىرىس» كينوجۇلدەسىنىڭ «الەمدىك كينەماتوگرافقا سىڭىرگەن ەڭبەگى ٴۇشىن» مارتەبەلى جۇلدەسى قازاقستاننىڭ حالىق ٴارتيسى، تانىمال اكتەر نۇرجۇمان ىقتىمبايەۆقا تابىستالدى.

2012 جىلى قىرعىزستاننىڭ تانىمال كينەماتوگرافيستەرى ۇيىمداستىرعان «اق ٴىلبىرىس» اتتى تۇڭعىش ۇلتتىق كينوجۇلدەسى وتكەن جىلدىڭ ۇزدىك فيلمدەرىن انىقتايتىن ەلەۋلى ٴىس-شارا. كينوجۇلدە قىرعىزستاننىڭ كينەماتوگرافيستەر وداعى، «ايتىش» قوعامدىق ۇيىمى جانە قىرعىزستان رەسپۋبليكاسىنىڭ كينو دامىتۋ قورى قولداۋىمەن وتەدى. «ورتالىق ازيانىڭ ۇزدىك ٴفيلمى» نوميناسياسى 2010 جىلى العاش تابىستالعان بولاتىن.

بىلتىر قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق «نوۆىي مير» ٴجشس-نىڭ قاتىسۋىمەن تۇسىرىلگەن «اناعا اپارار جول» ٴفيلمى دە «ورتالىق ازيانىڭ ۇزدىك ٴفيلمى» كينوجۇلدەسىمەن ماراپاتتالعان ەدى.

ايتا كەتسەك، قىرعىزدىڭ رەجيسسەرى اقتان ارىس قۇبات تۇسىرگەن «كەنتاۆر» ٴفيلمى «اق ٴىلبىرىس -2018» ۇلتتىڭ جۇلدەسىنىڭ باس جۇلدەسىن جەڭىپ الدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!