استانا: 
1390 
0
18-21 تامىز ارالىعىندا شىڭجاڭدا (قىتاي) حالىقارالىق مادەنيەت جانە كرەاتيۆتى يندۋستريا كورمەسى اياسىندا حالىقارالىق كينوفەستيۆال ٴوتتى، دەپ حابارلايدى baq.kz ٴتىلشىسى قر مسم ٴباسپاسوز قىزمەتىنە سىلتەمە جاساپ.
كينوفەستيۆال مەن شاراعا قاتىسۋشى مەملەكەتتەردىڭ مادەنيەتى تۋرالى كورمەنى قىتاي حالىق رەسپۋبليكاسىنىڭ مادەنيەت مينيسترلىگى ۇيىمداستىردى.
كينوفەستيۆال باعدارلاماسىندا قازىلار القاسى نازارىنا 78 فيلم ۇسىنىلدى. رەجيسسەر باقىت قايىربەكوۆتىڭ «ماڭگىلىك اسپان استىندا» اتتى عىلىمي-تانىمدىق ٴفيلمى «يننوۆاسيالىق جوبا» نوميناسياسى بويىنشا جوعارى ماراپاتقا يە بولىپ، قىتاي حالىق رەسپۋبليكاسىنىڭ مادەنيەت مينيسترلىگىنىڭ جۇلدەسىن الدى.
ەسكە سالىپ كەتسەك، «ماڭگىلىك اسپان استىندا» ٴفيلمىن قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا قازاق عىلىمي-زەرتتەۋ مادەنيەت ينستيتۋتى مەن «مەرگەن» ستۋدياسى تۇسىرگەن. بۇل جوبا نۇرسۇلتان نازاربايەۆتىڭ «عاسىرلار توعىسىندا» كىتابى نەگىزىندە قازاق حاندىعىنىڭ 550-جىلدىق مەرەيتويىنا ارنايى دايارلاندى.
كينوفەستيۆالگە قاتىسۋشىلاردىڭ ورتاق پىكىرى بويىنشا قازاقستاندىق فيلمدەر شەتەلدىك كورەرمەندەردىڭ تاراپىنان سۇرانىسقا يە. وسى فيلمدەر ارقىلى ادامدار قازاقستان حالقىنىڭ باي مادەنيەتى، سالت-داستۇرلەرىمەن تانىسا الادى.
«قازاقستاندىق فيلم كينوفەستيۆالدىڭ لايىقتى جوعارى ماراپاتىنا يە بولدى. فيلم قازاق حالقىنىڭ مادەنيەتى مەن ٴومىرىن جاڭا تۇرعىدان اشىپ، كورمەگە كەلۋشىلەردىڭ ۇلكەن قىزىعۋشىلىقتارىن تۋدىردى. ٴبىز بۇدان بىلاي ەكى ەل اراسىنداعى ىنتىماقتاستىقتىڭ جەمىستى بولاتىنىنا ۇمىتتەنەمىز»،-دەيدى شىڭجاڭ-ۇيعىر اۆتونوميالىق اۋدانىنىڭ مادەنيەت دەپارتامەنتى ديرەكتورىنىڭ ورىنباسارى كەنەس ساني.
سونىمەن قاتار، قازاق عىلىمي-زەرتتەۋ مادەنيەت ينستيتۋتى حالىقارالىق كورمەگە قاتىستى. كورمەدەگى ينستيتۋتتىڭ ستەندتتەرىنەن كەلۋشىلەر قازاقستاننىڭ باي تۋريستىك، يننوۆاسيالىق جانە ينۆەستيسيالىق الەۋەتى، عىلىمداعى جەتىستىكتەرى، مادەنيەتى، جالپى عىلىمي-زەرتتەۋ ينستيتۋتىنىڭ قىزمەتىنەن اقپاراتتىق ماتەريالدارمەن تانىسا الدى. جانە دە ولارعا كينوفەستيۆالدە ۇسىنىلعان «ماڭگىلىك اسپان استىندا» اتتى ٴفيلمدى تاماشالاۋعا مۇمكىندىك بولدى. كورمەنىڭ جۇمىس ىستەپ تۇرعان ۋاقىتىندا قازاقستاندىق ستەندتى مىڭداعان ادام تاماشالادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5283
0