استانا: 
1674 
0
ش.ايمانوۆ اتىنداعى «قازاقفيلم» كينوستۋدياسى تۇسىرگەن قىسقامەتراجدى فيلمدەر مامىردىڭ ٴ8-ى مەن 19-ى ارالىعىندا فرانسيادا وتەتىن حالىقارالىق كانن كينوفەستيۆالىنىڭ short film corner باعدارلاماسى اياسىندا كورسەتىلەتىن بولادى، دەپ حابارلايدى baq.kz اقپارات اگەنتتىگى قازاقفيلم ستۋديوسىنا سىلتەمە جاساپ.
الەمدىك قىسقامەترلى فيلمدەرگە ارنالعان كانن فەستيۆالىنىڭ كاسىبي ٴبولىمى – short film corner باعدارلاماسى اياسىندا وتاندىق ەكى كينوتۋىندى – «تىعىلماق» جانە «اسان» اتتى فيلمدەر كورسەتىلەدى. اتالعان باعدارلامانىڭ باستى ماقساتى – كينو الىمىندەگى كاسىبي كينوگەرلەردىڭ باسىن قوسىپ، جاس رەجيسسەرلەر مەن پروديۋسەرلەر، سونداي-اق الەمنىڭ تۇكپىر-تۇكپىرىنەن جينالعان ديستريبيۋتورلار اراسىندا بايلانىس ورناتۋ. وسى باعدارلاما اياسىندا كورسەتىلگەن فيلمدەر حالىقارالىق كينوفەستيۆالدەرگە جولداما الىپ، حالىقارالىق سەرىكتەستەر جانە ديستريبيۋتور تابۋعا مۇمكىندىكتەرى بار.
بيىل short film corner باعدارلاماسىنا قاتىسۋعا كوپتەگەن ەلدىڭ رەجيسسەرلەرى اتىنان 2000-نان استام تاپسىرىس كەلىپ تۇسكەن. جىل سايىن ۇلعاياتىن بۇل كورسەتكىش قىسقامەترلى فيلمدەرگە دەگەن قىزىعۋشىلىقتىڭ ارتىپ كەلە جاتقانىن كورسەتەدى.
ايتا كەتسەك، «تىعىلماق» جانە «اسان» فيلمدەرى بىلتىر «قازاقفيلم» كينوستۋدياسىنداعى «دەبيۋت» شىعارماشىلىق-وندىرىستىك بىرلەستىگى ۇيىمداستىرعان سسەنارييلەر كونكۋرسىندا جەڭىسكە جەتىپ، وندىرىسكە جىبەرىلگەن بولاتىن.
رەجيسسەر ۆەنەرا قايىرجانوۆا تۇسىرگەن «تىعىلماق» ٴفيلمى ەرەسەكتەر پروبلەماسىنا كۋا بولعان ەكى كىشكەنتاي قىز تۋرالى باياندايدى. ولار سول جاعدايدان قاشىپ، ٴوز بالالار الەمىنە جاسىرىنامىز دەپ، كوشەدە «تىعىلماق» وينايدى.
بۇل تۋىندى سانكت-پەتەربور قالاسىندا وتكەن v حالىقارالىق «inتونناسيا» دىبىس رەجيسسەرلەرگە ارنالعان كينوفەستيۆالدە گريگوريي فرانك اتىنداعى ارنايى جۇلدەمەن ماراپاتتالدى (ٴفيلمنىڭ دىبىس رەجيسسەرى – قويشىن قاناي).
ال رەجيسسەر بەرىك جاحانوۆتىڭ «اسان» فيلمىندە كوپ جىلدارى اكەسىن كورمەسە دە، ونى اقتىق ساپارعا شىعارىپ سالۋعا بارعان جىگىتتىڭ ٴومىرى سۋرەتتەلەدى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5281
0