1607 
0
ش. ايمانوۆ اتىنداعى «قازاقفيلم» كينوستۋدياسىنىڭ جانىنداعى «دەبيۋت» شىعارماشىلىق-وندىرىستىك بىرلەستىگى سسەنارييلەر بايقاۋىنىڭ جەڭىمپازدارىن جاريالادى، دەپ حابارلايدى baq.kz.
5283
0 
استانا: 
ش. ايمانوۆ اتىنداعى «قازاقفيلم» كينوستۋدياسىنىڭ جانىنداعى «دەبيۋت» شىعارماشىلىق-وندىرىستىك بىرلەستىگى سسەنارييلەر بايقاۋىنىڭ جەڭىمپازدارىن جاريالادى، دەپ حابارلايدى baq.kz.
كونكۋرسقا وتىزدان استام قىسقامەتراجدى كوركەم فيلمدەر سسەنارييلەرى تۇسكەن. ولاردىڭ ىشىنەن بەس جۇمىس ىرىكتەلىپ الىنعان. «دەبيۋت» ٴشوب تاڭداۋى قايىرجانوۆا ۆەنەرانىڭ «تىعىلماق»، بايمۇراتوۆ ارماننىڭ «تاقيا»، راحمەتاليەۆ الەننىڭ «ٴتوزىم»، جاحانوۆ بەرىكتىڭ «كەشىرىم» سونداي-اق، جىلىسبايەۆا ارداقتىڭ «جۇت» سسەنارييلەرىنە تۇسكەن.
«قازاقفيلم» اق ەكسپەرتتىك كەڭەسىنىڭ تەڭتوراعاسى بەكبولات شەكەروۆ ىرىكتەۋ ٴۇردىسى تۋرالى ايتىپ بەردى:
– بىزگە جىبەرىلگەن سسەنارييلەردىڭ ىشىنەن بەسەۋىن ىرىكتەپ الدىق. ولاردىڭ بارلىعى ۇستىمىزدەگى جىلى وندىرىسكە جىبەرىلەدى. ٴتورت تۋىندىنىڭ رەجيسسەرى اۆتورلاردىڭ وزدەرى بولماق. ال «جۇت» سسەنارييىن ەسپەنبەتوۆ جاندوس ەسىمدى جاس رەجيسسەرگە بەرۋدى ٴجون سانادىق. مۇنداي تاجىريبە «دەبيۋت» ٴشوب -دە كوپتەن بەرى جاسالىنباعان بولاتىن.
ەستەرىڭىزگە سالا كەتەيىك، ٴساۋىر ايىنىڭ ورتاسىندا «قازاقفيلم» «دەبيۋت» ٴشوب اتىنان سسەنارييلەر بايقاۋىن جاريالاعان بولاتىن. شارت بويىنشا بايقاۋعا جاس اۆتورلارمەن قاتار ٴوز ٴىسىنىڭ كاسىبي ماماندارى دا قاتىسا الاتىن. قاتىسۋشىلاردىڭ قاتارىندا: كەنجەبەك شايقاقوۆ، عازيز ناسىروۆ، ارداق جىلىسبايەۆا جانە تيمۋر ماقاجانوۆتار سياقتى تاجىريبەلى اۆتورلار دا بولدى.
ايتا كەتۋ كەرەك، «قازاقفيلم» قىسقامەتراجدى كوركەم كارتينالاردى 1959 جىلدان باستاپ وندىرەدى. كەيىنىرەك كينوستۋديادا «دەبيۋت» شىعارماشىلىق-وندىرىستىك بىرلەستىگى قۇرىلىپ، بۇگىندە ونى انار قاشاعانوۆا باسقارادى. كوپتەگەن جىلدار بويى «دەبيۋت» ٴشوب جىل سايىن جاڭا ەسىمدەردى اشادى، جاس كينەماتوگرافيستەردىڭ تانىلۋىنا مۇمكىندىك بەرەدى. بىرلەستىكتىڭ باستى ماقساتى – جاس كينەماتوگرافيستەردى سسەناريي جازۋدان باستاپ پوست-پروداكشنعا دەيىنگى كينو ٴوندىرىسىنىڭ ۇدەرىسىمەن تانىستىرۋ.
ىرىكتەۋدەن وتكەن سسەنارييلەردىڭ اننوتاسيالارى:
«ٴتوزىم»
سسەناريي اۆتورى ٴارى رەجيسسەرٴى: راحمەتاليەۆ الەن
انار مەيرامحانادا ەدەن جۋۋشى بولىپ ىستەيدى. ونىڭ كۇيەۋى مۇگەدەك، سوندىقتان تۇرمىستاعى بار اۋىرتپالىق اناردىڭ موينىنا جۇكتەلگەن. الايدا جولىنا كەزىككەن جىگىتتىڭ قولىنان ۇستاپ، ٴومىرىن وزگەرتۋگە بارا مە ەكەن؟..
«تىعىلماق»
سسەناريي اۆتورى ٴارى رەجيسسەرٴى: قايىرجانوۆا ۆەنەرا
بۇل ەكى كىشكەنتاي قىز تۋرالى وقيعا. ەرەسەكتەر پروبلەماسىنا كۋا بولعان ولار بالالار الەمىنە جاسىرىنباق بولىپ، كوشەدە «تىعىلماق» وينايدى.
«تاقيا»
سسەناريي اۆتورى ٴارى رەجيسسەرٴى: بايمۇراتوۆ ارمان
مەگاپوليستە قاراپايىم ادامي قارىم-قاتىناسقا ورىن قالماعان سەكىلدى. ۇلكەن قالا ٴومىرى كۇندەلىكتى كۇيبەڭمەن وتەدى. وسىناۋ قاۋىرت تىرشىلىكتى بالكونىنان باقىلايتىن ماقسۇت ەسىمدى قارت كىسى ٴوز ٴومىرىن وزگەرتپەك بولادى.
«كەشىرىم»
سسەناريي اۆتورى ٴارى رەجيسسەرى: جاحانوۆ بەرىك
20 جاسار اسان كوپ جىلداردان بەرى ارالاسپاي كەتكەن اكەسىنىڭ قايتىس بولعانىن ەستيدى. سۋىت حاباردى ەستىگەن ول اناسى جانە ناعاشىسىمەن بىرگە اكەسىن سوڭعى ساپارعا اتتاندىرۋ ٴۇشىن جولعا شىعادى. اسان جول بويى اكەسىن ەسكە الادى. فيلم اكە مەن بالانىڭ قارىم-قاتىناسى تۋرالى باياندايدى.
«جۇت»
سسەناريي اۆتورى: ارداق جىلىسبايەۆا
«جۇت» - بۇل 1932 جىلى قازاقستاننىڭ جانە كسرو-نىڭ باسقا دا ايماقتارىندا سوۆەت بيلىگىمەن قولدان جاسالعان جاپپاي اشارشىلىق پەن رەپرەسسيا قاسىرەتىن كەشكەن وتباسى تۋرالى فيلم.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
