«قازاقفيلم» قىتاي كينەماتوگرافيستەرىمەن بىرلەسىپ كينو ٴتۇسىرىپ جاتىر

«قازاقفيلم» كينوستۋدياسى قىتاي كينەماتوگرافيستەرىمەن بىرلەسىپ «كومپوزيتور» اتتى ٴفيلمدى ٴتۇسىرۋدى قولعا الدى، دەپ حابارلايدى baq.kz.

ش.ايمانوۆ اتىنداعى «قازاقفيلم» اق قىتاي كينەماتوگرافيستەرىمەن بىرلەسىپ «كومپوزيتور» (جۇمىس اتاۋى) اتتى ٴفيلمدى ٴتۇسىرۋدى قولعا الدى. اتالعان ٴفيلمنىڭ ٴتۇسىرۋ جۇمىستارى بويىنشا كەزدەسۋ وتكىزۋ ٴۇشىن الماتىعا ارنايى قىتاي حالىق رەسپۋبليكاسىنىڭ تانىمال رەجيسسەرى شەريزات ياكۋب باستاعان shineworks كينوكومپانياسىنىڭ ٴتۇسىرۋ توبى كەلدى.

بىرلەسكەن جوبانى جۇزەگە اسىرۋ تۋرالى تالقىلاۋلار 2015 جىلى 26 قىركۇيەكتە قىتايدىڭ فۋچجوۋ قالاسىندا وتكەن «جىبەك جولى» كينوفەستيۆالىنىڭ كوپرودۋكسيا جونىندەگى فورۋمدا باستالعان. 2016 جىلى 2 قاراشادا «قازاقفيلم» كينوستۋدياسى جانە قىتايدىڭ shineworks كينوكومپانياسى اراسىندا «كومپوزيتور» اتتى ٴفيلمدى بىرلەسىپ شىعارۋ جانە قارجىلاندىرۋ، سونىمەن قاتار بىرلەسىپ پروكاتقا شىعارۋ جونىندە كەلىسىمگە قول قويىلدى. 2016 جىلدىڭ جەلتوقسان ايىنان باستاپ فيلم دايىندىق كەزەڭگە وتكەن بولاتىن. كارتينانىڭ ٴتۇسىرۋ جۇمىستارى 2017 باستالىپ، تۇسىرىلىمدەردىڭ نەگىزگى بولىگى قازاقستاندا وتەدى.

اتالعان فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى سي سينحايدىڭ ٴومىرى مەن ونەر جولىنا ارنالماق. ۇلى وتان سوعىسى جىلدارىندا (1941- 1943 جىلدار ارالىعىندا) كومپوزيتور قازاقستاندا تۇرىپ، قازاقتىڭ تالانتتى كومپوزيتورى باقىتجان بايقاداموۆپەن دوس بولعان. كارتينا ەكى ەل اراسىنداعى ىنتىماقتاس پەن كومپوزيتورلاردىڭ دوستىعى تۋرالى سىر شەرتەدى، دەپ حابارلايدى ش.ايمانوۆ اتىنداعى «قازاقفيلم» اق ٴباسپاسوز قىزمەتى..

«بۇگىنگى كۇنگە دەيىن ٴبىراز جۇمىس اتقارىلدى. قازاقستان جاعىنان سەرىكتەستەرىمىزگە العىسىمىز شەكسىز. قىتايدا سي سينحاي تۋرالى، ونىڭ ٴار جىلدارى ٴومىرى تۋرالى باياندايتىن فيلمدەر كوپ، ٴبىراق كومپوزيتوردىڭ قازاقستاندا تۇرىپ، وسىندا جۇمىس ىستەگەنى جونىندە كوبىسى بىلە بەرمەيدى. وسى ەلدە كومپوزيتوردى جىلى قارسى الىپ، ونىڭ شىعارماشىلىعىنا قولداۋ كورسەتكەنى تۋرالى ايتىپ بەرۋ ٴبىز ٴۇشىن وتە ماڭىزدى»، - دەدى ٴفيلمنىڭ رەجيسسەرى شەريزات ياكۋب.

«قازاقفيلم» ٴۇشىن بۇل قىتاي كينوگەرلەرىمەن جاسالعالى وتىرعان العاشقى جوبا. سوندىقتان دا ٴبىزدىڭ تاراپتان بۇل جوباعا بىلىكتى ماماندار تارتىلىپ وتىر. ەكى ەل اراسىندا ىنتىماقتاستىق ورناتۋ ماقساتىندا قولعا الىنعان بۇل ٴفيلمدى ابىرويمەن اتقارىپ شىعامىز دەگەن ويدامىن»، - دەدى ش.ايمانوۆ اتىنداعى «قازاقفيلم» اق پرەزيدەنتى باقىت قايىربەكوۆ.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!