استانا: 
2074 
0
قازاق مۋلتيپليكاسياسى تاعى ٴبىر تىڭ تۋىندىمەن تولىعادى. «مۇزبالاق» انيماسيالىق ٴفيلمى كورەرمەنگە كەلەر جىلى جول تارتپاق. فيلم رەجيسسەرلەرى مەملەكەت تاراپىنان قارجىلىق قولداۋمەن قاتار، پروكاتقا شىققان كەزىندە قاداعالاۋ بولسا دەيدى. سەبەبى، قازاق تىلىندەگى وتاندىق ٴونىم كورسەتىلىم كەزىندە شەتتەتىلىپ جاتادى.
60 مينۋتتىق انيماسيالىق ٴفيلمدى جارىققا شىعارۋ ٴۇشىن ٴۇش جىل تاپجىلماي ەڭبەك ەتۋ كەرەك. 22 ادامنان تۇراتىن شىعارماشىلىق توپ شامامەن 85 مىڭ سۋرەت سالۋى ٴتيىس. ٴفيلمنىڭ رەجيسسەرلەرى تىلەك تىلەۋعازى مەن تۇردىبەك مايدان دايىندىق جۇمىستارى 2015 جىلدىڭ قىركۇيەگىندە باستالعانىن جەتكىزدى. كادرلىق تاپشىلىق پەن ٴتۇرلى اكىمشىلىك كەدەرگىلەردىڭ بولۋىنان جۇمىس توقتاپ تۇرىپتى. انيماسيالىق فيلم 2017 جىلدىڭ تامىز ايىندا دايىن بولماق. الايدا، رەجيسسەر پروكاتقا شىققان كەزدە وتاندىق ونىمگە كوڭىل كوبىرەك بولىنسە دەيدى.
«مىسالى قىتاي ەلىن الاتىن بولساق. ولار وزدەرىنىڭ ۇلتتىق ٴفيلمى شىعاتىن كەزدە ونى مەرەكەگە تۋرالاپ، پروكاتقا شىعاتىن كەزدە شەت ەلدىڭ باسقا فيلمدەرىن سول ايلاردا توقتاتا تۇرۋ دەگەن سياقتى باعىتتاردى كورسەتەدى. ولار شەت ەلدىڭ كينوسى مەن وتاندىق ونىمدەرىن سالىستىرىپ، جارىستىرمايدى»، - دەدى «مۇزبالاق» انيماسيالىق ٴفيلمىنىڭ رەجيسسەرى تۇردىبەك مايدان.
رەجيسسەردىڭ پىكىرىنشە، شەت ەلدىك ونىمدەرگە قاراعاندا وتاندىق فيلمدەردىڭ بەرەرى مول. پاتريوتتىق سەزىمدى وياتىپ، ٴداستۇردى دارىپتەپ، ۇلتتىق يدەولوگيانى ناسيحاتتايتىن بىردەن ٴبىر قۇرال - انيماسيالىق فيلمدەر. «مۇزبالاق» كورىنىسىنىڭ جەلىسىندە ادامنىڭ بۇركىتتى العاش رەت قولعا ۇيرەتۋى باياندالادى. وندا قىران قۇستىڭ قازاق اراسىنداعى ەرەك ورنى مەن قاسيەتى كورسەتىلەدى. دايىندىق بارىسىندا قازاقستاننىڭ كورىكتى جەرلەرى زەرتتەلىپ، ۇلتتىق ناقشتا كەيىپكەرلەردى كورسەتۋگە اسا كوڭىل بولىنگەن.
«ارينە، فيلم ۇلتتىق بولعاننان كەيىن، قازاقي بولعاننان كەيىن ونىڭ ٴستيلىن دە قازاقي ەتىپ شىعارۋ كەرەك بولدى. دەمەك، كورىنىستەردىڭ تەرەڭدىگىن، قازاق جەرىنىڭ بايلىعىن، كەڭدىگىن، ادەمىلىگىن، سۇلۋلىعىن كورسەتۋ كەرەك بولدى. سول ٴۇشىن وسى كورىنىستەرگە بارىمىزدى سالىپ، ارنايى ەكسپەديسيامەن شىعىپ، فوتوعا ٴتۇسىرىپ، سونى زەرتتەگىننىڭ بارلىعىن، تۇيگەنىمىزدى وسى فيلمگە سالىپ وتىرمىز»، - دەدى «مۇزبالاق» انيماسيالىق ٴفيلمىنىڭ قويۋشى-سۋرەتشىسى اداي ٴابىلدانوۆ.
سونىمەن قاتار، «قازاقفيلم» كينوستۋدياسىندا «كۇلتەگىن» تولىقمەترلى ٴمۋلتفيلمىنىڭ وندىرىسكە دايىندىق جۇمىستارى باستالدى. بۇل جوبا اداي ٴابىلدانوۆتىڭ رەجيسسەرلىك ەتۋىمەن جارىق كورمەك. الداعى ۋاقىتتا ونىڭ شىعۋ ۋاقىتى بەلگىلى بولادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5283
0