استانا: 
3253 
0
بولاشاقتا شىمكەنت قازاق ٴمۋلتفيلمىنىڭ دامۋىنا ەرەكشە ۇلەس قوساتىن ورتالىققا اينالۋى ٴتيىس. انيماسيالىق تۋىندىلار ارقىلى تەرەڭ تاريحىمىزدى ناسيحاتتاپ، وسكەلەڭ ۇرپاقتى ۇلتجاندى ەتىپ تاربيەلەۋىمىز قاجەت. بۇل تۋرالى «وڭتۇستىك-فيلم» كوممۋنالدىق مەملەكەتتىك مەكەمەسى جانە «ساق» كينوستۋدياسىنىڭ الداعى جوبا-جوسپارلارىمەن تانىسقان وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ٴمالىم ەتتى.
«ساق» كينوستۋدياسىنىڭ باس ديرەكتورى نۇريددين پاتتەەۆ وبلىس اكىمىنە «كونە جەتىگەننىڭ سىرى»، «وتىراردى قورعاۋ»، «قاجىمۇحان»، سىندى تاريحي ورىندار مەن تۇلعالار تۋرالى تۇسىرىلەتىن انيماسيالىق فيلمدەردىڭ جەلىسىن جان-جاقتى بايانداپ بەردى. سونداي-اق ول احمەت ياساۋي بابامىز بەن كۇش اتاسى – قاجىمۇحاننىڭ تۇلعاسىن تانىتاتىن ٴمۋلتفيلمىن ٴتۇسىرۋ جوباسىمەن تانىستىرىپ، قولداۋ كورسەتۋىن سۇرادى.
«ساق» كينوستۋدياسى اعىمداعى جىلى قر مادەنيەت جانە سپورت مينيسترلىگىنىڭ تاپسىرىسى نەگىزىندە 75 مينۋتتىق تولىق مەتراجدى «قازاق ەلى» انيماسيالىق ٴفيلمىن جاساپ شىعارعان ەدى. قازاق ەلىنىڭ تاريحي تاعدىرىن بەينەلەيتىن جوعارعى ساپاداعى مۇنداي مۋلتفيلم قازاقستاندا العاش رەت دايىندالىپ وتىر. ەندى شىعارماشىلىق ۇجىم جەتەكشىسى وبلىس اكىمىنەن ماڭىزدى ٴمۋلتفيلمدى باۋىرلاس تۇركيا ەلىندە دە كورسەتۋدى ۇسىندى.
ٴوز كەزەگىندە جانسەيىت تۇيمەبايەۆ «قازاق ەلىن» تۇرىك تىلىنە اۋدارىپ، 80 ميليوندىق اۋديتورياسى بار تۇركيانىڭ تەلەارنالارىنان كورسەتۋ يدەياسى قولداۋعا لايىقتى باستاما ەكەنىن جەتكىزدى.
كينويندۋستريا سالاسىنىڭ تيىمدىلىگىن تىلگە تيەك ەتكەن وبلىس اكىمى جانسەيىت تۇيمەبايەۆ مۋلتيپليكاسيالىق تاريحي فيلمدەر ارقىلى وڭىرىمىزگە كەلەتىن شەتەلدىك تۋريستەردىڭ قاتارىن ارتىرۋعا بولاتىنىن ايتتى. ايماق باسشىسى الداعى جىلى تۇركىستان قالاسىندا تۇركى دۇنيەسىنىڭ مادەني ٴىس-شارالارى كەڭ اۋقىمدا اتالىپ وتەتىندىگىنە دە كەڭىنەن توقتالدى.
كەزدەسۋ بارىسىندا «وڭتۇستىك-فيلم» مەملەكەتتىك مەكەمەسىنىڭ ديرەكتورى باتىرحان داۋرەنبەكوۆ كەلەشەكتە شىمكەنتتەن بالالار كينوستۋدياسى اشۋدى ۇسىندى. بۇل ورتالىقتىڭ وسكەلەڭ ۇرپاقتىڭ تاربيەسىنە وڭ ىقپالىن تيگىزۋى ٴتيىس مۋلتي تۋىندىلاردى ناسيحاتتاۋعا كۇش سالارى ٴسوزسىز.
«بۇگىنگى باستامالارىڭىز تەرەڭ تالقىلاۋدى قاجەت ەتەدى. جوبالارىڭىزدى ٴالى دە پىسىقتاي تۇسىڭىزدەر. ناقتى سسەنارييلەرىڭىزدى الداعى ۋاقىتتا بىرگە قاراپ، ٴوز تاراپىمىزدان قولداۋ بىلدىرەتىن بولامىز. ال «قازاق ەلى» انيماسيالىق تولىقمەتراجدى تۋىندىلارىڭىزدى تۇركيا مەملەكەتىندەگى ٴتيىستى ورىندارمەن كەلىسىم جۇرگىزۋ ارقىلى وڭتايلى شەشەمىز»،- دەدى وبلىس اكىمى جانسەيىت قانسەيىت ۇلى.
ايتا كەتەيىك، 15 جىلدىق تاريحى بار «ساق» كينوستۋدياسى بۇعان دەيىن «قازاق ەلى»، «ساپا وليمپياداسى»، «قوشقار مەن تەكە»، «مومىن مەن قاراقشى» سىندى 50-دەن استام تارتىمدى انيماسيالىق تۋىندىلارىمەن كورەرمەندەردىڭ ىستىق ىقىلاسىنا بولەنىپ كەلەدى. ال 25 سەريالى «تومپاق» ٴفيلمى وتاندىق تەلەارنالاردان كورسەتىلىپ، كورەرمەندەردىڭ ايرىقشا قىزىعۋشىلىعىن تۋدىرعان دۇنيە بولىپ سانالادى.
ال، «وڭتۇستىك-فيلم» كمم دەرەكتى جانە عىلىمي-كوپشىلىك فيلمدەر شىعارۋمەن سونىمەن قاتار ۇلتتىق كينەماتوگرافيا شەجىرەسىن، قۇجاتتامالىق مۇراعاتىن جيناقتاۋ جانە ساقتاۋ ٴارى قايتا قالپىنا كەلتىرۋ جۇمىستارىمەن اينالىسادى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5280
0