استانا: 
2693 
0
پاۆلودار وبلىسىندا «ەrtis cinema» حالىقارالىق كينوفەستيۆالى شىمىلدىعىن ٴتۇردى. شاراعا ات باسىن تىرەگەن وتاندىق جانە شەتەلدىك كينو سالاسىنىڭ وكىلدەرى قىزىل كىلەم ۇستىمەن ٴجۇرىپ ٴوتىپ، ولارعا قۇرمەت كورسەتىلدى، دەپ حابارلايدى baq.kz ايماقتاعى ٴتىلشىسى.
حالىقارالىق شاراعا باس-اياعى 207 فيلم قابىلداندى. بۇل – 21 ەل وكىلىنىڭ قيالىنان تۋىنداعان شىعارمالار. ولاردىڭ قاتارىندا رەسەي، تاجىكستان، قىرعىزستان، وزبەكستان، گرۋزيا، بەلورۋس، سەربيا، گرۋزيا، يسپانيا، فرانسيا مەملەكەتتەرى بار.
بايقاۋدىڭ قازىلار القاسىنىڭ قاتارىندا جازۋشى، سسەناريست، قازاقستان كينوماتوگرافيستەرى وداعىنىڭ ٴتوراعاسى ەرمەك تۇرسىنوۆ، رەسەيدىڭ حالىق ٴارتىسى ۆلاديمير حوتينەنكو، ەلىمىزدىڭ ەڭبەك سىڭىرگەن قايراتكەرى سلامبەك تاۋەكەل سياقتى مايتالماندار بار.
«بۇگىنگى كۇنگە دەيىن بىرنەشە كونكۋرستىق ٴفيلمدى تاماشالاپ ۇلگەردىم. ولاردىڭ قاتارىندا نازارىما ىلىگىپ، كوڭىلىمنەن شىققان مىقتى، قىزىقتى لەنتالار بارشىلىق. فەستيۆالدە جاس رەجيسسەرلەردىڭ بەلسەندىلىگى جوعارى. بۇل – قۋانتارلىق جاعداي»، - دەيدى ەرمەك تۇرسىنوۆ.
جالپى، بايقاۋدىڭ قىسقا تىزىمىنە 70-كە جۋىق تۋىندى ىرىكتەلىپ الىندى. كونكۋرستىق جانە كونكۋرستان تىس شىعارمالاردىڭ كورسەتىلىمدەرى ٴۇش كۇن بويى جەرگىلىكتى كينوتەاترلاردا ۇيىمداستىرىلادى.
«العاشقى كۇنى كورەرمەن نازارىنا 31 دەرەكتى فيلم ۇسىنىلادى. ولاردىڭ قاتارىندا قازىلاردىڭ نازارىنا جانە مەنىڭ كوڭىلىمنەن شىققان 19 تۋىندى بار. كەيىن ويىن فيلمدەرىنىڭ سەانستارى ۇيىمداستىرىلادى. قازىرگى ۋاقىتتا ۇيىمداستىرۋشىلار مەن قازىلار القاسىنىڭ مۇشەلەرى وتاندىق كينو سالاسىنداعى جاڭا ەسىمدەرىن اشتى. ۇزدىكتەرى جەڭىسكە جەتەدى دەگەن ويدامىن»، - دەيدى كينوتانۋشى ليۋدميلا بايۋشەۆا.
فەستيۆالدىڭ قورىتىندىسى سەنبى كۇنى جاريالانادى. بايقاۋدا جەڭىسكە جەتكەن رەجيسسەرلەرگە ارنايى سىيلىقتار تارتۋ ەتىلەدى. جۇزدەن جۇيرىك، مىڭنان تۇلپار اتانعان اۆتورلارعا تازا اليۋمينييدەن جاسالعان مۇسىنشەلەر تابىستالادى. ونىڭ وزىندىك سىرى بار. سەبەبى، قاناتتى مەتالل ەرتىس وڭىرىندە بالقىتىلىپ، جەرگىلىكتى مۇسىنشىلەردىڭ قولىنان تۋعان.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5284
0