بالۋان شولاق تۋرالى كوركەم ٴفيلمنىڭ ٴتۇسىرىلىم جۇمىستارى باستالدى

ش.ايمانوۆ اتىنداعى «قازاقفيلم» كينوستۋدياسىندا سسەناريى دۋلات يسابەكوۆتىڭ «جاۋجۇرەك» پەساسى جەلىسى بويىنشا جازىلعان «بالۋان شولاق» (شارتتى اتاۋ) اتتى تولىقمەتراجدى كوركەم ٴفيلمنىڭ قورعالىمى ٴوتتى، دەپ حابارلايدى baq.kz.

قر مادەنيەت جانە سپورت مينيسترلىگىنىڭ تاپسىرىسى بويىنشا تۇسىرگەلى وتىرعان بۇل فيلم بالۋان، ٴانشى ٴارى كومپوزيتور بالۋان شولاقتىڭ ٴومىرى تۋرالى باياندايدى. قورعالىم بارىسىندا ٴفيلمنىڭ رەجيسسەرى نۇرگەلدى سادىعۇلوۆ «ٴقازاقفيلمنىڭ» ەكسپەرتتىك كەڭەس مۇشەلەرىنە ٴتۇسىرىلىم توبىن تانىستىرىپ، تۇسىرىلىمدەر بولاتىن ايماقتاردى اتاپ شىقتى.

«بالۋان شولاق سوڭعى سەرىلەرىمىزدىڭ ٴبىرى. ول – كومپوزيتور، بالۋان، ات قۇلاعىندا ويناعان سپورتشى. فيلمدە بالۋان شولاقتىڭ بويىندا بار ونەرىن، ەلىنىڭ قامى ٴۇشىن ٴتۇرلى ەرلىككە بارا الاتىندىعى مەن عالياعا دەگەن ماحابباتىن كورسەتكىمىز كەلەدى. ٴتۇسىرىلىم توبىنداعى بارلىق دەپارتامەنتتەر تۇسىرىلىمگە تولىققاندى دايىن». – دەدى رەجيسسەر.

تۇسىرىلىمدەر اكمولا وبلىسى جانە پاۆلودار وبلىسىندا وتەدى، سونداي-اق كەي ساحنالار «ٴقازاقفيلمنىڭ» پاۆيلوندارىندا تۇسىرىلەتىن بولادى. ٴفيلمنىڭ قويۋشى سۋرەتشىسى ەركىن سۇلەيمەنوۆ ٴفيلمنىڭ نەگىزگى ساحنالارى بولاتىن «جارمەنكە» جانە «بالۋان شولاقتىڭ اۋىلى» دەكوراسيالارىن الماتى وبلىسى جالاڭاش جانە كەگەن اۋىلدارىندا تۇرعىزىلعانى تۋرالى ايتىپ بەردى.

كينوستۋديانىڭ ٴباسپاسوز قىزمەتى ٴمالىم ەتكەندەي، بالۋان شولاقتىڭ رولىنە رەجيسسەر اكتەر ەركەبۇلان دايىروۆتى تاڭداعان. فيلمگە ەلىمىزدىڭ باسقا دا تانىمال تەاتر اكتەرلەرىمەن قاتار دەبيۋتانت-اكتەرلەر دە تۇسەتىن بولادى. ٴتۇسىرىلىم جۇمىستارى 1 ماۋسىمنان الماتى وبلىسىندا باستالادى.

ايتا كەتەيىك، «بالۋان شولاق» كارتيناسى 2017 جىلدىڭ باسىنان دايىندىق كەزەڭىندە بولاتىن. اتالمىش كەزەڭدە باستى جانە قوسالقى رولدەرگە اكتەرلەردى ىرىكتەۋ، رەكۆيزيتتەر: ات ابزەلدەرىن ازىرلەۋ، كەيىپكەرلەر كيىمدەرىن تىگۋ، دەكوراسيالار سوعۋ جۇمىستارى جۇرگىزىلگەن.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!