بالالاردىڭ كەز كەلگەن ٴفيلمدى قازاق تىلىندە كورۋگە قۇقىعى بار – «بولاشاق» قورى

الەمدىك ستۋديالاردىڭ ۇزدىك فيلمدەرىن قازاق تىلىندە دۋبلياجداۋمەن اينالىساتىن «بولاشاق» كورپوروتيۆتىك قورىنىڭ ديرەكتورى دينارا چايجۋنۋسوۆا «بارلىق ٴفيلمدى قازاق تىلىنە دۋبلياجداۋدىڭ قاجەتى جوق» دەگەن قر مادەنيەت جانە سپورت مينيسترلىگى زاڭ قىزمەتى دەپارتامەنتىنىڭ ديرەكتورى كۇمىس سەيىتوۆانىڭ سوزىمەن كەلىسپەيتىنىن ايتتى، دەپ حابارلايدى baq.kz ٴتىلشىسى.

«مەن الەمدىك ستۋديالار كونتەنتىن قازاق تىلىنە دۋبلياجداۋ جوباسىنىڭ (مەلومان كومپانياسىمەن بىرگە disney، marvell، pixar، sony، locofilm 27 ٴفيلمىن قازاق تىلىنە دۋبلياجداعان قور) جەتەكشىسى رەتىندە مادەنيەت پەن ٴتىل سالاسىندا مەملەكەتتىك ساياساتتى جۇزەگە اسىرۋشى ۋاكىلەتتى ورگان وكىلدەرىنىڭ ۇستانىمىمەن كەلىسپەيمىن جانە «الەۋمەتتىك ماڭىزى بار جاعدايدا عانا دۋبلياجداۋ كەرەك» دەگەن مەملەكەتتىك ورگان ۇستانىمى مەن ٴۇشىن تۇسىنىكسىز. الەۋمەتتىك دەگەن قانداي جانە ونى كىم انىقتايدى؟ بۇل تۇتاس مينيسترلىكتىڭ ۇستانىمى ما الدە دەپارتامەنت ديرەكتورى كۇمىس سەيىتتىڭ جەكە پىكىرى مە؟» - دەپ جازعان چايجۋنۋسوۆا instagram-داعى اككاۋنتىندا.

ول ٴوز جازباسىندا قر مادەنيەت جانە سپورت مينيسترلىگى زاڭ قىزمەتى دەپارتامەنتىنىڭ ديرەكتورى كۇمىس سەيىتوۆانىڭ سوزىنە توقتالعان.

«قازاقستاندا ورتاشا ەسەپپەن العاندا جالپى 300-گە جۋىق فيلم كورسەتىلەدى جانە ونىڭ كوپ بولىگى مادەني، پاتريوتتىق، الەۋمەتتىك ٴمانى بولماعان سوڭ بۇل فيلمدەردى قازاق تىلىنە مىندەتتى تۇردە دۋبلياجداۋ قاجەت ەمەس. وسى ورايدا جوعارىدا اتالعان نورماعا بالاما شەشىم رەتىندە «سۋبتيترلاۋ نەمەسە كادردان تىس اۋدارمانى» ەنگىزۋ نورماسىن كىرىستىردىك»، - دەگەن كۇمىس سەيىت.

ال «بولاشاق» كف ديرەكتورى بالالاردىڭ سۋبتيتردى وقىپ وتىرمايتىنىن، قازاقستانداعى بالالاردىڭ فيلمدەردى قازاق تىلىندە كورۋ قۇقىعى بارىن ايتادى.

«قور ٴار ناعىز قازاقتىڭ بالاسى مەن قر ازاماتى الەمدىك ستۋديالاردىڭ ساپالى كونتەنتىنە قازاق تىلىندە قول جەتكىزۋ قۇقىعى بار دەگەن ۇستانىممەن جۇمىس ىستەيدى. مەنىڭ ازاماتتىق ۇستانىمىم – ۇكىمەت كونتەنت پەن اقپاراتتى قولجەتىمدىلىك جاساعاندا ٴورىستىلدى سياقتى، ٴقازاقتىلدى اۋديتوريانىڭ قۇقىعىمەن ساناسۋى ٴتيىس. مەن تەڭ قۇقىقتى، قۇقىقتى شەكتەمەۋدى قولدايمىن. ٴيا، تاريحپەن ەكى ٴتىلدى قولدانۋ قالىپتاستى، بۇل ٴبىزدىڭ كۇشىمىز، ٴبىراق ۇلتىمىزدىڭ سايكەستىگىن، مادەني قازاق كودىن ساقتاۋ ٴۇشىن قازاقستاندىق بالالارعا كەم دەگەندە كىتاپ، كينو، مۋلتفيلم قازاقشا ساپالى كونتەنت تە قولجەتىمدى بولۋى مىندەتتى. ٴيا، قيىن بولسا دا بۇل مۇمكىن نارسە»، - دەيدى ول.

ول كينو تۋرالى زاڭناما قازاق ٴتىلى يدەولوگياسىن كۇشەيتىپ، كەم دەگەندە بارلىق بالالار كونتەنتىن قازاق تىلىندە دۋبلياجداۋ مەن پروكاتتاۋدى قولداۋى ٴتيىس دەپ ەسەپتەيدى. قۇراستىراتىن، دۋبلياج جانە پروكاتتاۋ ٴۇشىن جۇمىس ىستەيتىن كينەماتوگراف ۇيىمدارىن ۇسىنىلعان سالىقتىق جەڭىلدىكتەرمەن ىنتالاندىرۋى ٴتيىس.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!