استانا: 
استانادا وتەتىن «ەكسپو-2017» حالىقارالىق مامانداندىرىلعان كورمەسى اياسىندا استانادا «قازاقستان» ۇلتتىق ارناسىنىڭ ۇيىمداستىرۋىمەن قىتاي كينوسىنىڭ اپتالىعى باستالدى. ايتۋلى شاراعا قىتاي ەلىنىڭ اڭىزعا اينالعان كينواكتەرى، پروديۋسەر دجەكي چان قاتىستى، دەپ حابارلايدى baq.kz ٴتىلشىسى.
وسىعان وراي قازمەديا ورتالىعىندا كينو ونەرىنىڭ كورولىمەن كەزدەسۋ ٴوتتى. كەزدەسۋ بارىسىندا جۋرناليستەر قويعان ساۋالدارعا جاۋاپ بەرگەن چۋڭ لۋڭ الەمدە كۋنگ-فۋ مەكتەبىن اشقىسى كەلەتىنىن، سوعان وراي قازاقستاندا دا بۇل مەكتەپ بوي كوتەرەتىنىن جەتكىزدى.
«ٴقازىر بەيجىڭدە كۋنگ-فۋ بويىنشا جاتتىعۋلار جۇرگىزۋدەمىز، الداعى جىلى وندا مەكتەبىمىزدى رەسمي تۇردە اشۋعا نيەتتىمىز. سوندىقتان دا وسى مۇمكىندىكتى پايدالانا وتىرىپ، وسى ونەرگە قىزىعۋشىلىق تانىتقان ادامدار بەيجىڭگە كەلىپ، كۋنگ-فۋدى مەڭگەرۋدى وتىنەر ەدىم. بۇگىندە وسى سالاداعى جۇمىستارىمىز جاڭادان قارقىن الۋدا، وسى ورايدا بولاشاقتا بارشا الەمدە مەكتەپتەردى اشۋعا نيەتتىمىن. مۇمكىن قازاقستاندا دا كۋنگ-فۋ مەكتەبى اشىلىپ قالار»، - دەيدى تانىمال اكتەر.
الەمدىك دەڭگەيدە اڭىزعا اينالعان دارا تۇلعا كوپ جىلدان بەرى قايىرىمدىلىق شاراسىمەن دە اينالىسىپ كەلەدى. ونىڭ قايىرىمدىلىق شارالارى الەمدىك باق-تاردا ۇنەمى جازىلىپ وتىرادى.
«مەن ٴارقاشاندا وسى باعىتقا ۇلەسىمدى قوسۋعا ٴازىرمىن. سوندىقتان باق كومەك قاجەت ەتەتىن پروبلەمالار جايىندا ٴجيى مالىمەت تاراتسا دەگەن ۇسىنىسىم بار. شىن مانىندە قازاقستان جايىندا تولىق بىلمەيمىن. نەگىزىنەن الەم بويىنشا قايىرىمدىلىقپەن اينالىسقان كەزدە باق وكىلدەرى ماعان قانداي كومەكتى كورسەتۋگە بولاتىندىعى جايىندا حاباردار ەتەتىن»، - دەدى دجەكي چان.
فوتو، ۆيدەو: ابزال قاليەۆ
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
3152 
0
ەرجان جاۋباي 
5280
0