«اناعا اپارار جول» ٴفيلمى گرەكيادا كورسەتىلەدى

24 مامىر كۇنى «اناعا اپارار جول» ٴفيلمى گرەكيادا كورسەتىلەدى. بۇل تۋرالى «قازاقفيلم» اق ٴباسپاسوز قىزمەتى ٴمالىم ەتتى، دەپ حابارلايدى baq.kz.

گرەكيانىڭ احارنون قالاسىندا قازاقستان مەن گرەكيا اراسىنداعى ديپلوماتيالىق قاتىناستارىنىڭ 25-جىلدىعىنا وراي قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق جانە «نوۆىي مير» جشس-سىمەن بىرلەسە تۇسىرىلگەن «اناعا اپارار جول» ٴفيلمى كورسەتىلەدى. مادەني ٴىس-شارانى ەلىمىزدىڭ گرەكيا رەسپۋبليكاسىنداعى ەلشىلىگى، قر مادەنيەت جانە سپورت مينيسترلىگى جانە ش.ايمانوۆ اتىنداعى «قازاقفيلم» اق ۇيىمداستىرىپ وتىر.

رەجيسسەر اقان ساتايەۆ تۇسىرگەن فيلم ٴومىردىڭ اۋىرتپالىعىنا توتەپ بەرگەن، قيىن قىستاۋ كۇندەرى سۇراپىل سوعىستىڭ مەحناتىن كورگەن باستى كەيىپكەردىڭ تاعدىرىن باياندايدى. وقيعانىڭ نەگىزگى جەلىسى قازاق حالقىنىڭ باسىنا تۇسكەن اۋىر كەزەڭدى – ۇجىمداستىرۋ، جۇت، سوعىس جانە سوعىستان كەيىنگى جىلداردى قامتيدى.

اتالعان تاريحي تۋىندى ٴ38-شى حالىقارالىق ماسكەۋ كينوفەستيۆالىندە جانە «ەۋرازيالىق كوپىر» اتتى فەستيۆالگە قاتىسىپ، باس جۇلدەنى، سونىمەن قاتار اكتريسا التىناي نوگەربەك «ۇزدىك ايەل ادام ٴرولى» نوميناسياسىندا جەڭىسكە جەتتى.

ودان بولەك، بۇل تۋىندى بيىل قازاقستان كينوسىنشىلار اسسوسياسياسى ۇيىمداستىرعان «سىنشىلار تاڭداۋى» جۇلدەسىندە ٴۇش بىردەي جۇلدەنى يەمدەندى. اتاپ ايتساق، «ەڭ ۇزدىك اكتريسا» - التىناي نوگەربەك; «ەكىنشى پلانداعى ۇزدىك اكتريسا» ارۋجان جازىلبەكوۆا; «فيلمگە جازىلعان ۇزدىك مۋزىكا» نوميناسياسىن اتالمىش ٴفيلمنىڭ كومپوزيتورلارى ٴالىم زايروۆ پەن رومان ۆيشنەۆسكيي يەمدەندى.

ايتا كەتەيىك، كينوتۋىندى جاقىندا عانا بىشكەكتە وتكەن «اق ٴىلبىرىس» اتتى vi ۇلتتىق كينوجۇلدەسىندە ورتالىق ازيانىڭ ۇزدىك ٴفيلمى اتاندى.

ەسكە سالا كەتسەك، «اناعا اپارار جول» ٴفيلمى 24 مامىردا ساعات 19:00-دە احارنون اكىمدىگى زالىندا كورسەتىلەدى. كىرۋ تەگىن.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!