استانا: 
1195 
0
اقپارات جانە كوممۋنيكاسيالار مينيسترلىگى 2017 جىلى «حابار» جانە «قازاقستان» تەلەارنالارىنىڭ بازاسىندا 81 وتاندىق تەلەحيكايا مەن 17 دەرەكتى فيلم ٴتۇسىرۋدى جوسپارلاپ وتىر. بۇل تۋرالى قر اكم جاۋاپتى حاتشىسى جانات قوجاحمەتوۆ باياندادى، دەپ حابارلايدى bnews.kz.
بۇگىن قر ماجىلىسىندە قارجى جانە بيۋدجەت جونىندەگى كوميتەت وتىرىسى ٴوتتى. وندا 2017-2019 جىلدارعا ارنالعان رەسپۋبليكالىق بيۋدجەتتىڭ زاڭ جوباسى قارالدى. ماجىلىسكە جينالعان دەپۋتاتتار قازاقستاندىق تەلەارنالاردان كورسەتىلەتىن شەتەلدىك كونتەنتتىڭ كوپتىگىنە نارازىلىق ٴبىلدىردى.
«قازاقستاندىق تەلەارنالار ٴبىزدىڭ بولمىسىمىزعا ساي كەلمەيتىن شەتەلدىك باعدارلامالاردى ٴجيى كورسەتەدى. سونىمەن بىرگە، وزگە ەلدىڭ تەدەحيكايالارى تۇرعىندار اراسىندا كەرى پىكىر تۋدىرىپ وتىر. نەگە وتاندىق تەلەحيكايالار از؟»، - دەگەن ساۋالدى الەۋمەتتىك-مادەني دامۋ كوميتەتىنىڭ مۇشەسى، دەپۋتات فاحريددين قاراتايەۆ قر اكم وكىلدەرىنە قويدى.
مينيسترلىكتىڭ جاۋاپتى حاتشىسى جانات قوجاحمەتوۆ مۇنداي ماسەلەنىڭ بار ەكەندىگىمەن كەلىستى جانە بۇل ولقىلىقتىڭ ورنىن تولتىرۋ ٴۇشىن اتقارىلىپ جاتقان بەلسەندى جۇمىس تۋرالى باياندادى.
«راسىمەن دە، وتاندىق تەلەحيكايالارعا قاتىستى مۇنداي پروبلەما بار. ٴقازىر مينيسترلىك بۇل ماسەلەنى شەشۋ جولدارىن قاراستىرىپ جاتىر. جوسپارداعى زاڭ جوباسىندا شەتەلدىك تەلەارنالاردان كەلەتىن ٴتۇرلى ونىمگە شەكتەۋ قويۋ قاراستىرىلعان. ال قارجى جاعىنا كەلەتىن بولساق، 2017 جىلعا ارنالعان بيۋدجەتتە «حابار» جانە «قازاقستان» تەلەارنالارىنىڭ بازاسىندا 81 وتاندىق تەلەحيكايا مەن 17 دەرەكتى فيلم ٴتۇسىرۋ قاراستىرىلعان»، - دەيدى جاۋاپتى حاتشى.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5284
0