BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

نيگەريالىق ستۋدەنت: قازاقستانداعى ۇلتتار دوستىعىنا ٴتانتىمىن

ەرتىس ٴوڭىرى - ٴجۇزى باسقا، تىلەگى ٴبىر ۇلتتاردىڭ التىن بەسىگى. بۇگىندە وبلىستا 130-دان استام ۇلت وكىلى ٴتاتۋ-تاتتى ٴومىر ٴسۇرىپ جاتىر. وزگەلەرگە، ٴتىپتى افريكا ەلدەرىنە ۇلگى بولارلىق ٴىس. بۇل - سوناۋ نيگەريادان پاۆلودارعا ٴبىلىم قۋىپ كەلگەن ستۋدەنتتىڭ پىكىرى. قازاقستان حالقى بىرلىگى كۇنى نوا سالاكومەن baq.kz ايماقتاعى ٴتىلشىسى جۇزدەسكەن ەدى.

پاۆلودار مەن نيگەريا ەلى اراسىنداعى قاشىقتىق 8 مىڭ شاقىرىمعا جۋىقتايدى. 18 جاسار نوانىڭ سوناۋ قارا قۇرلىقتان پاۆلودارعا نە ىزدەپ كەلدى؟ وسىنداي سۇراقتىڭ تۋىنداۋىن زاڭدى قۇبىلىس دەپ بىلەمىز.

«قازاقستاندىق جوعارى وقۋ ورنىنا ٴتۇسۋ مۇمكىندىگى تۋرالى تانىستارىمنان ٴبىلدىم. نەگە ەكەنىن بىلمەيمىن، بۇل يدەيا ماعان ۇناپ قالدى. وسىدان ٴۇش جىل بۇرىن سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىنە شاقىرتۋ الدىم. مەن ٴۇشىن بەلگىسىز ەلدىڭ توپىراعىن باسۋ زور قىزىعۋشىلىق تۋدىردى. ويلانباستان قازاقستانعا ۇشىپ كەلدىم. باستاپقىدا جەرگىلىكتى كليماتقا ۇيرەنسىنە الماعانمىن، قازىرگى ۋاقىتتا بەيىمدەلىپ كەتتىم»، - دەيدى نوا سالاكو.

بۇگىنگى تاڭدا نيگەريالىق ازامات ماشينا جاساۋ، مەتاللۋرگيا جانە كولىك فاكۋلتەتىنىڭ ستۋدەنتى اتاندى.

«ٴبىزدىڭ ۋنيۆەرسيتەتتە ٴتۇرلى ۇلت وكىلى ٴبىلىم الادى. ٴبىزدىڭ ورتاق ماقساتىمىز – ساپالى ٴبىلىم الىپ، كاسىبي مامان اتانۋ. جوعارى وقۋ ورنىندا ستۋدەنتتىك اسسامبلەيا جۇمىس ىستەيدى. ٴبىلىم عانا ەمەس، تاجىريبە الماسۋعا دا زور مۇمكىندىكتەر بار. مەنىڭ بولاشاق ماماندىعىم تۋعان جەرىمدە جوعارى سۇرانىسقا يە»، - دەيدى ول.

ەلىمىزدىڭ ٴتىلى مەن مادەنيەتىن بىلمەگەندىكتەن، الدىمەن س. تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ foundation فاكۋلتەتىندە ٴبىر جىل بويى ورىس ٴتىلىن مەڭگەردى. قازىرگى ۋاقىتتا ورىس ٴتىلى ٴتاپ-تاۋىر. قازاق تىلىنە دەگەن تالپىنىسى جاقسى.

«پاۆلودارعا كەلگەندە نە ورىس، نە قازاق ٴتىلىن بىلمەدىم. بۇگىندە ٴبىراز ۇيرەندىم. قازاق تىلىندە العاش رەت ەستىگەنىم «قالايسىڭ؟» دەگەن ٴسوز ەدى. جاڭا دوستارىمنىڭ ارقاسىندا جەرگىلىكتى جۇرتتىڭ تىلىنە، مادەنيەتىنە جانە مىنەز-قۇلقىنا ٴسىڭىسىپ كەتتىم. بۇگىندە قازاق اۋىزەكى ٴتىلىن مەڭگەرىپ الدىم. وتباسىم تۋرالى ايتىپ كەتسەم. انام – اعىلشىن ٴتىلى ٴپانىنىڭ وقىتۋشىسى. اكەم – بۋحگالتەر مامانى. مەن – وتباسىمنىڭ كەنجەسىمىن»، - دەيدى نوا.

ستۋدەنت قازاق حالقىنىڭ قوناقجايلىلىعىنا ٴتانتى ەكەنىن جەتكىزدى.

«شىنى كەرەك، قازاقستانداعى ۇلتتار دوستاستىعى تۋرالى بىلگەندە، تاڭ قالدىم. سەبەبى، قازاق ەلىندەگى اسسامبلەيا تۋرالى ەستىگەندە قاتتى تاڭداندىم. بۇل – بارشامىزعا ۇلگى بولارلىق ٴىس قوي. ٴبىزدىڭ ەلدە وسىنداي بىرەگەي ينستيتۋت جوق. قازاقستاندا العاش رەت جىلقى ەتىن جەگەنىمدى ەشقاشان ۇمىتپاسپىن. ناۋرىز جانە بىرلىك كۇنى مەرەكەلەرىندى ٴداستۇرلى تۇردە ورتالىق الاڭعا شىعىپ، اتاپ وتەمىن. قازاقستانداعى وزگە ۇلتتاردىڭ بىرلىگى نىعايا بەرۋىنە تىلەكتەسپىن!» - دەيدى افريكاندىق.

ايتا كەتەيىك، بۇگىنگى تاڭدا قحا پاۆلودار وبلىستىق فيليالىنىڭ جانىندا 24 ەتنومادەني بىرلەستىك بار. ۇلتتار تۋعان تىلدەرى مەن مادەنيەتتەرىن جاڭعىرتۋ مۇمكىندىگىنە يە. سونىمەن قاتار، ۇلتتىق جاڭعىرۋ مەكتەبى بار. بۇل مەكتەپتە ۇلتتار تۋعان تىلدەرىن مەڭگەرۋدە. ٴتىپتى، چۋۆاش ٴتىلى سياقتى سيرەك كەزدەسەتىن تىلدەردى وقىتۋ ۇيىرمەلەرى بار.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي