BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«كىمنەن ۇلگى الارىمىزدى بىلمەدىك». تابىستى كاسىپكەر قيىندىقتاردى قالاي جەڭگەنىن ايتىپ بەردى

استانا قالاسىنداعى قر تۇڭعىش پرەزيدەنتى – ەلباسىنىڭ كىتاپحاناسىندا قازاقستان حالقى اسسامبلەياسىنىڭ باستاماسىمەن «100 جاڭا ەسىم» جوباسىنىڭ جەڭىمپازدارى وقۋشىلارمەن شىعارماشىلىق كەزدەسۋ وتكىزدى، دەپ حابارلايدى baq.kz ٴتىلشىسى.

قحا ٴتوراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو اتالعان شارانىڭ قانداي ماقساتتا ۇيىمداستىرىلعانىن ٴتۇسىندىردى.

«قحا «100 جاڭا ەسىم» جوباسىنىڭ كەلەسى كەزەڭىن جۇزەگە اسىرۋدا. ٴبىز شىعارماشىلىق كەزدەسۋىمىزدى «100 جاڭا ەسىم» جوباسىندا جەڭىسكە جەتكەن ازاماتتاردان ۇلگى السىن دەپ وسى شارانى ۇيىمداستىردىق. ولاردان ٴاربىر قازاقستاندىق ونىڭ ىشىندە جاستار ۇلگى الۋى قاجەت. اتالعان جوبادا جەڭىسكە جەتكەن ٴاربىر ازاماتتىڭ ٴومىر جولى – دايىن ٴفيلمنىڭ سسەنارييى ىسپەتتى نەمەسە كوركەم شىعارماداي»، - دەدى ول.

سونىمەن قاتار ٴىس-شاراعا قر تۇڭعىش پرەزيدەنتى – ەلباسىنىڭ كىتاپحاناسى ديرەكتورىنىڭ ورىنباسارى امەرحان راحيمجانوۆ، قحا «جاڭعىرۋ جولى» جاستار قوزعالىسىنىڭ مۇشەلەرى، ستۋدەنتتەر مەن مەكتەپ وقۋشىلارى قاتىستى.

كەزدەسۋ بارىسىندا «100 جاڭا ەسىم» جوباسىنىڭ جەڭىمپازى يسلامبەك سالجانوۆ ٴوزىنىڭ قالاي تابىستى كاسىپكەر اتانعانىن ايتىپ بەردى.

«90 جىلدار. ەلىمىزدە ەكونوميكالىق داعدارىس بولدى. سول ۋاقىتتا قازاقستاندا ەكىنشى دەڭگەيلى بانك تە جانە «جەكە بيزنەس» دەگەن اتىمەن بولعان جوق. مەن 1993 جىلى مەديسينالىق ۋنيۆەرسيتەتتى ٴبىتىردىم. سودان كەيىن جەكە كاسىبىمدى اشۋعا بەل بۋدىم. جاعداي وتە اۋىر بولدى. سەبەبى، ٴبىز كىمنەن ۇلگى الارىمىزدى بىلمەدىك. ٴتىپتى وسى سالاعا ارنالعان ادەبيەت تە بولعان جوق. تەك قولىمىزدا ەسكى دەيل كارنەگيدىڭ كىتابى بولاتىن. سونى وقىپ، كاپيتاليزمنىڭ نە ەكەنىن تۇسىندىك. سول ۋاقىتتا جاس بولدىق ٴارى بويىمىزدا وز-وزىمىزگە دەگەن سەنىمدىلىك بولدى»، - دەيدى ول وقۋشىلارعا.

وسى ورايدا كاسىپكەر ٴومىر جولىنداعى قيىندىقتاردى ەڭسەرۋگە كىتاپتار كوپ كومەگىن تيگىزگەنىن اتاپ ٴوتتى.

«ماعان تابىسقا جەتۋگە كىتاپتاردىڭ كومەگى كوپ ٴتيدى. الدىڭا ۇلكەن ماقسات قويىپ، مىقتى كومپانيالار مەن تابىستى كاسىپكەرلەردەن ۇلگى الۋ كەرەك. مەن كوپ وقىدىم جانە ٴقازىر دە كوپ كىتاپ وقيمىن. كىتاپ وقۋ ٴومىر سۇرۋگە دەگەن قۇشتارلىقتى وياتادى. ومىردە كوپ قيىندىقتى باسىمنان وتكىزدىم. ٴبىراق مەن سول قيىندىقتاردى جەڭە ٴبىلدىم»، - دەدى يسلامبەك سالجانوۆ.

سونداي-اق ول جاستارعا اعىلشىن ٴتىلىن ۇيرەنۋگە كەڭەس بەردى.

«جاڭا نارىقتارعا شىعۋ ٴۇشىن اعىلشىن ٴتىلىن ۇيرەنۋ كەرەك. مەن ەلىمىزدەگى ٴۇش تۇعىرلى ساياساتتى قولدايمىن. ٴۇش تىلدە سويلەيتىن قازاقستاندىق جاستاردى ماقتان تۇتامىن. اعىلشىن ٴتىلى - حالىقارالىق ٴتىل ٴارى بيزنەستىڭ ٴتىلى. ونى مەڭگەرسەڭدەر جاڭا مۇمكىندىكتەرگە يە بولاسىڭدار. «رۋحاني جاڭعىرۋ» باعدارلاماسى اياسىندا گۋمانيتاريا سالاسىنداعى 100 ۇزدىك وقۋلىقتى قازاق تىلىنە اۋدارىپ جاتىرمىز. ٴبىراق بارلىق كىتاپتى اۋدارۋ مۇمكىن ەمەس. سوندىقتان سىزدەردى كىتاپتى ٴتۇپنۇسقادا وقۋلارىڭىزعا كەڭەس بەرەمىن. ول ٴۇشىن اعىلشىن ٴتىلىن ٴبىلۋ كەرەك. سەبەبى، اعىلشىن ٴتىلى زامان اعىمىنا ىلەسۋگە جول اشادى»، - دەپ تۇيىندەدى ٴسوزىن كاسىپكەر.

سونىمەن قاتار كەزدەسۋدە «100 جاڭا ەسىم» جوباسىنىڭ جەڭىمپازدارى ناتاليا دەمەنتەۆا، نۇرجان جولدىبالينوۆ، ماكسيم چەرنۋسكيي دە ستۋدەنتتەر مەن وقۋشىلارعا وزدەرىنىڭ قالاي تابىسقا جەتكەنىن ايتىپ،ولاردىڭ سۇراقتارىنا جاۋاپ بەردى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي