BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەتنومادەني ورتالىق ٴتوراعاسى: قازاقستاندا بارلىق ۇلتتىڭ قۇقىعى تەڭ ەكسكليۋزيۆ

قازاقستاندا بارلىق ۇلت وكىلىنىڭ قۇقىعى تەڭ، ەشقايسىسىنا قاتىستى كەمسىتۋگە ورىن جوق. بۇل جونىندە استانا قالاسىنداعى «ۆايناح» شەشەن-ينگۋش ەتنومادەني ورتالىعىنىڭ ٴتوراعاسى سالمان گەروەۆ مالىمدەدى، دەپ حابارلايدى baq.kz ٴتىلشىسى.

«مەن ٴقازىر ٴبىزدىڭ ٴداستۇرىمىز جوعالىپ بارا جاتىر دەي المايمىن. ەلىمىز ەگەمەندىك العان سوڭ ٴبىز ٴوزىمىزدىڭ ەتونومادەني ورتالىعىمىزدى قۇردىق تا، ٴوز مادەنيەتىمىزدى «ۆايناح» ٴانسامبلى ارقىلى دامىتىپ كەلەمىز. ونىڭ قۇرامىندا 120 ادام بار. بۇل ينگۋشتەر مەن شەشەندەر عانا ەمەس، بۇل قازاقتار، ورىستار، ۋكرايندەر دە. وسى انسامبل ارقىلى ٴبىز ٴوسىپ كەلە جاتقان ۇرپاقتى وزگە ۇلتتىڭ مادەنيەتىن قۇرمەتتەۋگە، تولەرانتتىلىققا تاربيەلەيمىز. سونىمەن قاتار، ٴبىز مادەنيەت كەشتەرىن ۇيىمداستىرىپ، وعان باسقا ۇلت وكىلدەرىن شاقىرامىز. بۇل كەشتە ٴبىزدىڭ ساحنامىزدا دومبىرا وينالىپ، ۋكراين مەن ورىس جانە تاعى باسقا ۇلتتاردىڭ اندەرى ايتىلادى»، - دەدى ورتالىق ٴتوراعاسى.

سونىمەن قاتار، سالمان گەروەۆ ينگۋش حالقى دا قازاقتار سەكىلدى قوناقجاي حالىق ەكەنىن ايتتى.

«كەلگەن قوناقتى تورگە شىعارىپ، ٴۇي يەسى ەسىك اۋزىندا وتىرادى. بۇل ٴوز قوناقتارىن تونەر قاۋىپتەن قورعاپ وتىرعانىن، قوناقتاردىڭ ٴوز داستارحانىنان امان-ەسەن تۇرۋىنا جاۋاپ بەرۋىن بىلدىرەدى. ٴبىز قوناقجايلىلىقتى اسا قۇرمەت تۇتامىز، كەلگەن قوناقتى ەشقاشان بەتىنەن قاقپايمىز. قوناق ۇيگە بەرەكە الىپ كەلەدى دەگەن سەنىم بار. ەگەر، كەلگەن قوناق ٴبىزدىڭ ٴتىلدى بىلمەسە، ٴبىز وعان قولجەتىمدى تىلدە سويلەسىپ، استىڭ ٴدامدىسىن، سۇيەكتىڭ ەتتىسىن، بار ٴتاتتىنى الدىنا قويامىز. قوناقتى قۇدايىنداي كورەتىن حالىقتاردىڭ ٴبىرىمىز. جالپى، باسقا ۇلتتارمەن دوستىق قارىم-قاتىناستا بولۋ ٴبىزدىڭ قانىمىزدا بار قاسيەت. سول سياقتى، بىزدە دە ۇلكەنگە قۇرمەت كورسەتۋگە باسا نازار اۋدارىلادى جانە جاستاردى وسىعان تاربيەلەيمىز.

سوندىقتان بولسا كەرەك، ينگۋشەتيادا قارتتار ٴۇيى، بالالار ٴۇيى جوق. شاڭىراعىنىڭ قارياسىن قارتتار ۇيىنە قالدىرىپ، پەرزەنتىنەن باس تارتۋ بىزدە ناعىز ماسقارا بولىپ سانالادى. وسى داستۇرلەر بىزدە وتە بەرىك ۇستالادى، قاتاڭ ساقتالادى. ال قازاق حالقى مەن ينگۋشتەر اراسىنداعى ۇقساستىققا كەلەر بولساق، وندا تاعى دا سول قوناقجايلىلىقتى ايتار ەدىم. مەن قازاقتاردىڭ داستارحانىنان ٴدام تاتىپ، قازاقتاردىڭ شاڭىراعىندا كوپ قوناقتا بولامىن. ٴدامنىڭ ٴتاتتىسىن ۇسىنىپ، قوناققا بارىنشا قۇرمەت كورسەتۋ جاعىنان ۇقساستىعىمىز كوپ. سەبەبى، ٴبىزدىڭ ٴداستۇرلى ٴدىنىمىز ٴبىر، بىزدە سۋننيتەرمىز. سوندىقتان، سالت-داستۇردە دە ٴبىرشاما ۇقساستىقتار بار»، - دەدى ول.

شەشەن-ينگۋش ەتنومادەني ورتالىعىنىڭ ٴتوراعاسى قازاقستاندا بارلىق ۇلتتىڭ كونستيتۋسيالىق قۇقىعى تەڭ بولىپ تىرشىلىك ەتۋى ەلباسىنىڭ وڭ ساياساتىنىڭ ارقاسى ەكەنىن اتاپ ٴوتتى.

«قازاقستان حالىقتارىنىڭ بىرلىگى كۇنى بولىپ تابىلاتىن 1 مامىر – بۇل ٴبىزدىڭ ەلىمىزدەگى بارلىق ۇلتتاردى ٴبىر شاڭىراق استىنا ۇيىستىراتىن بەرەكەلى مەيرام. بۇل - بىرلىك پەن دوستىق مەرەكەسى. بۇل - كوكتەم مەرەكەسى. ٴبىز كونستيتۋسياعا سايكەس ٴوز قۇقىقتارىمىز بەن تەڭدىگىمىزدى بەلگىلەدىك. قازاقستاندا بارلىق ۇلت وكىلىنىڭ قۇقىعى تەڭ. ەشكىمگە قاتىستى ادىلەتسىزدىك كورسەتۋگە نەمەسە كەمسىتۋگە ورىن جوق. قازاقستاندا 18 مىڭ ينگۋش تۇرادى. بۇگىنگى كۇنى ينگۋشتەر ٴوز مادەنيەتىن، ٴسالت-داستۇرىن ساقتاپ قانا قويماي، ونى ودان ٴارى دامىتۋعا مۇمكىندىگى زور. وسىنىڭ بارلىعى ەلباسىنىڭ وڭ ساياساتىنىڭ ارقاسىندا»، - دەدى سالمان گەروەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي