BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قالي سارسەنباي: ەندى جاستار پاتەر جاعالاماي، الاڭسىز ٴبىلىم الاتىن بولادى

تانىمال جۋرناليست، قر پرەزيدەنتى سىيلىعىنىڭ جانە قازاقستان جۋرناليستەر وداعى سىيلىعىنىڭ لاۋرەاتى «الماتى اقشامى» گازەتىنىڭ باس رەداكتورى قالي سارسەنباي قازاقستان حالقى اسسامبلەياسىنىڭ xxvi سەسسياسىندا ٴسوز سويلەپ، پرەزيدەنتكە ەلىمىزدەگى ٴبىلىم، دەموگرافيا جانە پرەزيدەنت ۇسىنعان باعدارلامالار جايلى ايتتى، دەپ حابارلايدى baq.kz اقپارات اگەنتتىگى. نازارلارىڭىزعا قالي سارسەنبايدىڭ ٴسوزىن ۇسىنامىز.

قۇرمەتتى نۇرسۇلتان ٴابىش ۇلى!

«ەڭ الدىمەن ەل قامى، سودان كەيىن قالعانى» دەپ قادىر اقىن ايتقانداي، ٴسىز تاۋەلسىزدىكتىڭ العاشقى كۇندەرىنەن باستاپ ەلدىڭ الەۋمەتتىك جاعدايىن باستى ورىنعا قويىپ كەلەسىز.

سونىڭ ناتيجەسىندە بۇگىندە قازاقستاندا قارەكەت قىلعان ادامعا، ٴىستىڭ ٴجونىن ٴبىلىپ، جولىن تاپقان جانعا بارلىق مۇمكىندىك جاسالعان.

ۇدايى ٴسىزدىڭ قامقورلىعىڭىزدا، نازارىڭىزدا تۇراتىن الماتى – ەل ەكونوميكاسىنىڭ قوزعاۋشى كۇشى، وتانىمىزدىڭ مادەني-رۋحاني ورداسى، ٴبىلىم مەن عىلىمنىڭ، سپورت پەن ٴتۋريزمنىڭ ورتالىعى.

ەل ومىرىنە زور سەرپىلىس اكەلگەن «پرەزيدەنتتىڭ 5 الەۋمەتتىك باستاماسىن» الماتىلىقتار ايرىقشا ىقىلاسپەن قابىل الدى.

قالانىڭ بيىلعى بيۋدجەتى قايتا قارالىپ، بارىنشا الەۋمەتتىك سيپاتقا يە بولدى، ناقتى جوبالار قولعا الىنىپ، ولارعا 65 ميلليارد تەڭگە قاراستىرىلدى.

ٴقازىر ەلىمىز بويىنشا 500 مىڭعا جۋىق ستۋدەنت بولسا، ونىڭ جارتىسىنا جۋىعى – اۋىلدان، يا باسقا قالالاردان كەلىپ وقيتىن بالالار.

سونىڭ ىشىندە الماتىنىڭ جوعارى وقۋ ورىندارىندا 140 مىڭعا جۋىق ستۋدەنت وقيدى، كوللەدجدەردە 27 مىڭنان استام جاس تەگىن ٴبىلىم الىپ جاتىر.

بىلتىر مەگاپوليستە 2 مىڭ ورىندىق 4 جاتاقحانا سالىنسا، ەندى ٴسىزدىڭ تاپسىرماڭىز بويىنشا 2020 جىلعا دەيىن تاعى 20 جاتاقحانا سالۋ جوسپارلانعان.

9 جوعارى وقۋ ورنى ٴوز كۇشتەرىمەن 6 مىڭ ورىندىق جاتاقحانالاردى سالۋعا كىرىسپەك.

وسىلايشا، جاستار ەندى پاتەر جاعالاماي، الاڭسىز ٴبىلىم الاتىن بولادى.

قالاداعى بالاسىنىڭ جاعدايى جاقسارعان سوڭ اۋىلداعى اتا-انانىڭ دا كوڭىلى جايلانادى.

ٴسىزدىڭ تاپسىرماڭىزبەن كولەمى 2 ەسەگە جۋىق ارتاتىن شاعىن نەسيەلەر ولاردىڭ تىرشىلىگىن وڭداۋعا سەپ بولادى.

قۇرمەتتى نۇرسۇلتان ٴابىش ۇلى!

جالپى، وتكەن 26 جىلدا ەلىمىزدە 1 ميلليون 100 مىڭ وتباسى قونىس تويىن تويلاپتى.

ەندى ولاردىڭ قاتارى ارزان يپوتەكالىق نەسيە ارقىلى تاعى دا مىڭداعان وتباسىمەن تولىققالى وتىر.

«تۇرعىن ٴۇي جيناق بانكىنەن» ەسەپشوت اشقان 24 مىڭعا جۋىق الماتىلىق ٴدال قازىرگى ساتتە ارزان نەسيەنىڭ جوعارعى شەگىنىڭ 20 پايىزىنان اساتىن قارجى جيناپتى.

ياعني، باعدارلاما باستالا سالىسىمەن الماتىدا تۇراتىن 24 مىڭ وتباسىنىڭ بىردەن پاتەر الۋعا مۇمكىندىگى بار دەگەن ٴسوز.

بۇل – اسىرەسە، بيۋدجەت سالاسىندا ەڭبەك ەتەتىن ازاماتتارعا زور مۇمكىندىك.

سوڭعى 20 جىلدا قازاقستانداعى بيۋدجەت قىزمەتكەرلەرىنىڭ ورتاشا جالاقىسى 17 ەسەگە ارتقان.

ەلىمىزدە 400 مىڭعا جۋىق ٴمۇعالىم مەن 72 مىڭنان استام دارىگەر بار.

ولاردىڭ ٴومىر ساپاسى – جالپى حالىقتىڭ ٴومىر ساپاسى دەگەن ٴسوز.

سونداي-اق، ٴسىزدىڭ باستاماڭىز بويىنشا شامامەن 2 ميلليون ادام ەندى سالىق جەڭىلدىگىنە يە بولادى ەكەن، ونىڭ 210 مىڭنان استامى الماتىدا تۇرادى.

تيىسىنشە، وسىنشا ادامنىڭ جالاقىسى كوبەيەدى.

ال، قوسىمشا 20 مىڭ ٴبىلىم گرانتى – بولاشاققا سەنىممەن قادام باساتىن تاعى 20 مىڭ بالا دەگەن ٴسوز.

ەسەپتەپ قاراساق، سونىڭ شامامەن 6،5 مىڭى تاعى الماتىعا تيەسىلى بولادى ەكەن.

جالپى، «5 الەۋمەتتىك باستامانى» كەشەندى تۇردە قولعا الىنعان بىرەگەي الەۋمەتتىك باعدارلاما دەۋگە بولادى.

ٴبىر اۋىز سوزبەن ايتىلا سالاتىن قۇرعاق سيفرلاردىڭ ارتىندا ميلليونداعان ادامنىڭ تاعدىرى تۇر.

ارينە، ٴومىر بولعان سوڭ قيىن جاعدايعا تاپ بولعان جاندار كەز-كەلگەن قوعامدا كەزدەسەدى.

ٴبىراق، حالقىمىزدىڭ بويىنداعى جاناشىرلىق، قامقورلىق، اياۋشىلىق سەكىلدى ىزگى قاسيەتتەر ەشكىمنىڭ قايراڭعا شىعىپ قالۋىنا جول بەرمەيدى.

جەر اۋدارىلىپ، ارىپ-اشىپ كەلگەن ميلليونداعان ادامدى حالقىمىز ٴوز باسىنا كۇن تۋعان قيىن كۇندەردىڭ وزىندە سىرتقا تەپپەي، باۋىرىنا باسقان.

ونداي جاعداي ٴسىزدىڭ وتباسىڭىزدا دا بولعانىن جاقسى بىلەمىز.

بىرلىك پەن تاتۋلىق – حالقىمىزدىڭ قانىندا بار قاسيەت.

ٴقازىر زامان قانشا وزگەردى دەگەنمەن، وسىناۋ ىزگىلىكتەر ٴبىزدىڭ تامىرىمىزدا تۋلاپ جاتىر.

«رۋحاني جاڭعىرۋ» ٴبىزدى اتا-بابالاردان ميراس بولعان وسىناۋ اسىل قۇندىلىقتاردى قازىرگى زامانعا قاجەت قاسيەتتەرمەن ۇشتاستىرىپ، قاتار الىپ جۇرۋگە جەتەلەيدى.

قازاق «بالانى ۇلشا تاربيەلەسەڭ ۇل، قۇلشا تاربيەلەسەڭ قۇل بولماقشى» دەگەن.

ٴبىزدىڭ ارتىمىزدان ۇلتتىق جانە ازاماتتىق سانا-سەزىمى مەن زاماناۋي ٴبىلىمى قاناتتاسا دامىعان مىقتى بۋىن ٴوسىپ كەلەدى.

ولاردىڭ اياق الىسى مەن ٴسىز جاساپ وتىرعان قامقورلىقتى، ٴوزىڭىز نۇسقاعان ٴجون-جوسىق، باعىت-باعداردى ەسكەرسەك قازاقستاندىقتار كوپ ۇزاماي-اق ناعىز جاڭا سيپاتتى جاڭا حالىققا اينالادى.

ٴبىز ۇلتتىق بىرەگەيلىگى مەن الەۋمەتتىك بىرلىگى مىزعىمايتىن ٴبىرتۇتاس ەل بولىپ كەلەمىز.

قۇرمەتتى نۇرسۇلتان ٴابىش ۇلى!

تاۋەلسىزدىكتىڭ تاڭى اتار تۇستا ٴسىز «ەل كوشىن باستاۋ ماعان، سىن، مەنى قوشتاۋ ەلگە سىن» دەپ ەكى تىزگىن، ٴبىر شىلبىردى قولعا الدىڭىز.

حالقىڭىز سىزگە سەندى، سوڭىڭىزدان ەردى.

قۇدايعا شۇكىر، قازاقتىڭ كەتكەنى كەلىپ، كەمى تولدى، الەم مويىنداعان ەل بولدى.

سول ٴۇشىن سىزگە قالىڭ ەلىڭىز – قازاعىڭىزدىڭ اتىنان زور ريزاشىلىق بىلدىرەمىن، ەلىمىزدى بيىكتەرگە باستاي بەرىڭىز!

قالي سارسەنباي، «الماتى اقشامى» گازەتىنىڭ باس رەداكتورى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي