جولداۋدا بيزنەستى قولداۋدىڭ تەڭدەسسىز شارالارى قاراستىرىلعان

استانا. 18 قاراشا. baq.kz – ماڭعىستاۋ وبلىسىنداعى «ۆايناح» شەشەندەر مەن ينگۋشتاردىڭ ەتنومادەني بىرلەستىگىنىڭ ٴتوراعاسى ماگومەد لورسانوۆ ەلباسىنىڭ حالىققا ارناعان «نۇرلى جول» - بولاشاققا باستار جول» اتتى جولداۋىندا ايتىپ وتكەن تاپسىرمالار، ماڭعىستاۋلىق كاسىپ يەلەرىن جىگەرلەندىرە تۇسكەندىگىن ايتادى. اسىرەسە، وتاندىق كاسىپكەرلەردى قولداۋعا 100 ملرد تەڭگەنىڭ ٴبولىنۋى، وسىلايشا جەرگىلىكتى كاسىپكەرلەردى مەملەكەتتىڭ قولداۋى بىزدەرگە زور جاۋاپكەرشىلىك جۇكتەيدى، - دەيدى ول اڭگىمەسىندە.

- ٴوزىم جەتەكشىلىك ەتەتىن كاسىپورىن قۇرىلىس ماتەريالدارىن ساتىپ، قۇرىلىس جۇمىستارىن جۇرگىزۋمەن اينالىسادى. وسىلايشا، بيزنەسپەن قاتار، قوعامدىق جۇمىستارمەن دە بەلسەندى تۇردە اينالىسامىن. سوندىقتان دا، وزگە كاسىپكەرلەر مەن وتانداستارىم سەكىلدى ەلباسىنىڭ جولداۋى مەنى ەرەكشە قۋانىشقا بولەپ، بولاشاققا دەگەن سەنىمىمدى نىعايتتى دەسەم دە بولادى، - دەيدى موگامەد ومار ۇلى.

سونداي-اق، ول ەلىمىزدە مەملەكەت باسشىسىنىڭ باستاماسىمەن جۇزەگە اسىرىلىپ جاتقان وڭىرلەردەگى ارنايى ەكونوميكالىق ايماقتاردىڭ قۇرىلىپ، ولاردىڭ ەكونوميكامىزدىڭ دامۋىنا قوسىپ جاتقان ۇلەسىنە ٴدان رازى ەكەندىگىن دە ٴبىلدىردى.

- بۇل ٴبىزدىڭ ەلىمىزدىڭ الەمدىك ارەنادا مالىمدەگەن ينۆەستيسيالار اعىنى ٴۇشىن وتە ٴتيىمدى ٴتاسىل. جانە ونىڭ ويداعىداي ورىندالۋى ٴۇشىن بارىنشا جاعدايلار جاساۋ كەرەك، - دەيدى ول.
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!