جاستار باتىل جوبالار ۇسىنىپ جاتىر

بايقاۋدىڭ نەگىزگى ماقساتى - قازاقستاننىڭ ەكونوميكالىق، ەنەرگەتيكالىق جانە ەكولوگيالىق تۇيتكۇلدەرىن شەشۋگە قۋاتتى ۇنەمدەۋ باعدارلامالارىن ەنگىزۋ ەسەبىنەن ەنەرگيا رەسۋرستارىن پايدالانۋدىڭ تيىمدىلىگىن ارتتىرۋ، قۋات تۇتىنۋ جانە قۋات ۇنەمدەۋ مادەنيەتىن قالىپتاستىرۋ، ول جونىندە حالىقتىڭ تۇسىنىگىن ارتتىرۋ ماسەلەلەرىنە دارىندى جاستاردى تارتۋ. بيىلعى جىلى بايقاۋعا 60 قاتىسۋشى تاراپىنان دايىندالعان 42 جوبا ۇسىنىلعان ەكەن. بۇل بايقاۋ تاريحىنداعى ەڭ ۇلكەن كورسەتكىش جانە وسى بايقاۋ قازىرشە دارىندى جاستاردى ەلىمىزدىڭ ەكونوميكالىق، ەنەرگەتيكالىق جانە ەكولوگيالىق ماسەلەلەرىن شەشۋگە تارتاتىن بىردەن-بىر شارا بولىپ تۇر. وعان قاتىسۋ ارقىلى ٴالى مەكتەپ پارتاسىندا، ستۋدەنتتىك اۋديتوريادا ٴجۇرىپ-اق نەمەسە عىلىمدا العاشقى قادام جاساپ جاتقان جاستار بۇل باعىتتاردا باتىل يننوۆاسيالىق جوبالار ۇسىنۋعا مۇمكىندىك الىپ وتىر. تاجىريبەلى عالىم-مامانداردان جاساقتالعان قازىلار القاسى بايقاۋ قورىتىندىسى بويىنشا، ەنەرگەتيكا ۋنيۆەرسيتەتىنىڭ ٴىىى كۋرس ستۋدەنتى ٴادىل سارىباي ۇلىن جەڭىمپاز دەپ جاريالادى. اۆتوماتيكا جانە باسقارۋ ماماندىعى بويىنشا جوعارى ٴبىلىم الىپ جاتقان ونىڭ تاقىرىبى- ەلەكترودۆيگاتەلدى قامتاماسىز ەتۋ مەن رەتتەۋدىڭ زاماناۋي باعدارلاماسىن جاساپ شىعۋ ەكەن. جەكە تۇرعىن ۇيدە ەنەرگيانى ۇنەمدەۋ جوباسىن ۇسىنعان سەمەيلىك جاس عالىم ياروسلاۆ رومانسەۆتىڭ جۇمىسى دا جاقسى باعا الدى. جۋىردا عانا «ايقىن» گازەتى جازعان «كازگيدرو» ٴجشس-ىنىڭ جوبالاۋشىسى، ۋنيۆەرسيتەت ينجەنەرى عالىمجان قاسىمبەكوۆ بۇل بايقاۋعا «سۋمەن قامتاماسىز ەتۋ جۇيەلەرىن جەتىلدىرۋ ارقىلى شاعىن ەلەكتروستانسالار جۇمىسىنىڭ تيىمدىلىگىن ارتتىرۋ» دەگەن جۇمىسىن ۇسىنىپتى. مۇندا گەس تۇرعىزۋعا قاجەتتى شىعىننىڭ 25-30 پايىزىن قۇرايتىن كۇردەلى تۇندىرعىشتى قۇرىلىمى قاراپايىم ٴارى تازالاۋ مۇمكىندىگى جوعارى گيدروسيكلونمەن اۋىستىرۋ ۇسىنىلعان. سوندا، كورسەتىلگەن شىعىن 7-10 پايىزعا دەيىن تومەندەيتىندىگى تاجىريبەلىك سىناق ناتيجەلەرىمەن دالەلدەنگەن. كەلەشەكتە ەلىمىزدە كوپتەگەن شاعىن گەس-تەر سالىنادى. ەگەر ولاردىڭ قۇرىلىسىندا عالىمجاننىڭ وسى جۇمىسى پايدالانىلسا، قازىنا مەن ينۆەستورلاردىڭ قوماقتى قارجىسىن ۇنەمدەۋگە جول اشىلادى دەگەن ٴسوز. بايقاۋ قورىتىندىسى بويىنشا، جەڭىمپازدار باعالى سىيلىقتارمەن ماراپاتتالىپ، بارلىق قاتىسۋشىلارعا ديپلومدار تاپسىرىلدى. ۇيىمداستىرۋشىلار اتىنان ماراپاتتاۋ راسىمىنە قاتىسقان قازاقستان رەسپۋبليكاسى ينجەنەر-ەنەرگەتيكتەر وداعىنىڭ پرەزيدەنتى، پروفەسسور گەرمان ٴتروفيموۆتىڭ ايتۋىنشا، وسىنداي بالاماسى جوق بايقاۋ ەنەرگيا ۇنەمدەۋ ماسەلەلەرىندە دارىندى جاستاردى انىقتاپ قانا قويماي، وزىق تەحنولوگيالاردى وندىرىسكە ەنگىزۋگە دە كوپ كومەگىن تيگىزەدى. جاس ماماندار مەن عالىمداردىڭ، ستۋدەنت جاستاردىڭ عىلىمي-زەرتتەۋ جۇمىستارىنا بەلسەندى قاتىسۋى بولاشاق ينجەنەرلەردىڭ ٴححى عاسىردىڭ ەنەرگەتيكاسى ٴۇشىن وزىق ويلى تاماشا شەشىمدەر تابۋىنا مۇمكىندىك بەرەدى. ال «شەۆرون» كومپانياسىنىڭ قازاقستانداعى وكىلدىگىنىڭ باسشىسى زامينا قاناپيانوۆا: «شەۆرون» الەمدەگى ەڭ ينتەگراسيالانعان ەنەرگەتيكالىق كومپانيا رەتىندە ەنەرگوتيىمدىلىك سالاسىنداعى تەحنيكالىق شەشىمدەردىڭ زەرتتەمەسىن جاساۋعا بايسالدى كوڭىل بولەدى» دەدى. قاتىسۋشىلاردىڭ ٴبارى: «بايقاۋدى ۇيىمداستىرۋداعى ماقسات ورىندالدى. جاستار قازاقستاننىڭ ەكونوميكالىق، ەنەرگەتيكالىق جانە ەكولوگيالىق پروبلەمالارىن ٴتيىمدى شەشۋ ىسىنە بەلسەندى قاتىسۋعا جۇلقىنىپ وتىر» دەپ تارقاستى. قۇتماعامبەت قونىسباي http://www.aikyn.kz/index.php؟option=com_content&task=view&id=6511&itemid=32

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!