جاڭالىق اشساڭ — قارجىعا قارىق بولاسىڭ

بۇرىن سوڭدى ەڭبەگى ەلەنبەي كەلگەن جاڭالىققۇمارلاردىڭ بۇگىندە جاڭا ٴداۋىرى باستالعانداي. ماسەلەن، ەكى جىلدان بەرى ەلىمىزدىڭ يندۋستريا جانە جاڭا تەحنولوگيالار مينيسترلىگى مەن ۇلتتىق يننوۆاسيالىق قور بىرىگىپ، «راسيوناليزاتور.kz» بايقاۋىن وتكىزىپ كەلەدى. بيىل ەكىنشى رەت جالاۋ كوتەرگەن بايقاۋعا ەلىمىزدىڭ بارلىق وبلىستارىنان سەكسەنگە جۋىق ۇسىنىس كەلىپ تۇسكەن. بۇل ٴوندىرىس ٴورىسىن كەڭەيتۋگە ۇمتىلعان ەلىمىز ٴۇشىن – ۇلكەن الەۋەت.

گانس گەيگەر قۇرعان راديواكتيۆتىلىك، سەميۋەل مورزەنىڭ الىپپەسى، جوزەف گيلوتەننىڭ ٴقاۋىپتى ونەر تۋىندىسى. بۇل – ٴوزى دە، ونەرى دە جۇزدەگەن جىلدار بويى قاتار اتالىپ،  جۇرتتىڭ جادىنا بەرىك ورناعان اتاۋلار. ٴبىراق، تاريح دوڭعالاعىنىڭ ٴجۇرىسىن جىلدامداتىپ، باعىتىن وزگەرتكەن جاڭالىققۇمارلاردىڭ اراسىندا كوپشىلىككە مۇلدەم بەيتانىس جاندار دا بار. ماسەلەن، بۇگىندە نارىقتىق سۇرانىسقا يە،توزىمدىلىگى مىقتى بالالار جايالىعىن اقش-تىڭ كوننەكتيكۋد شتاتىنىنىڭ قاراپايىم تۇرعىنى، ٴۇي شارۋاسىنداعى ايەل — ماريون دونوبان ويلاپ تاۋىپتى. بالاسىنىڭ جايالىعىن جۋۋدان شارشاعان انا بۇرىن سوڭدى پاراشيۋتتە عانا قولدانىلىپ كەلگەن نەيلون ماتاسى مەن جۋىناتىن بولمە پەردەسىنەن ىلعال وتكىزبەيتىن جايالىق جاساعان كورىنەدى.

ەل قۇلاعىنا جەتپەسە دە، ومىرگە ەلەۋلى وزگەرىس ەنگىزۋگە لايىق مۇنداي ونەرتۋىندىلارى قازاقستان نارىعىندا دا بارشىلىق.
ونەرتاپقىشتاردىڭ سانى جونىنەن تمد اۋماعىندا 3 ورىندى يەلەنەتىن ەلىمىزدە جاڭالىققۇمارلاردىڭ سانى جىل سايىن ٴوسىپ كەلەدى. بىلتىرعى جىلى ۇلتتىق ساناتكەرلىك مەنشىك ينستيتۋتىنا ٴوز جاڭالىقتارىن پاتەنتتەۋگە 1600 ٴوتىنىش كەلىپ تۇسسە، بيىل بۇل كورسەتكىش 2000-عا جەتكەن.  

الەمدە وندىرىسكە ەنگىزىلگەن راسيوناليزاتورلىق ۇسىنىستار جىل سايىن ميلليارد دوللار كولەمىندە قارجى ۇنەمدەۋگە ۇلەسىن قوساتىن كورىنەدى.
جاڭالىققا قۇرىلعان ويدىڭ جەمىسىن باعالاۋ جۇيەسى ٴىرى كاسىپورىنداردا دا قولعا الىنىپ وتىر. وندىرىسكە قىزمەتكەردىڭ تاراپىنان قوسىلعان ٴار ۇلەس قارجىلاي سىياقىمەن وتەلىپ وتىرادى. بۇل ورىس حالقى «موزگوۆوي شتۋرم» دەپ اتايتىن ٴتاسىلدىڭ جاڭا ٴبىر ٴادىسى بولسا كەرەك.

بۇگىنگى قوعام ٴۇشىن ەڭ قۇندى دۇنيە – يدەيا دەسەك، تىڭ يدەياسى ٴۇشىن «راسيوناليزاتور.kz»  بايقاۋىنىڭ جەڭىمپازىنا 2،5 ملن. تەنگە كولەمىندە قارجىلاي سىياقى تاعايىندالىپ وتىر. جالپى جۇلدە قورى 5 ملن. تەڭگەنى قۇرايتىن بايقاۋ ەكى نوميناسيا بويىنشا جۇرگىزىلەدى. راسيوناليزاتورلاردىڭ كادۋىلگى ونەرتاپقىشتاردان باسىمدىعى سول، بۇل جاڭالىق وي جەمىسى عانا ەمەس، ٴىس ناتيجەسى رەتىندە تانىلادى. ياعني، راسيوناليزاتوردىڭ اشقان جاڭالىعى وندىرىسكە ەنگىزىلىپ، وسىمگە اسەر ەتىپ ۇلگەرەدى.
 

 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!