BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جاڭا جوبالارعا تالاپ كۇشەيەتىن بولدى

اقپان ايىنداعى العاشقى القا ٴماجىلىسى يندۋستريا جانە جاڭا تەحنولوگيالار مينيسترلىگىندە ٴوتتى. ۇكىمەت جەتەكشىسى كارىم ٴماسىموۆ القا ٴماجىلىسىن ادەتتەگىدەي ٴوز كابينەتىندە بەينەباقىلاۋ ارقىلى «تاماشالادى». «جاس كەلسە - ىسكە» دەگەن ەمەس پە؟ اسەت يسەكەشەۆ باسقارعالى بۇل ۆەدومستۆونىڭ جامان اتى شىققان جوق.
 ەلىمىزدىڭ ۇدەمەلى يندۋستريالىق-يننوۆاسيالىق مەملەكەتتىك باعدارلاماسىنا بىردەن-بىر جاۋاپتى مينيسترلىكتىڭ ابىرويىن وتكەن جىلى ىسكە قوسىلعان جۇزدەن استام ٴوندىرىس وشاعى-اق اسقاقتاتىپ جىبەردى. جىلدى قورىتقان باياندامالاردىڭ ٴبارى دە مەجە ورىندالدى دەگەنگە سايادى ەكەن. قورىتىندى ٴسوزدى ايتۋعا كەلگەن كارىم قاجىمحان ۇلى دا اتالمىش مينيسترلىكتىڭ جۇمىسىنا وڭ باعا بەردى. سونىمەن، وتكەن جىلدى مينيسترلىك قالاي اياقتادى؟ بىرىنشىدەن، قازاقستاننىڭ ونەركاسىپ كاسىپورىندارى بىلتىر 11 757 ملرد تەڭگەنىڭ ٴونىمىن ٴوندىردى. ەلەكتر قۋاتىن ٴوندىرۋ رەسپۋبليكا اۋماعىندا الدىڭعى جىلمەن سالىستىرعاندا 4،9 پايىزعا ارتتى. شەتەلدىك ينۆەستيسيا الدىڭعى جىلعا قاراعاندا 1،1 پايىزعا ٴوستى. سونىڭ ىشىندە شيكىزاتتىق ەمەس سالاعا تارتىلعان ينۆەستيسيالار ەكى ەسەگە كوبەيدى. نەگىزگى ينۆەستورلار قاتارىن نيدەرلاندى، اقش، ۇلىبريتانيا، فرانسيا جانە يتاليا باستاپ تۇر. «شەتەل ينۆەستيسياسىن تارتۋعا وسى ماقساتتا وتكىزىلگەن وتىزعا تارتا بيزنەس-فورۋمدار ىقپال ەتتى»، - دەدى يندۋستريا جانە جاڭا تەحنولوگيالار ٴمينيسترى، پرەمەر-مينيستردىڭ ورىنباسارى اسەت يسەكەشەۆ. ونىڭ ايتۋىنشا، قازىرگى تاڭدا 12 تىلدە جۇمىس ىستەيتىن ۇلتتىق ينۆەستيسيالىق ۆەب-پورتال ىسكە قوسىلىپتى. الەمنىڭ ەڭ ۇزدىك دەگەن 10 پورتالىنىڭ ىشىندە تەك فرانسۋز پورتالىندا عانا 12 ٴتىلدى ينتەرفەيس بار ەكەن. ەندى سونىڭ قاتارىنا ٴبىزدىڭ ەلدىڭ پورتالى قوسىلىپ وتىر. ەستە بولسا، بىلتىر يندۋستريالاندىرۋ كارتاسى اياسىندا 152 جوبا پايدالانۋعا بەرىلىپ، 24 مىڭعا تارتا جۇمىس ورنى اشىلعان-دى. وسى ماقساتتا يندۋستريالاندىرۋ كارتاسىندا 2009 جىلى 500 ملرد تەڭگە، ال 2010 جىلى - 800 ملرد تەڭگە يگەرىلدى. ال بيىل 1،3 ترلن تەڭگەنى يگەرۋ جوسپارلانىپ وتىر! دەمەك، جۇمىس اۋقىمى ارتا تۇسپەك. بۇگىنگى تاڭدا ەلىمىزدە التى ارنايى ەكونوميكالىق جانە ەكى يندۋستريالىق ايماق بار. ارنايى ەكونوميكالىق ايماقتاردى باسقارۋدى جەتىلدىرىپ، ينۆەستورلارعا جاسالاتىن جەڭىلدىكتەر ٴتىزىمىن ۇلعايتۋ ٴۇشىن مينيسترلىك پارلامەنتكە «ارنايى ەكونوميكالىق ايماق تۋرالى» زاڭ جوباسى ەنگىزىپتى. سونىمەن قاتار مينيسترلىك تاراپىنان ەلەكتر ەنەرگەتيكاسىنداعى ٴىرى جوبالاردى جۇزەگە اسىرىپ، سالانىڭ ينۆەستيسيالىق تارتىمدىلىعىن ارتتىرۋ ٴۇشىن قۋات نارىعىنىڭ قازاقستاندىق ۇلگىسىن قۇرۋدى كوزدەيتىن زاڭ جوباسى ازىرلەنىپ، ۇكىمەت قاراۋىنا جونەلتىلگەن. يندۋستريا جانە جاڭا تەحنولوگيالار ٴمينيسترى ٴوز بايانداماسىندا وتكەن جىلى ەلباسى تاپسىرماسىمەن ىسكە اسىرىلا باستاعان 5 جىلدىق يندۋستريالىق باعدارلامانىڭ العاشقى ناتيجەلەرىنە توقتالدى. «جالپى، اتقارىلعان جۇمىستىڭ ارقاسىندا ونەركاسىپتە وڭ ديناميكانى كورۋگە بولادى. وتكەن جىلى شىعارىلعان ٴونىمنىڭ فيزيكالىق كولەمى 10 پايىزعا ارتتى. ال وندىرىلگەن ٴونىم كولەمى 18،4 پايىزدى قۇرادى»، - دەدى مينيستر. ونىڭ ايتۋىنشا، اعىمداعى جىلى جەتىگەن - قورعاس، وزەن - تۇرىكمەنستانمەن مەملەكەتتىك شەكارا تەمىر جولدارى، مويناق سۋ ەلەكتر ستانساسى، قۇبىر شىعاراتىن زاۋىت، تاعى دا ٴبىرقاتار ەكونوميكالىق ماڭىزدى نىساندار ىسكە قوسىلادى. ٴا.يسەكەشەۆ وڭىرلەرگە جاساعان جۇمىس ساپارلارى بارىسىندا 5 جىلدىق يندۋستريالى باعدارلاماعا تاعى دا 224 جاڭا جوبا قوسىلعانىن اتاپ ٴوتتى. قازىرگى تاڭدا بۇل جوبالار قارالۋدا. اقپان ايىندا تاعى دا ٴبىرقاتار جاڭا جوبالار تۇسەدى دەپ جوسپارلانۋدا. سودان كەيىن، ياعني ناۋرىز ايىنىڭ سوڭىندا يندۋستريالاندىرۋ كارتاسى ۇكىمەتتىڭ قاراۋىنا ەنگىزىلمەك. ٴبىراق اسەت يسەكەشەۆ بيىل يندۋستريالاندىرۋ كارتاسىنا ەنگىزىلەتىن جوبالارعا قويىلاتىن ٴتارتىپتىڭ كۇشەيەتىنىن جەتكىزدى. ويتكەنى وتكەن جىلى اكىمدەردىڭ باستاماسىمەن ۇسىنىلعان ٴبىرقاتار جوبالاردى ىسكە قوسۋ ۋاقىتى كەشەۋىلدەپ كەتكەن. «باستى سەبەپ، قارجى جەتىسپەۋشىلىگى دەسەك تە، جوباعا ساراپتامانىڭ ساپاسىز جۇرگىزىلگەنى، جوبانى جاساۋ دەڭگەيىنىڭ وتە تومەن بولعاندىعى دا انىقتالىپ وتىر»، - دەيدى مينيستر. ەندى مينيسترلىك وسى ولقىلىقتاردى ەسكەرە كەلە يندۋستريالاندىرۋ كارتاسىنا قويىلاتىن تالاپتى كۇشەيتپەك. ياعني جوبانى جۇزەگە اسىرۋ مەرزىمىنە جاۋاپكەرشىلىك جۇكتەلەتىن بولادى، بيزنەستىڭ تۇراقتى ۇلگىسى بولۋى تالاپ ەتىلەدى. رەسپۋبليكالىق ماڭىزدى ٴىرى جوبالاردى ٴساتتى جۇزەگە اسىرعان «قازاقستان تەمىر جولى» ۇك» اق، «قازاتومپروم» اق، «قازاقستان دامۋ بانكى» اق جانە كەگوك سىندى كومپانيالاردىڭ اياق الىسىنا وڭ باعا بەرگەن مينيستر قالعان كومپانيالاردى بەلسەندىلىكتى ارتتىرۋعا شاقىردى. وتكەن جىلى مينيسترلىك 200-دەن استام ونەركاسىپ كاسىپورىندارىنا تەحنولوگيالىق اۋديت جۇرگىزىپ، كاسىپورىنداردىڭ نەگىزگى قورلارىنىڭ باسىم بولىگىنىڭ توزىعى جەتكەنىن انىقتاپتى. كادرلاردىڭ كاسىبي بىلىكتىلىگى دە كوڭىلدەن شىقپاعان. ەندى وسى كەمشىلىكتەردى دە جويۋ قولعا الىنباق. مينيستر ونەركاسىپ كاسىپورىندارىنا ونىمدەرىڭىز كەم دەگەندە رەسەي مەن قىتاي باسەكەسىنە توتەپ بەرە الۋى ٴتيىس دەگەن تالاپ قويدى: «ويتپەگەن كۇندە ول كاسىپورىننىڭ بولاشاعى ب ۇلىڭعىر بولماق». ٴۇييد باعدارلاماسىن جۇزەگە اسىرۋعا قازاقستان دامۋ بانكى دە قۇلشىنىس تانىتۋدا. بۇل رەتتە، اتالمىش بانك بيىلعى جىلعى سسۋدالىق پورتفەلىن 3،9 ملرد دوللارعا دەيىن ارتتىرماق. «قازاقستاننىڭ دامۋ بانكى» اق باسقارما ٴتوراعاسى عالي ەسقاليەۆتىڭ ايتۋىنشا، جوبالار بويىنشا قارجىنى يگەرۋ كولەمى 1 ملرد اقش دوللارىنان اسادى. دامۋ بانكى بيىل 2،4 ملرد دوللار كولەمىندەگى 18 جوبانى قارجىلاندىرۋدى جالعاستىرىپ، اياقتايدى. سونداي-اق 357 ملن دوللار كولەمىندەگى 5 جاڭا جوبانى قارجىلاندىرۋدى باستايدى. وسىلايشا ۇدەمەلى يندۋستريالى-يننوۆاسيالىق دامۋ باعدارلاماسىن جۇزەگە اسىرۋدىڭ العاشقى 5 جىلدىعىندا قازاقستان دامۋ بانكى باعدارلاماداعى بارلىق ينۆەستيسيا كولەمىنىڭ 10 پايىزىن قامتاماسىز ەتۋدى كوزدەپ وتىر. القا ماجىلىسىندە وتاندىق دارى-دارمەك جاساۋشىلاردىڭ اياق الىسى جاقسارىپ كەلە جاتقانى جايلى اقپاراتقا قانىقتىق. «قازاقستان فارممەديندۋسترياسى» فارماسەۆتيكا جانە مەديسينالىق ٴونىم وندىرۋشىلەر قاۋىمداستىعىنىڭ» پرەزيدەنتى سەرىك سۇلتانوۆ وتكەن جىلى 2008 جىلمەن سالىستىرعاندا، دارى-دارمەك ٴوندىرۋ 9 ملرد تەڭگەگە ارتقانىن مالىمدەدى. «بىلتىر باعا كوتەرۋگە جاريالانعان موراتورييگە بايلانىستى وتاندىق پرەپاراتتاردىڭ باعاسى 5 پايىزدان جوعارىعا قىمباتتاعان جوق. ەسەسىنە، ٴونىم كولەمى 2 ەسەگە ٴوسىپ، بىلتىر 19 ملرد تەڭگەنىڭ ٴونىمى ٴوندىرىلدى»، -دەگەن. س.سۇلتانوۆ بۇگىندە فارماسەۆتيكا سالاسى بويىنشا 8 زاۋىتتىڭ سالىنىپ جاتقانىن، 10 زاۋىتتىڭ مودەرنيزاسيادان وتەتىنىن تىلگە تيەك ەتتى. بۇعان قازاقستاننىڭ كەدەن وداعى مەن ٴبىرىڭعاي ەكونوميكالىق كەڭىستىككە كىرۋى ىقپال ەتىپتى. ويتكەنى نارىق اياسى كەڭەيگەن سوڭ ٴونىم كولەمى دە ارتا تۇسكەن كورىنەدى. ەندى ٴوندىرىس قۋاتىن ارتتىرۋ عانا قالعان. ال ٴوز كەزەگىندە ٴسوز العان ٴماجىلىس دەپۋتاتى مەيرام پىشەمبايەۆ ماشينا جاساۋ سالاسىنداعى جەتىستىكتەر مەن جوسپارلارعا توقتالدى. القا ماجىلىسىندە ايتىلعان اڭگىمەنىڭ باس-اياعىن تۇگەل تىڭداعان كارىم ٴماسىموۆ جەكە سەكتوردى دامىتۋعا نازار اۋدارۋدى تاپسىردى. «داعدارىس كەزىندە اتقارىلعان جۇمىستاردىڭ نەگىزگى ۇلەسى مەملەكەتتىك رەسۋرستارعا جۇكتەلدى. ەندى بۇدان بىلاي جەكە سەكتورعا كوڭىل ٴبولۋ كەرەك. ٴدال وسى جەكە سەكتور دامۋدىڭ نەگىزگى لوكوموتيۆى بولۋى قاجەت»، - دەدى ك.ٴماسىموۆ. ۇكىمەت جەتەكشىسى بۇل وتىرىستا دا ازىق-تۇلىك باعاسى ماسەلەسىن قوزعاي كەتتى. ول القا ماجىلىسىنە قاتىسقان وبلىس اكىمدەرىنىڭ ورىنباسارلارىنا ازىق-تۇلىك ماسەلەسىن تىڭعىلىقتى قاراستىرۋدى تاپسىردى. «ازىق-تۇلىك باعاسى بويىنشا جاعداي كەيبىر وبلىستاردا تۇراقتى، ال كەيبىر وڭىرلەردەگى احۋال سىن كوتەرمەيدى»، - دەگەن ول بۇل ماسەلە الداعى سەنبىدە وتەتىن سەلەكتورلىق كەڭەستە تالقىعا تۇسەتىنىن ەسكەرتتى. جيىن سوڭىندا ك.ٴماسىموۆ ٴوزىنىڭ ورىنباسارى ٴا.يسەكەشەۆپەن مينيسترلىكتىڭ الداعى ۋاقىتتا اتقاراتىن جۇمىستارىنا نەگىز بولاتىن مەموراندۋمدى بەكىتتى. حاليما بۇقارقىزى استانا http://www.aikyn.kz/index.php؟option=com_content&task=view&id=6033&itemid=2

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي