استانا: 
626 
0
استانا. 9 قاڭتار. baq.kz – بۇگىن پرەزيدەنت جانىنداعى ورتالىق كوممۋنيكاسيالار قىزمەتىنىڭ الاڭىندا وتكەن ٴباسپاسوز ٴماسليحاتىندا ٴبىلىم جانە عىلىم ۆيسە-مينيسترى تاحير بالىقبايەۆ ەلباسى تاپسىرماسىمەن ۇلتتىق قوردان قارجىلاندىرىلۋعا ٴۇمىتتى ون ەكى وقۋ ورنىنىڭ اتىن اتاپ، سالالىق باعىتتارىن ٴتۇسىندىردى، - دەپ حابارلايدى baq.kz ٴتىلشىسى.
- ونىڭ العاشقىسى نازاربايەۆ ۋنيۆەرسيتەتى، قازاق ۇلتتىق ۋنيۆەرسيتەتى، قازاق ۇلتتىق اگرارلىق ۋنيۆەرسيتەتى، قازاق ۇلتتىق تەحنيتكالىق ۋنيۆەرسيتەتى، ەۋرازيا ۇلتتىق ۋنيۆەرسيتەتى، قازاق اگروتەحنيكالىق ۋنيۆەرسيتەتى، قوستاناي مەملەكەتتىك ۋنيۆەرسيتەتى، پاۆلودار مەملەكەتتىك ۋنيۆەرسيتەتى، شىعىس قازاقستان تەحنيكالىق ۋنيۆەرسيتەتى، وڭتۇستىك قازاقستان تەحنيكالىق ۋنيۆەرسيتەتى مەن قاراعاندى مەملەكەتتىك تەحنيكالىق ۋنيۆەرسيتەتى جانە اتىراۋ مۇناي جانە گاز ۋنيۆەرسيتەتى. وسى اتالعان جوو-لاردىڭ بارلىعى دا قازىرگى كەزدە ارنايى باعدارلاما اياسىندا ٴوز جۇمىستارىن جالعاستىرۋعا قاتىستى وزدەرىنىڭ سالالىق ۇسىنىستارىن دايىنداۋ ۇستىندە. الداعى اپتادا ٴبىز ولاردىڭ ۇسىنعان جوبالارىن تالداپ، تارازىلاپ ون وقۋ ورنىن ۇكىمەتكە ۇسىنامىز. ودان كەيىن ارنايى قاۋلىمەن بەكىتىلىپ، ولار ٴوز جۇمىستارىن جالعاستىراتىن بولادى. ال ەندى نەگە بۇل وقۋ ورىندارى تاڭدالدى دەگەنگە كەلەتىن بولساق، بۇلاردىڭ بارلىعى دا ەلباسى ايتقان ەل ەكونوميكاسىن يندۋستريالاندىرۋ باعىتىنا ساي كەلەدى. بىرەۋ مۇناي سالاسى بولسا، ەندى ٴبىرى ەنەرگەتيكا، ماشينا جاساۋ سىندى سالالاردى دامىتۋعا قوسار مۇمكىندىكتەرى مول. سونىمەن قاتار، ولاردىڭ گەوگرافيالىق ورنالاسۋ جاعىنان دا ٴتيىمدى تۇستارى بار، - دەيدى تاحير وسپان ۇلى.
ەستەرىڭىزگە سالا كەتەيىك، مەملەكەت باسشىسى «نۇرلى جول» جاڭا ەكونوميكاداعى – جاڭا ساياسات» حالىققا ارناعان جولداۋىندا ەلدىڭ وزىق ۇلگىلى ون جوو تاڭداپ، ولاردىڭ ٴارقايسىسىنا ۇلتتىق قوردان 1 ملرد تەڭگەدەن قارجى ٴبولۋ ارقىلى زاماناۋي اعىمعا ساي ٴبىلىم بەرۋىن ودان سايىن جانداندىرىپ، جەتىلدىرۋدى تاپسىرعان بولاتىن.
نۇرلىبەك دوسىباي،
سۋرەتتى تۇسىرگەن – عابيت ماداليەۆ
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5007
0