ۇلتتىق قور قاراجاتىنىڭ ٴتيىمدى جۇمسالۋىن مەملەكەتتىك كوميسسيا مەن «نۇر وتان» پارتياسى قاداعالايدى

استانا. 20 قاراشا. baq.kz - «بولاشاق ۇرپاقتار قورى» سانالاتىن ۇلتتىق قور قاراجاتىنىڭ كەلەشەكتىڭ يگىلىگىنە جاراتىلۋى ىلۋدە ٴبىر ەلدىڭ قولىندا بار مۇمكىندىك، دەدى «قازاقستان-2050» دەموكراتيالىق كۇشتەردىڭ جالپىۇلتتىق كواليسياسىنىڭ وتىرىسىندا «نۇر وتان» پارتياسى ٴتوراعاسىنىڭ ٴبىرىنشى ورىنباسارى باۋىرجان بايبەك. 

«ەلباسى پارمەنىمەن جينالعان قور قارجىسى كەزىندە كەيبىر ساياساتكەرلەر مەن ەكونوميستەر ۇسىنعانداي تاراتىلىپ كەتسە، بۇگىنگىدەي وراسان الەۋەت قولىمىزدا بولماسى ايدان انىق. وسىناۋ اۋقىمدى جوباعا بولىنەتىن قارجىنىڭ ٴتيىمدى جۇمسالۋىن قاداعالاۋدى مەملەكەت باسشىسى ارنايى قۇرىلاتىن مەملەكەتتىك كوميسسياعا، «نۇر وتان» پارتياسىنا اتاپ تاپسىردى»، - دەدى پارتيا ٴتوراعاسىنىڭ ٴبىرىنشى ورىنباسارى. ساياساتكەردىڭ ايتۋىنشا، وسى سەبەپتى دە، پارتياعا سىبايلاس جەمقورلىققا قارسى ٴىس-قيمىل جونىندەگى باعدارلاماسىندا كورسەتىلگەندەي، پارتيالىق، قوعامدىق باقىلاۋدى كۇشەيتۋ ارقىلى حالىق يگىلىگىنە ارنالعان مەملەكەت قاراجاتىنىڭ شاشاۋسىز جۇمسالۋىن جۇزەگە اسىرۋ – باستى مىندەت. «جالپى، قوررۋپسيامەن ىمىراسىز كۇرەستە ەل ەكونوميكاسى دامۋىنىڭ ۇلكەن رەزەرۆى جاتقاندىعى بارشامىزعا ٴمالىم. اتالعان باعدارلامادا وسى ٴىستى ٴتيىمدى جۇرگىزۋدىڭ تەتىكتەرى ناقتى كورسەتىلگەن»، - دەپ اتاپ ٴوتتى ب.بايبەك. cونداي-اق، ول، الداعى جىلدارى ەلىمىزدە سىبايلاس جەمقورلىقتىڭ الدىن الاتىن 15 زاڭ جوباسىن قابىلداۋدىڭ كوزدەلىپ وتىرعانىن جانە جۇمىس ناتيجەسىنىڭ دامىعان 30 مەملەكەتتىڭ كورسەتكىشتەرىنە نەگىزدەلگەن حالىقارالىق 5 كريتەريي بويىنشا سارالاناتىن جەتكىزدى. «ەلىمىزدىڭ ەڭ بەدەلدى ساياسي پارتيالارى مەن ۇكىمەتتىك ەمەس ۇيىمدارى توپتاسقان دەموكراتيالىق كۇشتەردىڭ جالپىۇلتتىق كواليسياسى بۇگىندەرى پارلامەنت پەن ٴماسليحاتتار دەپۋتتارى، ٴتيىستى ورگاندار جۇمىلا كىرىسىپ جاتقان مەملەكەت قاراجاتىن باقىلاۋ ىسىنە اشىقتىق پەن جاريالىلىق نەگىزىندە ەلىمىزدىڭ بارلىق بەلسەندى كۇشتەرىن جۇمىلدىراتىن الاڭ بولۋى ٴتيىس. وعان كواليسيانىڭ الەۋەتى، بەدەلى مەن مۇمكىندىكتەرى جەتەدى»، - دەپ تۇيىندەدى ساياساتكەر ٴسوزىنىڭ سوڭىن. ايتا كەتەيىك، وتىرىسقا قر پرەمەر-مينيسترىنىڭ ٴبىرىنشى ورىنباسارى باقىتجان ساعىنتايەۆ، «اق جول» پارتياسىنىڭ ٴتوراعاسى ازات پەرۋاشەۆ، قازاقستان پاتريوتتار پارتياسىنىڭ ٴتوراعاسى عاني قاسىموۆ، «بىرلىك» پارتياسىنىڭ ٴتوراعاسى سەرىك سۇلتانعالي، قازاقستان كوممۋنيستىك حالىق پارتياسىنىڭ حاتشى-ۇيلەستىرۋشىسى جامبىل احمەتبەكوۆ، سونداي-اق، دكجك قۇرامىنداعى ۇەۇ-مەن باسقا دا قۇرىلىمداردىڭ جەتەكشىلەرى قاتىستى. وندا مەملەكەت باسشىسىنىڭ «نۇرلى جول – بولاشاققا باستار جول» اتتى قازاقستان حالقىنا جولداۋىندا بەرگەن تاپسىرمالارىن جۇزەگە اسىرۋ ماسەلەلەرى تالقىلانىپ، جاڭا باستامالارعا قولداۋ رەتىندە ۇندەۋ قابىلداندى. 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!