ۇلى جىبەك جولىنىڭ زاماناۋي جاڭعىرۋىنا – بىرنەشە ەل مۇددەلى

استانا. 17 ٴساۋىر. baq.kz – ساراپشىلاردىڭ پايىمداۋىنشا، جىبەك جولىنىڭ ەكونوميكالىق بەلدەۋى تەك قانا، كولىك تاسىمالىنا بايلانىستى عانا جوبا ەمەس. ول – بىرنەشە مەملەكەتتەردىڭ ەكونوميكالىق دامۋىنا اسەر ەتەتىن كەشەندى جوبا، ونىڭ ىشىنە – ينفراقۇرىلىمعا، ونەركاسىپكە، ساۋدا مەن قىزمەت كورسەتۋ سالاسىنا قاتىستى كوپتەگەن جوبالار ەنەدى. وسى تاقىلەتتەس جان-جاقتى تالدامالى تەرەڭ ويلار بۇگىن استانادا وتكەن «ەۋرازيانى قۇرۋ: جىبەك جولىنىڭ ەكونوميكالىق بەلدەۋى» اتتى حالىقارالىق كونفەرەنسيادا ايتىلدى، - دەپ حابارلايدى baq.kz ٴتىلشىسى.

- بۇل جوبا ٴوز كەزەگىندە، تەك قانا، قىتايدىڭ باتىسىندا ەمەس، سونىمەن بىرگە - ەۋرازيانىڭ بۇكىل ورتالىعىندا دامۋدىڭ تۇراقتى ٴارى ٴقاۋىپسىز احۋالىن قالىپتاستىرماق، - دەدى جيىنعا جەتەكشىلىك ەتكەن تۇڭعىش پرەزيدەنت قورىنىڭ الەمدىك ەكونوميكا مەن ساياسات ينستيتۋتىنىڭ ديرەكتورى سۇلتان اكىمبەكوۆ.

ال كونفەرەنسياعا قاتىسقان ساراپشىلار قاۋىمى بولسا، جىبەك جولى كونسەپسياسى - اسىرەسە ناقتى ينفراقۇرىلىمدىق جوبالار ارقىلى جۇزەگە اسسا، ورتالىق ازياعا قولايلى بولاتىنىن جوققا شىعارمايتىندىعىن باياندادى.

- ٴبىز بۇگىن اڭگىمە ەتىپ جاتقان «ەكونوميكالىق بەلدەۋ» جوق جەردەن جاسالمايدى. ول قىتاي مەن كورشىلەس ەلدەر بۇرىننان قالىپتاستىرعان ەكىجاقتى جانە كوپجاقتى مەحانيزمدەر مەن ايماقتىق ىنتىماقتاستىق الاڭدارىنا سۇيەنەتىندىگى ٴسوزسىز، - دەپ تۇيىندەدى ٴوز ويىن سۇلتان ماعرۇپ ۇلى.

جالپى، مامانداردىڭ پىكىرىنشە، قىتاي تاراپى ۇسىنىپ وتىرعان جىبەك جولى ەكونوميكالىق بەلدەۋىن جاساقتاۋ جوباسى قازاقستاننىڭ دامۋ باعدارلاماسىمەن ۇندەسىپ تۇرعان كورىنەدى. ويتكەنى، قازاقستاندا كولىك ينفراقۇرىلىمى جوبالارىنا ينۆەستيسيا ۇزدىكسىز جاسالىپ كەلەدى. بۇل جەردە قۇرىلىسى اياقتالۋعا جاقىن «باتىس ەۋروپا – باتىس قىتاي» اۆتوماگيسترالى مەن «نۇرلى جول» جاڭا ەكونوميكالىق ساياسات كونسەپسياسىن اتاپ وتۋگە بولادى. بۇل جوبالاردىڭ بارلىعى تاۋار اينالىمىن جاقسارتۋ ٴۇشىن قازاقستاننىڭ حالىقارالىق ترانزيتتىك الەۋەتىن ارتتىرىپ، كولىكتەردىڭ قولجەتىمدى بولۋىنا باعىتتالعاندىعى ايقىن.

نۇرلىبەك دوسىباي
 

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!