تاۋەلسىزدىكتىڭ 20 جىلدىعىنا ارنالعان جاڭا اقشا اينالىسقا شىعادى

الماتى. 1 شىلدە. قازاقپارات /ەربول ازانبەك/ - ۇلتتىق بانك  4 شىلدەدە تاۋەلسىزدىكتىڭ 20 جىلدىعىنا ارناپ نومينالدىق قۇنى 10 000 تەڭگەلىك ەسكەرتكىش بانكنوتتى اينالىسقا شىعارادى. بۇل تۋرالى ۇب ٴباسپاسوز قىزمەتى حابارلادى.

ەسكەرتكىش مونەتانىڭ ديزاينى اينالىستاعى اقشا بەلگىلەرىمەن ٴبىرىڭعاي ٴستيلدى ساقتاي وتىرىپ جاسالعان، باسىم ٴتۇسى - كۇلگىن كوك. بانكنوتتىڭ بەت جاعىندا استانا قالاسىنىڭ ون جىلدىق مەرەيتويى قارساڭىندا اشىلعان جانە قازاقستاننىڭ تاۋەلسىزدىگىن پاش ەتەتىن «قازاق ەلi» مونۋمەنتىنىڭ بەينەسى ورنالاسقان. تومەنگى وڭ جاعىندا ۇيلەسىمدى، بەيبىتشىلىك پەن كەلىسىمدى بىلدىرەتىن ۇشىپ جۇرگەن كوگەرشىندەر بەينەلەنگەن.

 بەت جاعىندا نەگىزگى قورعانىش ەلەمەنتتەرى بولىپ تابىلاتىن: سامۇرىق ميفتىك قۇس تۇرىندەگى سۋتامعى بەلگى، مەتالسىزداندىرىلعان پوليمەرلى جولاقتان تۇراتىن ٴمولدىر ورىندا ويۋ-ورنەك پەن بانكنوتتىڭ نومينالى بەينەلەنگەن. كوگەرشىندەردىڭ بىرەۋى بوياۋدىڭ ٴتۇسى قۇبىلىپ تۇراتىن  تەحنولوگيانى پايدالانا وتىرىپ بەينەلەنگەن، قاراۋ بۇرىشىن وزگەرتكەن كەزدە ونىڭ ٴتۇسى جاسىلدان التىن تۇستەس بولىپ وزگەرەدى. قازاقستان رەسپۋبليكاسى پرەزيدەنتىنىڭ قولى جانە بانكنوتتىڭ شىعارىلعان جىلى بەينەلەنگەن ٴتۇسى قۇبىلىپ تۇراتىن قاعازعا ەنگىزىلگەن «ۇزىك-ۇزىك» ەمەس تۇتاس قورعانىش ٴجىپ العاش رەت قولدانىلعان.

سىرت جاعىندا بانكنوتتىڭ ورتاسىندا نەگىزگى سۋرەت «اق وردا» پرەزيدەنت سارايى بەينەلەنگەن. جوعارعى سول جاق بۇرىشتا «قازاقستان تاۋەلسىزدىگىنە جيىرما جىل» دەگەن جازۋ بار، ونىڭ استىندا تاۋەلسىزدىكتىڭ 20 جىلدىعىن مەرەكەلەۋ لوگوتيپى ورنالاسقان. بانكنوتتىڭ سىرت جاعىندا ٴبىرقاتار قورعانىش ەلەمەنتتەرى بار: ٴمولدىر ورىن جانە ەسكەرتكىش جازۋدىڭ استىندا جارىققا توسىپ قاراعاندا كورىنەتىن «ون» دەگەن ٴسوز تۇرىندەگى جاسىرىن بەينە. سونداي-اق بانكنوتتى قولدان جاساۋدان قورعاۋ ٴۇشىن سىرت جاعىندا جارىققا توسىپ قاراعان كەزدە بەت جاعىنداعى بولىكپەن تۇتاسىپ كورىنەتىن  بەينەنىڭ ٴبىر بولىگى كەسكىندەلگەن.

ەسكەرتكىش بانكنوتتىڭ ولشەمى 2006 جىلعى ۇلگىدەگى 10 000 تەڭگەلىك بانكنوتتىڭ ولشەمىنە سايكەس كەلەدى (149ح79 مم). بانكنوتتىڭ تارالىمى 30 ميلليون دانا.

قازاقستان تاۋەلسىزدىگىنىڭ 20 جىلدىعىنا ارنالعان ەسكەرتكىش بانكنوت زاڭدى تولەم قۇرالى بولىپ تابىلادى جانە تولەمنىڭ بارلىق تۇرلەرىنە جانە اقشا اۋدارىمىنا مىندەتتى قابىلدانادى.

http://www.inform.kz/kaz/article/2390999

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!