ت.ق ۇلىبايەۆ: قۇرىلىس يندۋسترياسىنىڭ قارقىندى دامۋىنا جاڭا تەحنولوگيالار قاجەت - قازاقستان ەكونوميكاسى|25 قاڭتار 2016، 20:58
كۋرسى ۆاليۋت وبنوۆليايۋتسيا
استانا:

ت.ق ۇلىبايەۆ: قۇرىلىس يندۋسترياسىنىڭ قارقىندى دامۋىنا جاڭا تەحنولوگيالار قاجەت

استانا. 25 قاڭتار. baq.kz – يمپورتتىق قۇرىلىس ماتەريالدارىن وتاندىققا الماستىرۋ جانە كاسىپورىنداردى ەل اۋماعىنا شوعىرلاندىرۋدى قامتاماسىز ەتۋ مۇمكىندىگىنە تالداۋ جۇرگىزۋ قاجەت. «اتامەكەن» ٴتورالقاسىنىڭ ٴتوراعاسى تيمۋر ق ۇلىبايەۆتىڭ قاتىسۋىمەن وتكەن ۇلتتىق كاسىپكەرلەر پالاتاسى قۇرىلىس، قۇرىلىس ماتەريالدارىن ٴوندىرۋ جانە تكش كوميتەتىنىڭ ەسەپتىك جينالىسىندا قۇرىلىس ماتەريالدارىن ٴوندىرۋ سالاسىنداعى يمپورتتىڭ ورنىن تولتىرۋ ماسەلەلەرى تالقىلاندى، دەپ حابارلايدى baq.kz ٴتىلشىسى.

سوڭعى جىلدارى تۇرعىن ٴۇي قۇرىلىسى ٴوسىم كورسەتىپ وتىر: 2013 جىلى رەسپۋبليكادا 6 843 ملن شارشى مەتر سالىنسا، 2014 جىلى 7 518 ملن شارشى مەتر، ال 2015 جىلى بۇل كورسەتكىش 8 940 ملن شارشى مەتر شاماسىنا جەتىپ وتىر. بيىلعى جىلى، expo-2017 نىسانارىنىڭ كولەمدى قۇرىلىسىن ەسكەرە وتىرعاندا، كورسەتكىشتەر بىلتىرعى جىلدان تومەن بولمايتىن سياقتى.

«اتامەكەن» ۇكپ باسشىسى سونىمەن بىرگە يمپورتتىق قۇرىلىس ماتەريالدارىن وتاندىققا الماستىرۋ جونىندەگى جۇمىستى بەلسەندىرۋدىڭ جانە كاسىپورىنداردىڭ ەل اۋماعىنا بارىنشا شوعىرلانۋىن قامتاماسىز ەتۋدىڭ، سونداي-اق ٴجۇرىپ جاتقان قۇرىلىس جۇمىستارىنىڭ ساپاسىن قامتاماسىز ەتۋدىڭ ماڭىزدىلىعىن اتادى.

«قۇرىلىس كولەمى جانە قوزعالىسى جامان ەمەس، ٴبىراق ىشكى نارىقتى قامتاماسىز ەتىپ، سىرتقىعا شىعۋ ٴۇشىن، قولدا بار ٴوندىرىس اينالىمىن ارتتىرىپ، جاڭالارىن ىسكە قوسۋ كەرەك. كورشىلەس ەلدەرمەن باسەكەلەسۋ قيىن، الايدا ونسىز بولمايدى. باسەكەلەستىك – بۇل دامۋعا تۇرتكى. مۇندا نەگىزگى ٴۇش فاكتور ماڭىزدى: وندىرىستە تەك جاڭا تەحنولوگيالاردى قولدانۋ، مىقتى ماركەتينگ جانە مەملەكەتتىك قولداۋ»، - دەپ اتادى تيمۋر ق ۇلىبايەۆ.

ۇلتتىق پالاتا باسشىسى قازاقستانداعى قۇرىلىس سالاسى ٴۇشىن ەڭ وزەكتى ماتەريالدار مەن جابدىقتاردى شىعارۋ بويىنشا زەرتتەۋ جۇرگىزۋدى تاپسىردى.

ۇلتتىق پالاتا قۇرىلىس، قۇرىلىس ماتەريالدارىن ٴوندىرۋ جانە تكش كوميتەتىنىڭ باسشىسى الەكساندر بەلوۆيچ ٴوز كەزەگىندە ەلىمىزدە قر ازاماتتىق كودەكسىنە سايكەس جاسالاتىن مەردىگەرلىك شارتتارمەن بىرگە fidic (federation internationaldes ingenieurs-conseils) ستاندارتتارىنا سايكەس بيزنەس جۇرگىزۋ تاجىريبەسىن ەنگىزۋدى ۇسىندى. ول بۇل تۇعىرنامانىڭ امبەباپتىعىن باسا كورسەتىپ، رەسپۋبليكالىق ماڭىزى بار جولداردا 2013 جىلدان بەرى اتالمىش ستاندارتتىڭ ويداعىداي ەنگىزىلىپ كەلە جاتقانىن اتادى.

«بۇل ستاندارتتى ازاماتتىق جانە ونەركاسىپتىك قۇرىلىستا دا قولدانۋعا بولادى، ەگجەي-تەگجەيلى جازىلعان جانە الەمنىڭ كوپتەگەن ەلدەرىندە كەڭىنەن قولدانىلادى. اتالمىش ستاندارت ورىندالعان جۇمىستىڭ ساپاسى مەن كولەمى ٴۇشىن ينجەنەردىڭ جوعارى جاۋاپكەرشىلىگىن، نەگىزگى قۇرىلىس ماتەريالدارى مەن جابدىقتارعا دەگەن نارىقتىق باعا اۋىتقۋىنا سايكەس جەدەل جاۋاپ قاتۋدى، قۇرىلىس مەرزىمىن بۇزعانى ٴۇشىن ايىپپۇل شارالارىن جانە ت.ب. كوزدەيدى»، - دەدى الەكساندر بەلوۆيچ.

«اتامەكەن» ٴتورالقاسىنىڭ ٴتوراعاسى تيمۋر ق ۇلىبايەۆ بيزنەس ٴۇشىن دە، مەملەكەت ٴۇشىن دە وڭ اسەر ساقتالعان جاعدايداعى داعدارىسقا قارسى شارالاردى ەنگىزۋدىڭ جانە قۇرىلىس سالاسىن قارجىلاندىرۋدى ىنتالاندىرۋدىڭ ماڭىزدىلىعىنا نازار اۋداردى.

قۇرىلىس كوميتەتىنىڭ باسشىسى «اتامەكەن» باسشىسىنا fidic كەلىسىمشارتتارىنىڭ ەكى تاراپ – مەردىگەر جانە تاپسىرىس بەرۋشىگە قاتىستى العاندا دا تەڭدەستىرىلگەنىنە ٴارى ٴادىل بولاتىنىنا سەندىردى، سەبەبى تاۋەكەل ٴۇشىن جاۋاپكەرشىلىك تاۋەكەلدەردى باقىلاۋعا، جاۋاپكەرشىلىك الۋعا جانە سايكەس شەشىمدەر قابىلداۋعا قۇزىرلى تاراپتىڭ موينىندا بولادى. سونىمەن قاتار ستاندارت قازاقستان رەسپۋبليكاسىنىڭ جەكە مەنشىك ينۆەستورلار، دۇنيەجۇزىلىك بانك، ەدقب، ادقب جانە ت.ب. ەسەبىنەن قارجىلاندىرىلاتىن حالىقارالىق قۇرىلىس تەندەرلەرىن وتكىزگەن كەزىندە ەرەكشە ماڭىزدى.

ۇكپ باسقارما مۇشەسى يۋليا ياكۋپبايەۆا وتاندىق تاۋار وندىرۋشىلەر ٴتىزىلىمىن جۇرگىزۋ جونىندەگى اعىمداعى جۇمىس جايلى باياندادى. اتالمىش تىزىلىمدە قازىردە وڭىرلەر بويىنششا وندىرەتىن ٴونىم ٴتۇرى كورسەتىلگەن 680-گە جۋىق ٴوندىرۋشى تىركەلگەن.

وڭىرلەر بويىنشا وندىرىستەر كارتاسى جاساقتالعان. وندىرۋشىلەر ٴىرى – 77، ورتا – 266 جانە شاعىن – 336 بولىپ جىكتەلگەن.

كوميتەت جاقىن ارادا وتانىمىزدا وندىرىلەتىن قۇرىلىس ماتەريالدارىنىڭ يمپورتتىڭ ورنىن الماستىرۋى جونىندەگى ۇسىنىستارىن تانىستىرادى.

 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي